မဲခေါင်၊ စက်တင်ဘာ ၂၁
ရှမ်းပြည်နယ် တောင်ပိုင်း၊ တောင်ကြီးမြို့နယ်၊ အေးသာယာမြို့မှာ ပြည်ထောင်စု လမ်းမကြီး ပြုပြင်နေရာ ဆိုင်ခန်းတွေ လမ်းမထက် အဆမတန် မြင့်တက်သွားတာကြောင့် အခက်တွေ့နေရတယ်လို့ ဆိုင်ခန်း ပိုင်ရှင်တွေက ပြောပါတယ်။
စစ်ကောင်စီ လက်အောက်ခံ လမ်းဦးစီးဌာနက ဇွန်လပိုင်းက စတင်ပြီး လမ်းပြုပြင်နေရာမှာ လက်ရှိ ဆိုင်ခန်းတွေ ၆ ပေကနေ ၁၀ ပေ၀န်းကျင် အထိ မြင့်တက်သွားလို့ ဈေးဝယ်သူတွေ အခက်အခဲ ဖြစ်နေတယ်လို့ ဆိုပါတယ်။
“ဘယ်လို စိတ်ကူးနဲ့ လုပ်တာလဲတော့ မသိဘူး။ စစ်ကောင်စီရဲ့ စီမံခန့်ခွဲမှု အလွဲတွေပေါ့။ လူတစ်ရပ်ကျော် မြင့်သွားတော့ လှေကား ထောင်ထားရတယ်။ ဈေးဝယ်တွေကလည်း တချို့ မတက်ရဲဘူး။ လှေကားက ယာယီ ဆိုတော့လေ။ အရင်ကဆို ဈေးလာမဝယ်ရင်တောင် ဝင်ကြည့်ကြတယ်လေ။ အခုက အဲလိုကို လာကြည့်တဲ့သူ မရှိတော့တာ” လို့ ဆိုင်ဖွင့်လှစ်ထားသူ တစ်ဦးက ပြောပါတယ်။
လက်ရှိ လမ်းဖောက်လုပ်မှု မပြီးသေးလို့ ဆိုင်ခန်းတွေမှာ ယာယီလှေကား ထောင်ထားပြီး မိုးရွာတဲ့ ရက်တွေမှာ ဈေးဝယ်သူတွေ လှေကားအမြင့်တက်ဖို့ ခက်ခဲတာကြောင့် ဈေးဦးမပေါက်တဲ့ ရက်တွေ ရှိတယ်လို့ သူက ဆက်ပြောပါတယ်။
ဒါ့အပြင် လမ်းပြုပြင်ပြီးနောက် မြောင်းဖောက်တာနဲ့ လှေကားလုပ်ရတဲ့ ကုန်ကျစရိတ်တွေ ရှိလာနိုင်တာကြောင့် ငွေကြေး ကုန်ကျမှု များနိုင်တယ်လို့ ဆိုပါတယ်။
“သူတို့က မြေတွေကိုတော့ တူးလိုက်ပြီ။ ဒါပေမယ့် ကတ္တရာ ချက်ချင်း မခင်းနိုင်သေးတော့ မိုးရွာရင် ရုပ်ပျက်ဆင်းပျက်ပဲ။ ဆိုင်ကယ်မှောက်သူတွေနဲ့ ဗွက်တွေနဲ့လေ။ အရင်အစိုးရတုန်းက လမ်းခင်းရင် ဘာမှကို မသိလိုက်ရဘူး။ အခု သူတို့ လက်ထက်ကျမှ အကုန်တလွဲတွေ ဖြစ်နေတာ” လို့ ဈေးသည် တစ်ဦးက ပြောပါတယ်။
အဲဒီ လမ်းပြုပြင်တဲ့ စီမံကိန်းကို ပြည်ထောင်စု လမ်းမကြီး တစ်လျှောက် ဖောင်တော်ပေါက် ဒေသအထိ ဆောင်ရွက်မှာ ဖြစ်ပြီး လမ်းတစ်ဖက် တစ်ချက်မှာ ဆိုင်ခန်းပေါင်း ၂၀၀ ကျော်ရှိတယ်လို့ သိရပါတယ်။
CJ-007