မဲခေါင်၊ ဖေဖော်ဝါရီ ၄
တော်လှန်ရေး လေးနှစ်ကျော်လာသည့်အချိန်ထိ လူနှင့် လက်နက်အင်အားနည်းပါးခြင်း၊ ပူပေါင်းချိတ်ဆက်လုပ်ဆောင်နိုင်မှု အားနည်းခြင်းများကြောင့် ရှမ်းပြည်တောင်ပိုင်းတော်လှန်ရေးအဖွဲများ ဒေသအတွင်းပိုင်းထိ ထိုးဖောက်ဝင်ရောက်နိုင်ရန် ခက်ခဲနေသည်ဟု ဒေသတွင်းတော်လှန်ရေး သုံးဖွဲ့က ပြောသည်။
ရှမ်းပြည်နယ်အတွင်း တောင်ပိုင်းဒေသသည် တော်လှန်ရေးအဖွဲ့များ ပေါများနေသော်လည်း ဒေသတွင်းကို တော်လှန်ရေးတပ်များ ဝင်ရောက်မှုမရှိခြင်း၊ ထိန်းချုပ်နိုင်မှုမရှိခြင်းတို့ကြောင့် စစ်ကောင်စီ နှင့် PNO တပ်များ ချုပ်ကိုင် ချယ်လှယ်ခွင့်ရနေသည်ဟု ဒေသတွင်း၌ပင် သုံးသပ်ချက်များ ပေါ်ထွက်နေသည်။
အမျိုးသားညီညွတ်ရေးအစိုးရ (NUG) လက်အောက်ခံ (၁၀၀၉) တပ်ရင်း၊ အင်းလေးပြည်သူ့ကာကွယ်ရေးတပ်အနေဖြင့် လူအင်အားရှိသော်လည်း လက်နက်အင်အားလိုအပ်ချက်ကြောင့် ဒေသတွင်းကို ထိုးဖေါက်နိုင်ခြင်းမရှိဟု ပြောသည်။
NUG လက်အောက်ခံမဟုတ်သည့် Black Fox Southern Shan Local Defence Force နှင့် SSLRU အဖွဲ့က လူအင်အား၊ လက်နက်အင်အား နည်းပါးခြင်းနှင့် နွေဦးတော်လှန်ရေးနောက်ပိုင်းပေါ်ပေါက်လာသည့် တော်လှန်ရေးအဖွဲ့များ စုစည်းနိုင်မှုအားနည်းခြင်းအပြင် ရှမ်းပြည်တောင်ပိုင်း၌ အခြေစိုက်သည့် Ero, Eao များက တော်လှန်ရေးဘက်မှာ ပူးပေါင်းပါ၀င်မှုမရှိခြင်းကြောင့်ဟု ပြောသည်။
“အထောက်ပံ့အားမကောင်းတော့ ရေရှည်မှာ စစ်ဘက်ကိုအားလျော့ပြီး လွတ်မြောက်လုဆဲဆဲရုန်းကန်နေရတဲ့ ကယားမှာပဲ ခိုကပ်နေနိုင်သွားကြတာမျိုးတွေကြောင့်လို့လည်း ထင်ပါတယ်၊ ရှမ်းတောင်မှာ ရှိတဲ့ EAO တော်တော်များများတွေက အဓိက စစ်တပ်နဲ့ပဲ ပေါင်းသင်း ဆက်ဆံပြီး တော်လှန်ရေးတပ်တွေဘက် သေနတ်ပြောင်းပြန်လှည့်တာမျိုး” ဟု Black Fox Southern Shan Local Defence Force ပြန်ကြားရေးတာဝန်ခံ ကိုဖိုးလုံးကပြောသည်။
SSLRU နိုင်ငံရေးမှူး စိုင်းပန်ဖက “ကျွန်တော်တို့ လိုကယ် အဖွဲ့အနေနဲ့ NUG,MOD ကနေ တိုက်ရိုက်အကူအညီရတာမျိုးတော့ မရှိခဲ့ဖူးဘူး၊ သွယ်ဝိုက်ပြီး ပံ့ပို့မှု ရခဲ့တာမျိုးတွေတော့ ရှိတယ်ဗျ” ဟု SSLRU နိုင်ငံရေးမှူး စိုင်းပန်ဖကပြောသည်။
Black Fox Southern Shan Local Defence Force ကလည်း NUG ၏အထောက်အပံ့မရပဲ ပြည်တွင်း၊ ပြည်ပရှိ အသိမိတ်ဆွေတချို့၏ အကူအညီ အထောက်အပံ့ပေးမှုနှင့် ရုန်းကန်နေရသည်ဟု ပြောသည်။
NUG အနေဖြင့် လက်အောက်ခံ (၁၀၀၉) တပ်ရင်း၊ အင်းလေးပြည်သူ့ကာကွယ်ရေးတပ်ကို ထောက်ပံ့မှုသည် တစ်ကြိမ်လျှင် ကျပ်သိန်း ၁၀၀(သိန်းတစ်ရာ)နှုန်းဖြင့် NUG အသိအမှတ်ပြုပြီးဖြစ်သည့် ၂၀၂၂ ခုနှစ်၊ စက်တင်ဘာမှ ယခုထိ ၂၁ ကြိမ်(ကျပ်သိန်း ၂၁၀၀)ရရှိထားသလို လက်နက်တပ်ဆင်ပေးခြင်း ရှိသော်လည်း တပ်ဖွဲ့အနေဖြင့် လက်နက်လိုအပ်ချက်ရှိနေသည်ဟု (၁၀၀၉) တပ်ရင်း၏ ဘဏ္ဍာရှာဖွေရေးတာဝန်ခံ ကီကီက မဲခေါင်ကို ပြောသည်။
ကုန်ဈေးနှုန်းကြီးခြင်း၊ တပ်သားအင်အားများပြားလာခြင်းကြောင့် NUG ၏ ထောက်ပံ့မှုသည် စားနပ်ရိက္ခာအတွက်ပင် မလုံလောက်ပဲ လက်နက်ခဲယမ်းဝယ်ယူရန် ကိုယ်တိုင်ဘဏ္ဍာရှာဖွေနေရသည်ဟု ပြောသည်။
“လက်နက်အင်အားတွေ ခဲယမ်းအင်အားတွေကျတော့ ရန်သူနဲ့ ဘယ်လိုမှ ယှဉ်လို့မနိုင်ဘူးပေါ့လေ၊ လက်နက်ခဲယမ်းတွေ အရမ်းအားနည်းတယ်၊ အလုံအလောက်မရှိဘူး၊ အဲကြောင့်မို့ ကျွန်မတို့ ရှမ်းတောင်တစ်ခုလုံးကို အတွင်းပိုင်းထိထိုးဖောက်နိုင်ဖို့ဆိုတာ အရမ်းကြီး ခက်ခဲသေးတယ်” သူက ပြောသည်။
NUG လက်အောက်ခံမဟုတ်သည့် Black Fox Southern Shan Local Defence Force ရဲ့ ပြန်ကြားရေးတာဝန်ခံ ကိုဖိုးလုံးကလည်း တော်လှန်ရေးအင်အားစုများတွင် လူသူအင်အား၊ လက်နက်အင်အားနည်းပါးသည့်အပြင် ပူးပေါင်းချိတ်ဆက်လုပ်ဆောင်နိုင်မှု နည်းပါးသဖြင့် ရှမ်းတောင်အတွင်းပိုင်းထိ ထိုးဖောက်ရန်ခက်ခဲနေဆဲဖြစ်သလို ရှမ်းပြည်တောင်ရှိပိုင်းရှိ တိုင်းရင်းသားလက်နက်ကိုင်အဖွဲ့အစည်းအများစုသည် စစ်ကောင်စီနှင့် နီးကပ်သည့် ဆက်ဆံရေးသာရှိပြီး တော်လှန်ရေးအင်အားစုများအနေဖြင့် အားကိုးအားထားနိုင်မည့် ကျောထောက်နောက်ခံ EAO မရှိခြင်းကြောင့်လည်း ဒေသအတွင်းပိုင်းထိ ထိုးဖောက်ရန်ခက်ခဲနေဆဲဖြစ်ကြောင်း သူက ပြောသည်။
ဒေသတွင်းတော်လှန်ရေးတပ်အသီးသီး၌ လိုအပ်ချက်အသီးသီးရှိနေခြင်းကြောင့် ရှမ်းပြည်တောင်ပိုင်းတစ်ခုလုံးကို ဖြန့်ကျက်စိုးမိုးနိုင်းခြင်းမရှိပဲ ကိုယ်စီစိုးမိုးနယ်မြေများ၌သာ ခြေကုတ်ယူလှုပ်ရှားနေကြသည်။
သုဝဏ္ဏခွန်
#MeKongNews
#NUG
#လူအင်အား
#လက်နက်အင်အား
#ချိတ်ဆက်မှု
