မဲခေါင်၊ မတ် ၇
စစ်ကောင်စီလက်အောက်ခံ PNO ပြည်သူ့စစ်က မောက်မယ်မြို့နယ်၊ ကဒူးကြီးဒေသသို့ ထိုးစစ်ဆင်သည့် ကာလအတွင်း ပအိုဝ်းကျေးရွာ ၄ ရွာကို မီးရှို့ဖျက်ဆီးခဲ့ကြောင်း မဲခေါင်းသတင်းဌာနက ကောက်ယူရရှိသည့် စာရင်းအရ သိရသည်။
ကဒူးကြီးဒေသသို့ စစ်ကြောင်းထိုးမှုအတွင်း PNOပြည်သူ့စစ်က မီးရှို့ဖျက်ဆီးလိုက်သည့်ရွာများမှာ ခိန်နန်ကျေးရွာ၊ ဟမ်ဗွာကျေးရွာ၊ ဗန်းမတ်ရွာသစ်(စစ်ဘေးရှောင်ရွာ) နှင့် ပနားပန်ကျေးရွာတို့ ဖြစ်ကြောင်း၊ ယင်းအရေအတွက်မှာ ပအိုဝ်းကျေးရွာ ၁၂ ရွာရှိသည့် ကဒူးကြီးဒေသတွင် ၃ပုံ ၁ပုံမီးရှို့ခံလိုက်ရခြင်းဖြစ်ကြောင်း ဒေသခံသတင်းရင်းမြစ်များက ပြောသည်။
“အဲ့ဒီကျေးရွာ၄ရွာကတော့ လုံးဝကို ပျက်စီးသွားပြီဖြစ်လို့ လူထုလည်း ပြန်နေတာတွေ မရှိတော့တဲ့အခြေအနေပါ။ အဲ့ဒီဒေသခံတွေက ၅၀၀ လောက်ရှိမယ် ထင်တယ်။ တောထဲကို ပြောင်းရွေ့နေသူတွေရှိသလို ရေကြည်ရာ၊ မြက်နုရာ ပြောင်းရွေ့တာလည်းရှိပါတယ်။ အဆက်အသွယ်မရကြတော့ပါဘူး”ဟု ခိန်နန်ဒေသခံတစ်ဦးကပြောသည်။
ကဒူးကြီးဒေသကို ထိုးစစ်ဆင်လာသည့် PNO သည် ခိန်နန်ကျေးရွာကို ဇန်နဝါရီလ ၁ ရက်နေ့တွင်လည်းကောင်း၊ ဟမ်ဗွာကျေးရွာကို ဖေဖော်ဝါရီလ ၁၂ရက်နေ့တွင်လည်းကောင်း၊ ဗန်းမတ်ရွာသစ်ကို ဖေဖော်ဝါရီလ ၁၃ရက်တွင်လည်းကောင်း မီးရှို့ဖျက်ဆီးခဲ့ခြင်းဖြစ်ပြီး ပနားပန်ကျေးရွာကိုမူ ပြီးခဲ့သည့် ၂၀၂၅ ခုနှစ်အတွင်းတွင် PNOက မီးရှိုခဲ့ခြင်းဖြစ်ကြောင်း မဲခေါင်သတင်းဌာနမှ စုံစမ်းသိရသည်။
“ဟမ်ဗွာရွာကတော့ မီးမလောင်တာ ၈အိမ်လောက်ပဲကျန်တယ်။ ကျန်တဲ့ ရွာ ၃ ရွာကတော့ ပြာဖြစ်ကုန်ပြီ။ ရွာပျက်တွေဖြစ်ကုန်ပြီ” ဟု ဒေသခံသတင်းရင်းမြစ်က ပြောသည်။
PNO ပြည်သူ့စစ်က မီးရှို့ဖျက်ဆီးလိုက်သည့် ယင်းပအိုဝ်းကျေးရွာ ၄ ရွာသည် စုစုပေါင်း အိမ်ခြေ ၁၀၀ကျော် လူဦးရေ ၅၀၀ ခန့်ရှိပြီး ဟမ်ဗွာကျေးရွာ ဘုန်းကြီးကျောင်းလည်း မီးလောင်ပျက်စီးကာ ကျောင်းထိုင်ဆရာတော်ကိုလည်း PNOပြည်သူ့စစ်က အတင်းအဓမ္မပြောင်းရွေ့စေခဲ့ကြောင်း ဒေသခံများထံမှ သိရသည်။
“အဲ့ရွာ ၄ ခုမှာ ဟမ်ဗွာရွာကတော့ ဘုန်းကြီးကျောင်းရှိတယ်။ စာသင်ကျောင်းလည်းရှိတယ်။ PNOတွေ ဝင်လာပြီးတော့ ဆရာတော်ကိုပါ မောင်းထုတ်လို့ ဆရာတော်လည်း ဇာတိရွာကို ပြန်ကြွသွားပြီ”ဟု ဒေသခံသတင်းရင်းမြစ်တစ်ဦးက ပြောသည်။
ထို့ပြင် PNO တပ်ဖွဲ့များက ပြည်သူလူထုအား အတင်းအဓမ္မဖမ်းဆီးကာ လူသားဒိုင်းပြုလုပ်ခြင်း၊ ပြည်သူပိုင် မြင်း၊ ကျွဲ၊ နွား၊ ကြက်၊ ဝက်များကိုလည်း သတ်ဖြတ်စားသောက်ခြင်းများလည်း ပြုလုပ်ခဲ့ကြောင်း ဒေသခံများထံမှ သိရသည်။
မဲခေါင်သတင်းဌာနက ကောက်ယူရရှိသည့် စာရင်းအရ PNOပြည့်သူ့စစ်သည် ခိန်နန်ဒေသခံတစ်ဦးပိုင်ဆိုင်သည့် မြင်တစ်ကောင်၊ ကျွဲ ၂ ကောင်၊ ပနားပန်ဒေသခံများပိုင်သည့် ကျွဲ ၈ ကောင်၊ ဒုံပုံးရွာသားများပိုင်သည့် ကျွဲ ၄ ကောင်ကို ဖမ်းဆီးသတ်ဖြတ်ကြောင်း သိရသည်။
မတ်လ ၄ ရက်နေ့တွင်ပင် တောထဲလွတ်ထားသည့် ကျွဲများကို လိုက်ရှာနေသည့် ဒုံပုံးရွာသား ၃ ဦးကို PNO ပြည်သူ့စစ်က ဖမ်းဆီးကာ ၂ ဦးကို ပစ်သတ်ပြီး ကျန် ၁ ဦးကို ငွေ ၂၈ သိန်းဖြင့် ပြန်လည်းရွေးခိုင်းခဲ့သည်။
စစ်ကောင်စီလက်အောက်ခံ PNO ပြည်သူ့စစ်သည် ၁၉၉၁ ခုနှစ်တွင် ခင်ညွှန့်ဦးဆောင်သည့် စစ်ထောက်လှမ်းရေးထံ လက်နက်ချခဲ့ပြီး ၂၀၀၉ ခုနှစ်တွင် စစ်တပ်လက်အောက်ခံ ပြည်သူ့စစ်အဖွဲ့ ပြောင်းလဲဖွဲ့စည်းခဲ့သည်။ ပြည်သူ့စစ်အဖြစ် ပြောင်းလဲဖွဲ့စည်းပြီးနောက် PNOသည် စစ်တပ်နှင့်ပူးပေါင်းကာ တော်လှန်ရေးတပ်ဖွဲ့များအား ယနေ့တိုင်အထိ တိုက်ခိုက်နေဆဲဖြစ်သည်။
#MeKongNews
#ကဒူးကြီး
#PNO
#ပြည်သူ့စစ်
#ရွာမီးရှို့မှု
#မောက်မယ်
