မဲခေါင်၊ ဒီဇင်ဘာ ၂၃
ရှမ်းပြည်တောင်ပိုင်းဒေသများဖြစ်သည့် ကလော၊ ရွှေညောင်၊ မိုင်းပွန်မြို့နယ် တို့ရှိ ဂိတ်များတွင် ရှမ်းပြည်တောင်ပိုင်း၊ အမှတ်(၁၁၇) ဒုတိယ ယာဉ်ထိန်းရဲတပ်ဖွဲ့ ရဲမှူးမိုးကျော်ဟိန်းနှင့် တပည့်များက ကုန်ကားနှင့် ဒေသခံ ကားသမားများထံမှ ငွေတောင်းကြမ်းနေကြောင်း သတင်းရင်းမြစ်များက ပြောသည်။
ရွှေညောင်မြို့နယ် ရေဦးဂိတ်၊ ကလောမြို့နယ်တွင် နန်းပန်တက်ဂိတ်၊ ဟဲဟိုးမြို့နယ်တွင် သံတွဲဂိတ်၊ ဘော်ဆိုင်း၊ ရန်နောင်၊ မိုင်းပွန်ဂိတ် များတွင် ရဲမှူးကျော်ဟိန်းက ၎င်းအတွင် ငွေရှာပေးနိုင်သည့် တပည့်များကို ချထားပေးပြီး ငွေတောင်းခိုင်းခြင်းဖြစ်ကြေင်း သတင်းရင်းမြစ်များက ပြောသည်။
“တပည့်တပ်ကြပ်ကြီးရေဦးဆိုလည်း ရွှေညောင်ရပ်စောက်လမ်းခွဲမှာ မနက်၆နာရီကနေ ညနေ၆နာရီအထိ ငွေတောင်းခိုင်းတယ်။ ပြီးရင် ရဲမှူးမိုးကျော်ဟိန်းက သူ့ကို ပိုက်ဆံမပေးနိုင်တဲ့ တပ်ဖွဲ့ဝင်တွေဆို တစ်နေရာကနေ နောက်တနေရာကို ပြောင်းရွှေ့လုပ်လိုက်တယ်။ သူငွေတောင်းနေတာတွေကိုလည်း ဘယ်နေရာတိုင်တိုင် ငါကရဲချုပ်ကို ခါးပိုက်ထဲထည့်ထားတာ ဂရုမစိုက်ဘူးဆိုပြီး ကြွေးကြော်တယ်” ဟု သတင်းရင်းမြစ်တစ်ဦးက မဲခေါင်သို့ပြောသည်။
ရဲမှူး မိုးကျော်ဟိန်းသည် ယာဉ်ထိန်းရုံးမှ ဖမ်းဆီးထားသော ဆိုင်ကယ်များကိုလည်း ၎င်းကိုယ်ကျိုးအတွက် အသုံးချပြီး ၎င်း၏ တပည့်များက သက်ဆိုင်ရာ အိမ်အထိ သွားရောက်ပို့ဆောင်ပေးနေကြောင်း သတင်းရင်းမြစ်များက ဆိုသည်။
ထို့အပြင် မိုင်းပွန်၊ နန်းပန်တက်ဂိတ်မှ ကုန်ကားများကိုလည်း မကြာခဏဖမ်းဆီးလေ့ရှိပြီး ပြန်လည်ရွေးယူသည့်အခါ ရဲမှူး မိုးကျော်ဟိန်းနှင့် ပြောရကြောင်း ကုန်ကားမောင်းသူများက ပြောသည်။
“ဖမ်းဆီးခံရတဲ့ကားဆို သူနဲ့ရှင်းရတယ်။ သူနဲ့ပြောရဖို့ဆိုလည်း တစ်ခါတစ်လေ ၁၀ရက်၊ တစ်ပတ်စောင့်ရတယ်။ ကားဖမ်းခံရပြီဆို ပိုက်ဆံ သိန်းဆယ်ချီပေးပြီး ပြန်ရွေးရတယ်။ ငွေတောင်းအရမ်းကြမ်းတယ်။ ကုန်ကားတွေဆို အပြစ်မရှိ၊ ကန့်သတ် ကုန်ပစ္စည်း မပါလည်း သူတို့ဖမ်းချင်ရင် ဖမ်းတယ် ငွေညစ်ချင်ရင်ညစ်တယ်။ ဆိုးဆိုးရွားရွားဘဲ”ဟု ကုန်ကားမောင်းသူတစ်ဦးက မဲခေါင်သို့ပြောသည်။
ယခုရက်ပိုင်းအတွင်း ရဲမှူးမိုးကျော်ဟိန်းက ရဲချုပ်၊ မှုခင်းရဲတပ်ဖွဲ့-CID တို့ထံ ပိုက်ဆံပေးထားပြီး လိုင်စင်မဲ့ ကား၊ ဆိုင်ကယ်များကို ၂ဆတိုးကာ ၎င်း၏တပည့်များကို ဖမ်းခိုင်နေကြောင်းလည်း သတင်းရင်းမြစ်များက ပြောသည်။
စစ်ကောင်စီ ဒုဥက္ကဌမှ တရားမဝင်ကုန်စည်များ ဖမ်းဆီးရန် ညွှန်ကြားပြီးနောက်ပိုင်း တောင်ကြီးတွင် ဟိုပုံး၌ ကုန်တင်ကားကြီးများ စီးရေရာချီကို ဖမ်းဆီးခြင်းနှင့် တောင်ကြီးမြို့ပေါ်၌ ကား၊ ဆိုင်ကယ်များ စီးရေ ရာချီ၊ ထောင်ချီဖမ်းဆီးပြီး ယခုလို ယာဥ်ထိန်းများမှ ကိုယ်ကျိုးရှာ လုပ်စားနေကြခြင်းဖြစ်သည်။
#MeKongNews
#တောင်ကြီးမြို့နယ်
#ယာဉ်ထိန်းရဲ
#လိုင်စင်မဲ့ယာဉ်
#ရဲမှူးမိုးကျော်ဟိန်း
