မဲခေါင်၊ စက်တင်ဘာ ၆

ရှမ်းပြည်နယ် တောင်ပိုင်းရှိ ဓနုကျေးရွာတွေမှာ ဓနုပြည်သူ့လွတ်မြောက်ရေးတပ်-DPLF က စည်းရုံးရေးဆင်းတယ် ဆိုတဲ့ အကြောင်းပြချက်နဲ့ စစ်ကောင်စီတပ်က ရွာသားတွေကို ရိုက်နှက်ပြီး ရွှေထည်နဲ့ ဖုန်းတွေ ခိုးသွားတယ်လို့ ဒေသခံတွေက ပြောပါတယ်။

ရပ်စောက်မြို့နယ်၊ ကျောက်ဂူကျေးရွာအုပ်စုရှိ ဓနုကျေးရွာတွေ ဖြစ်တဲ့ ဖက်ရင်းကုန်း၊ မဲကြား၊ ပုန်းအင်း၊ ထမင်းပေါင်း၊ တောင်းခမ်း၊ ကျောက်မီးခတ် အစရှိတဲ့ ရွာတွေမှာ ဓနုပြည်သူ့လွတ်မြောက်ရေးတပ်-DPLF က စည်းရုံးရေး ဆင်းတယ်ဆိုပြီး စစ်ကောင်စီတပ် အင်အား ၁၀၀ ခန့်က စက်တင်ဘာ ၄ ရက်နေ့က ရွာထဲ ဝင်မွှေသွားတယ်လို့ ဆိုပါတယ်။

ဒေသခံ တစ်ဦးက “ပုန်းအင်းရွာကိုလာပြီး ရွာက လူအားလုံး ဘုန်းကြီးကျောင်းမှာ လူစုခိုင်းပြီး လူစုနေချိန်မှာ စစ်သားတွေက ရွာထဲ၀င်မွှေပြီး ရွှေနဲ့ဖုန်းတွေ ယူသွားတယ်။ ရွာသားတွေကိုလည်း ရိုက်နှက်တာတွေ လုပ်ခဲ့တယ်” လို့ ပြောပါတယ်။

အရိုက်ခံရတဲ့ ပုန်းအင်းရွာသား ၄ ဦး မစိုးရိမ်ရတဲ့ ဒဏ်ရာရရှိပြီး လက်စွပ် ၂ ကွင်း၊ နားကပ်တစ်ရံနဲ့ ဖုန်း ၅ လုံးကို စစ်ကောင်စီတပ်သားတွေ ခိုးယူသွားတယ်လို့ ဆိုပါတယ်။

စစ်ကောင်စီတပ်သားတွေ ခိုးသွားတဲ့ ပစ္စည်းတွေကို ပုန်းအင်းရွာသားတွေက စက်တင်ဘာ ၅ ရက်နေ့မှာ ပြန်တောင်းရာ စစ်ကောင်စီ စစ်ကြောင်းမှူးက ပစ္စည်းတန်ဖိုး ငွေကျပ် ၅ သိန်း လျော်ပေးတယ်လို့ ဆိုပါတယ်။

“စစ်ကြောင်းမှူးက သူ့တပ်သားတွေကို ရွာက ပစ္စည်း ခိုးရမလားဆိုပြီး လူရှေ့မှာ ဆူပြီးရိုက်တယ်။ ဖုန်း ၅ လုံးအတွက် ငွေ ၅ သိန်း ပြန်ပေးလာတယ်” ဒေသခံ တစ်ဦးက ပြောပါတယ်။

ပုန်းအင်းကျေးရွာမှာ အိမ်ခြေ ၈၀ ခန့်ရှိပြီး ရွာထဲကို ဝင်ရောက်လာတဲ့ စစ်ကောင်စီတပ်သားတွေမှာ တပ်ရင်း အမှတ်မပါဘဲ စုပေါင်းတပ် ဖြစ်တယ်လို့ သတင်းရင်းမြစ်တွေဆီက သိရပါတယ်။

လက်ရှိမှာ စစ်ကောင်စီတပ်သား အင်အား ၅၀ ခန့် ပုံးအင်း ဘုန်းကြီးကျောင်းမှာ တပ်စွဲထားပြီး ကျန်တဲ့ အင်အားက ဝါးပြားကျေးရွာ၊ လွယ်ဟောင်ကျေးရွာဘက် ထွက်သွားတယ်လို့ ဒေသခံတွေက ဆိုပါတယ်။

စက်တာဘာ ၄ ရက်၊ ညနေကလည်း စစ်ကောင်စီတပ်က ကျောက်ဂူကျေးရွာအုပ်စု အုပ်မှူးနဲ့ ကျေးရွာလူကြီးကို ကျောက်ဂူစခန်းကို ခေါ်ပြီး သေနတ်သံကြားရင် ကျေးရွာကို လေယာဉ်ခေါ်ပြီး ဗုံးကြဲမယ်လို့ ခြိမ်းခြောက် ပြောဆိုတယ်လို့ သတင်းရင်းမြစ်တွေက ဆိုပါတယ်။

ဓနုပြည်သူ့လွတ်မြောက်ရေး တပ်ဦး – Danu People’s Liberation Front ကို ပြီးခဲ့တဲ့ ဇူလိုင်လ ၂၉ ရက်နေ့က ဓနုကိုယ်ပိုင်အုပ်ချုပ်ခွင့်ရဒေသ အတွင်း ဖွဲ့စည်းပြီးဖြစ်ကြောင်း ကြေညာခဲ့တာပါ။

အဲဒီလို ကြေညာပြီး နောက်ပိုင်း စစ်ကောင်စီတပ်က ရှမ်းပြည်နယ် တောင်ပိုင်းရှိ တော်လှန်ရေး တပ်ဖွဲ့တွေ လှုပ်ရှားနိုင်တဲ့ နေရာတွေမှာ စစ်ကြောင်းထိုးမှုတွေ ပြုလုပ်လာတာလို့ သတင်းရင်းမြစ်တွေက ပြောပါတယ်။

CJ-012

#MeKongNews

#DPLF

#ကျောက်ဂူကျေးရွာအုပ်စု

#ဓနုကိုယ်ပိုင်အုပ်ချုပ်ခွင့်ရဒေသ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)