မဲခေါင်၊ ဩဂုတ် ၁၃
လွန်ခဲ့သည့် နှစ် ၆၀ က အလွန်အေးခဲသော အန္တာတိကတိုက်ရှိ ရေခဲပြင်များထဲ သုတေသနအလုပ် သွားရောက်လုပ်ကိုင်ရင်း ရေခဲချောက်ထဲကျသွားခဲ့ကာ ပျောက်ဆုံးသွားခဲ့သော ဗြိတိန်သား လူစွန့်စား၏ အေးခဲနေသော ရုပ်ကြွင်းများကို Henryk Arctowski Polish Antarctic Station အဖွဲ့မှ သုတေသီများက မထင်မှတ်ပဲ တွေ့ရှိခဲ့သည်။
၁၉၃၄ ခုနှစ်ဖွား၊ ဗြိတိန်တော်ဝင်လေတပ်သားဟောင်းလည်းဖြစ် ဝေးလံသီခေါင်သော ဖောက်ကလန် ကျွန်းတွင် မိုးလေဝသ အချက်အလက်များကို ဘောလုံးများလွှတ်တင်ပြီး ပြန်ပေးပို့ရသော အလုပ်လည်း လုပ်ခဲ့သည့် ဒင်းနစ်ဘဲလ်သည် ၁၉၅၈ ခုနှစ်က အသက် ၂၅ နှစ်သာရှိသေးချိန် အန္တာတိကရှိ ယူကေ အခြေစိုက် Admiralty Bay တွင် ၂ နှစ်ကြာ စွန့်စားတာဝန်ထမ်းဆောင်နေခဲ့သည်။
အန္တာတိကကျွန်းဆွယ်မြောက်ဘက်စွန်း ၇၅ မိုင်အကွာရှိ ဂျော့ချ်ဘုရင်ကျွန်းတွင် တာဝန်ထမ်းနေစဉ် ရေခဲတောင်ပေါ်တက်ရာမှ ချောက်ထဲကျသွားပြီး အတူပါလာသူက ခေါ်ကြည့်စဉ်ပြန်ထူးသဖြင့် ကြိုးဖြင့်ပြန်ဆွဲတင်ရာတွင် အပေါ်ရောက်ခါနီးမှ ခါးပတ်ပြတ်ပြီးပြုတ်ကျသွားပြီးနောက် စကားမေး မရတော့သလို ရှာဖွေ့ရာတွင်လည်း မတွေ့နိုင်တော့သဖြင့် မိသားစုအား သေဆုံးခဲ့ပြီဟု သက်ဆိုင်ရာက အကြောင်းကြားပေးခဲ့ခြင်းဖြစ်သည်။
သို့သော် ယခုမှ ပိုလန်သုတေသနအဖွဲ့က အဆိုပါနေရာတွင် လေ့လာရေးထွက်စဉ် ဒင်းနစ်ဘဲလ်၏ အေးခဲနေသော ရုပ်ကြွင်းကို တစ်ဦးက နင်းမိရာမှ ရေဒီယိုနှင့် ပိုက်တစ်ခုပါတွေ့ပြီး ဒင်းနစ်ဘဲလ် ဖြစ်ကြောင်း အတည်ပြုနိုင်ခဲ့ခြင်း ဖြစ်သည်။
ယနေ့ ၈၆ နှစ်ရှိပြီဖြစ်ကာ ဩစတြေးလျတွင် နေထိုင်နေသော ဒင်းနစ်ဘဲလ်၏ ညီအစ်ကိုတော်သူ ဒေးဗစ်ဘဲလ်က နှစ် ၆၀ ကြာမှ ညီအစ်ကိုတော်သူ အလောင်းအား မွေးရပ်ပြန်သယ်ပြီး လဲလျှောင်းစေမှုအတွက် ကိုယ်တိုင် အင်္ဂလန်သို့သွားရောက်မည်ဖြစ်ကာ မည်သို့မျှ မထင်ထားသော တွေ့ရှိမှုဟု အံ့ဩဝမ်းသာ ပြောသွားခဲ့သည်။
၁၉၄၄ ခုနှစ်နောက်ပိုင်း ဒင်းနစ်ဘဲလ် တာဝန်ထမ်းခဲ့သော British Antarctic Territory အဖွဲ့အတွက် အန္တာတိကဒေသတွင် သုတေသနအလုပ်များလုပ်ပေးခဲ့သူများအနက် သေဆုံးခဲ့သူပေါင်း ၂၉ ဦး ရှိခဲ့ပြီဖြစ်သည်။
ကိုကလင်း
Ref: Thesun
#MeKongNews
#ဒင်းနစ်ဘဲလ်
#အန္တာတိက
#ဗြိတိန်သုတေသန
#ရေခဲပြင်
