မဲခေါင်၊ သြဂုတ် ၂၃
ရှမ်းတောင်၊ ကွန်ဟိန်းမြို့နယ်က ဆိုင်မွန်းရွာသူ ရွာသား ၁၉ ဦးဟာ RCSS ထောင်ထားတဲ့မိုင်း ၂လုံး ကို သြဂုတ်လ ၂၀ ရက်က တိုက်မိလို့ သေသူ ၁ ဦးနဲ့ ဒဏ်ရာရသူ ၁၈ ဦး ရှိခဲ့တယ်လို့ SSPP သတင်းစဉ်က ရှမ်းဘာသာနဲ့ဖော်ပြလာပါတယ်။
ကွန်ဟိန်းမြို့နယ်၊ ဆိုင်မွန်းရွာ နဲ့ လိုက်ကမ်ကြား ရွာအရှေ့ဘက် ဟွေအောရွာအနီး လူသွားလမ်းမှာ ဖြစ်တာလို့သိရပါတယ်။
သြဂုတ်လ ၂၀ ရက် မှာ မနက် ၁ဝး၁၅ မှာ ၃ယောက် က ပထမဆုံး မိုင်းထိတာဖြစ်ကာ ၁ ဦး သေဆုံးပြီး ၂ ဦးဒဏ်ရာရခဲ့လို့ ဆိုင်မွန်းရွာကသေဆုံး၊ ဒဏ်ရာရ လူနာတွေကို သွားသယ်ဆောင်တာမှာ မွန်းတည့် ၁၂ နာရီမှာ မိုင်းအကြီး ၁ လုံးထပ်ပေါက်လို့ ကျား ၆ ဦး၊ မ ၁၀ ဦး ဒဏ်ရာရကြတယ်လို့ သိရပါတယ်။
“ဟုတ်တယ်၊ အဲ့စာထဲကအတိုင်းပဲ ၊ အဲ့လမ်းကို လပြည့်နေ့ သွားတုန်းက ဘာမှ မဖြစ်ကြဘူး၊ လပြည့်ကျော် ၁ ရက် ကျောင်းပြန်လူတွေများတဲ့အချိန်မှာ လာထောင်ထားတာ၊ မလုပ်သင့်ဘူးဗျာ၊ ကျေးရွာသူ ကျေးရွာသားတွေ အမြဲသွားနေကျလမ်းတွေ၊ ရွာအနီးဝန်းကျင်တွေ မလုပ်သင့်ဘူး၊ လုပ်တဲ့သူတွေဟာလဲ လူစိတ်မရှိလို့ လုပ်ကြတာဖြစ်မယ်”လို့ ကွန်ဟိန်းမြို့ခံ တစ်ဦးက မဲခေါင်သတင်းဌာနကို ပြောပါတယ်။
ဒဏ်ရာရ လူနာတွေထဲက စိုးရိမ်ရသူ ၁၃ ယောက်ကို ခိုလန်ဆေးရုံကို ပို့ဆောင်ထားပြီး ကျန် ၅ ယောက်ကိုတော့ ဆိုင်မွန်းရွာမှာပဲ ကုသနေတယ်လို့ သိရပါတယ်။
ပြီးခဲ့တဲ့ ဇူလိုင်လ ၂၉ ရက်က အဆိုပါကွန်ဟိန်းနယ်က လိုက်ကမ်နဲ့ နမ့်တွတ်မှာ RCSS နဲ့ SSPP မဟာမိတ်တွေ တိုက်ပွဲဖြစ်ပွားခဲ့တာ ရှိခဲ့ပြီးအခု လိုက်ကမ်နဲ့ ဆိုင်မွန်းရွာကြားမှာ ရွာသူရွာသားတွေ မိုင်းထိကြတာ ဖြစ်ပါတယ်။
MK-012
