အာရှလမ်းမကြီးပေါ်က တောနော် ရေတံခွန်အနီးရှိ တံတား တစ်စင်း မိုင်းခွဲ ဖျက်ဆီးခံထားရတဲ့ အပြင် ကော့ကရိတ်ဒေသမှာ တိုက်ပွဲတွေဖြစ်နေတာကြောင့် လမ်းပိတ်နေတာဖြစ်ပါတယ်။
ဒီဘက်က အတက်ရော ဟိုဘက်က အဆင်းပါ ပိတ်မိနေတာ။ ပုပ်နိုင်တဲ့ ကုန်တွေကိုဆို ထုတ်ရောင်းနေရတယ်။ ကုန်ခြောက်သမားက နည်းနည်းခံသာသေးတယ်။ တစ်ဖက်နိုင်ငံကို ပို့ရမယ့် ကုန်တွေဖြစ်တဲ့အတွက် ကုန်သွယ်ရေးက နာသထက် နာပြီပဲ။ တိုင်းပြည် မငြိမ်းချမ်းရင် ဒါတွေက ဖြစ်မှာပါပဲ။ အခု ကုန်းလမ်းက မပို့ဘဲ ရေကြောင်းကပို့ဖို့ လုပ်တာတွေတော့ ရှိတယ်။ ကုန်သည်တွေက ငွေလဲနှုန်းကြောင့် တမျိုး၊ အခုလို နိုင်ငံရေးကြောင့်ပါ ဆုံရူံးမှုတွေကြောင့် ပို့ကုန် လုပ်ငန်းရှင်တွေ လုပ်ငန်းရပ်ဆိုင်းမှုတွေ ဖြစ်လာတော့မယ်”
လို့ မြဝတီ နယ်စပ်က ကုန်သည် တဦးက ပြောပါတယ်။
အာရှလမ်း မကြာခဏ ပိတ်ဆို့မှုသာမက ကုန်သွယ်ဖက် နိုင်ငံတွေရဲ့ မူဝါဒ အပြောင်းအလဲ၊ စစ်ကောင်စီ ဗဟိုဘဏ်နဲ့ စီးပွားကူးသန်းရဲ့ ကုန်သွယ်ရေးနဲ့ ငွေလဲနှုန်း မှုဝါဒ သာမက စစ်ကောင်စီတပ်တွေရဲ့ ဂိတ်ကြေး တောင်းခံမှုတွေကြောင့် မြန်မာကုန်သည်တွေ ကုန်ကျစရိတ်များလာလို့ လုပ်ငန်းရပ်ဆိုင်းရမယ့် အခြေအနေနဲ့ ကြုံတွေ့နေရတယ်လို့ သူကပြောပါတယ်။
ထိုင်းကိုပို့ဖို့ ကုန်ကားကြီးတွေနဲ့ တင်လာတဲ့ ဂေါ်ဖီထုပ်တွေ၊ ဂေါ်ဖီပန်းတွေကို ဈေးတွေ အများကြီး လျှော့ပြီး ရောင်းနေရတယ်။ တစ်ပွင့် ၂၀၀ ကျပ်နဲ့။ ကားတွေက ဆက်တက်လို့မရဘဲ ပုပ်မယ့်အတူတူ အလကားနီးပါး ဈေးတွေနဲ့ ရောင်းနေကြရတာပါ။ ကားခလောက်ပဲဖြစ်ဖြစ် ပြန်ရှာတဲ့သဘော
လို့ ကျုံဒိုးမြို့ဒေသခံတစ်ဦးက ဆိုပါတယ်။
လက်ရှိ မြန်မာ-ထိုင်း နယ်စပ်ကုန်သွယ်ရေးက ကုန်ပစ္စည်းတွေ တင်ဆောင်ထားတဲ့ ကုန်တင်ယာဉ်ကြီးတွေနဲ့ ခရီးသည်တင်ယာဉ်တွေ ရောက်ရှိနေတဲ့နေရာမှာ ရပ်တန့်ထားရတယ်လို့ သိရပါတယ်။
