ရန်ကုန်တိုင်း၊ မြောက်ဥက္ကလာပမြို့နယ်၊ (ဌ) ရပ်ကွက်၊ ခေမာ (၂) လမ်းမှာရှိတဲ့ နေအိမ် တစ်လုံးကို အမျိုးသား ၄ ဦးက စက်တင်ဘာ ၁၇ နေ့က ဓားပြတိုက်ရာ နေအိမ်အတွင်းရှိ မိသားစုများက ပြန်လည် ခုခံရာက ဓားပြ တစ်ဦး ဖမ်းမိခဲ့တယ်လို့ ရပ်ကွက်နေ ပြည်သူတစ်ဦးက ပြောပါတယ်။
“သူတို့အိမ်မှာက အမျိုးသား နှစ်ယောက် အမျိုးသမီး နှစ်ယောက်ရှိတယ်။ လာတိုက်တဲ့ သူတွေကို ပြန်ချတာ ဓားပြ တစ်ယောက် ပြန်ဖမ်းမိတယ်။ ကိုယ့်လုံခြုံရေး ကိုယ်ယူနေရတာပေါ့ဗျာ” လို့ ၎င်းကပြောပါတယ်။
ယင်းအိမ်နေသူ တစ်ဦး ဈေးသွားဖို့ နေအိမ်တံခါးမကြီးအား ဆွဲဖွင့်စဉ် အမည်မသိ လူ ၄ ဦးမှ ဓားအတို အရှည်များ ကိုင်ဆောင်ကာ “မင်းတို့ မအော်နဲ့ ငြိမ်ငြိမ်နေ အားလုံး သတ်ပစ်မယ်” လို့ ပြောဆိုပြီး ဓားပြ တိုက်ခဲ့တာလို့ သိရပါတယ်။
ဓားပြလာတိုက်သူ လေးဦးကို နေအိမ်တွင်းရှိ မိသားစုတွေက ပြန်လည်ခုခံရာက သက် ၂၃ နှစ်အရွယ် မင်းမင်းသန့် ဆိုသူကို ဖမ်းဆီးရမိခဲ့ပြီး ကျန်သုံးဦးမှာ အသင့်စောင့်နေတဲ့ ကားနဲ့ ထွက်ပြေး လွတ်မြောက်သွားတယ်လို့ ရပ်ကွက်နေ ပြည်သူတစ်ဦးက ပြောပါတယ်။
“သူတို့ မိသားစုလည်း ဓါးဒဏ်ရာ ရတာတော့ရှိတယ်။ မိသားစုက ညီတော့ ဘာမှ မပါသွားဘူး။ အခုက ခိုးမှု လုယက်မှုတွေက နေ့တိုင်း ဖြစ်နေတာ” လို့ ၎င်းကပြောပါတယ်။
ရန်ကုန်မြို့မှာ စစ်တပ် အာဏာသိမ်းပြီးနောက်ပိုင်း လုယက်မှု၊ ဓါးပြမှု၊ ခိုးမှုများစွာ ဖြစ်ပွားနေပေမယ့် ရဲများနဲ့ စစ်သားများက ဖမ်းဆီးနိုင်မှု မရှိဘူးလို့ သိရပါတယ်။
