မဲခေါင်၊ ဇန်နဝါရီ ၁၇
ပဲခူးတိုင်း၊ ကျောက်ကြီးမြို့၊ ပဲခူးရပ်ကွက်၊ အပိုင်း (၃) မှ စစ်ကောင်စီခန့် ရာအိမ်မှူး သိန်းလွင်ကို နန်းထိုက်အောင် စစ်ဆင်ရေး အဖြစ် ပစ်ခတ်ခဲ့တယ်လို့ Bago Region PDF က ဒီကနေ့ ထုတ်ပြန်ပါတယ်။
မနေ့က ညနေ ၆ နာရီခန့်မှာ ကျောက်ကြီးမြို့နယ် ပကဖ က နန်းထိုက်အောင် စစ်ဆင်ရေး အဖြစ် ပစ်ခတ် ခဲ့တာလို့ သိရပါတယ်။
အဲဒီ ပစ်ခတ်မှုကြောင့် ဦးသိန်းလွင်မှာ သေနတ်ကျည် ၂ ချက် ထိမှန်ပြီး ဆေးရုံတင်ထားတာကို သိရပြီး နောက်ဆက်တွဲ အခြေအနေကို ထပ်မံ အတည်ပြု စုံစမ်းနေတယ်လို့ ဆိုပါတယ်။
ရာအိမ်မှူး ဦးသိန်းလွင်ဟာ ပြည်သူတွေကို လွန်စွာ ဒုက္ခပေးနေတဲ့ စစ်ကောင်စီရဲ့ အဓိက သတင်းပေးဖြစ်ပြီး စစ်ကောင်စီရဲ့ တရားမဝင် ရွေးကောက်ပွဲ ကျင်းပနိုင်ဖို့ အတွက် လူဦးရေနဲ့ မဲစာရင်းတွေကို တက်ကြွစွာ ကောက်ယူနေသူလည်း ဖြစ်တယ်လို့ သိရပါတယ်။
သူဟာ ပြီးခဲ့တဲ့လ နောက်ဆုံး အပတ်မှာ သိန်တန်းရပ်ကွက်၊ မာလာဦးဂိတ်ကို စစ်ကောင်စီတပ်ဖွဲ့ဝင်တွေ ပိတ်ဆို့ထားစဉ် ရာအိမ်မှူးသိန်းလွင် ရှိတဲ့ လမ်းဘက်က ဖြတ်သန်းသွားလာတဲ့ ပြည်သူတွေရဲ့ ဈေးကုန်ပစ္စည်းတွေကို စစ်ကောင်စီ အားကိုးနဲ့ မတရား အဓမ္မ သိမ်းဆည်းခဲ့သူ ဖြစ်တယ်လို့ သိရပါတယ်။
အဲဒီလို စစ်ကောင်စီရဲ့ အုပ်ချုပ်ရေး ဒေါက်တိုင် ဖြစ်တဲ့အပြင် စစ်ကောင်စီကို သတင်းပေးတာ၊ ပြည်သူကို အနိုင်ကျင့် ဗိုလ်ကျ ခြိမ်းခြောက်တာ၊ တရားမဝင် ရွေးကောက်ပွဲ ကျင်းပဖို့ ပူးပေါင်း ဆောင်ရွက်တာတွေကြောင့် ရာအိမ်မှူးသိန်းလွင်ကို ပစ်ခတ် ရှင်းလင်းခဲ့တာလို့ Bago Region PDF က ဆိုပါတယ်။
ပစ်ခတ်ပြီးနောက် တော်လှန်ရေးတပ်ဖွဲ့ဝင်တွေ ဆုတ်ခွာစဉ် စစ်ကောင်စီဘက်မှ ၁၂၀ မမ နဲ့ ပစ်ခတ်ရာ ကျေးရွာ တွေဘေးသို့ ကျရောက် ပေါက်ကွဲပြီး ကျေးရွာသား တစ်ဦး မျက်လုံး ထိခိုက်ခဲ့ကာ တော်လှန်ရေးတပ်ဖွဲ့ဝင်တွေ အောင်မြင်စွာ ဆုတ်ခွာနိုင်ခဲ့တယ်လို့ သိရပါတယ်။
MK-003
