နိုင်ငံသားတစ်ဦးချင်းရဲ့ ကိုယ်ရေးအချက်အလက်တွေ မှန်ကန်ဖို့ နိုင်ငံတော်အတွက် အရေးကြီးတာကြောင့် မြေပြင်စာရင်းကောက်ယူရာမှာ ပြည်သူတွေအနေနဲ့ ပူးပေါင်းဆောင်ရွက်ဖို့ လိုအပ်တယ်လို့ ရန်ကုန်တိုင်းဒေသကြီး မြေပြင်ကွင်းဆင်း စာရင်းကောက်ယူရေး ကြီးကြပ်မှုကော်မတီရဲ့ ထုတ်ပြန်ချက်မှာ ပါရှိပါတယ်။
ကောက်ယူရရှိလာတဲ့ လူဦးရေစာရင်းနဲ့ အချက်အလက်တွေကို e-ID Software မှာ ထည့်သွင်းတာကို လာမယ့် ဇန်နဝါရီ ၉ ရက်ကနေ ဖေဖော်ဝါရီ ၁ဝ ရက်နေ့အထိ ဆောင်ရွက်မှာဖြစ်တယ်လို့ ဆိုပါတယ်။
မြေပြင်ကွင်းဆင်းစာရင်း ကောက်ယူရာမှာ စစ်ကောင်စီလက်အောက်ခံ အထွေထွေအုပ်ချုပ်ရေးဦးစီးဌာန၊ ရွေးကောက်ပွဲကော်မရှင်၊ လူဝင်မှုကြီးကြပ်ရေးဦးစီးဌာနနဲ့ လူမှုရေးအသင်းအဖွဲ့တွေက စေတနာ့ဝန်ထမ်းတွေ ပူးပေါင်းဆောင်ရွက်မှာ ဖြစ်တယ်လို့ ဆိုထားပါတယ်။
လာမယ့် ၂၀၂၃ ခုနှစ် အတွင်း ကျင်းပမယ်လို့ စစ်ကောင်စီက ကြေညာထားတဲ့ ရွေးကောက်ပွဲဟာ စစ်အာဏာရှင်စနစ် အသက်ဆက်ဖို့ ကျင်းပမဲ့ အတုအယောင် ရွေးကောက်ပွဲသာဖြစ်လို့ ပြည်သူတွေအနေနဲ့ ဘက်စုံဆန့်ကျင်ကြဖို့ တော်လှန်ရေးအင်အားစုတွေက အကြိမ်ကြိမ် သတိပေး တိုက်တွန်းထားပါတယ်။
