မဲခေါင်၊ အောက်တိုဘာ ၉

အမျိုးသားညီညွတ်ရေး အစိုးရ၊ ကာကွယ်ရေးဝန်ကြီးဌာန၊ အလယ်ပိုင်းတိုင်း စစ်ဒေသ အမှတ် (၃)၊ ရှမ်းတောင် အခြေစိုက် အမှတ် (၁၀၀၈) တပ်ရင်းက ၄၀ မမ လောင်ချာနဲ့ ဗုံးသီးတွေ ထုတ်လုပ်နေပြီလို့ ဒီကနေ့ ထုတ်ပြန်ပါတယ်။

ယခင် တွင်ခုံ ဆရာတွေအဖြစ် အသက်မွေးခဲ့တဲ့ တပ်ရင်း ရဲဘော်တွေ အကူအညီနဲ့ ထုတ်လုပ်နိုင်ခဲ့တဲ့ ၄၀ မမ လောင်ချာဟာ မီတာ ၃၅၀ အထိ ပစ်ခတ်နိုင်ပြီး ဗုံးသီးကတော့ ၂၅ ပေ ပတ်၀န်းကျင်ကို သက်ရောက်နိုင်တဲ့ ပေါက်ကွဲအား ရှိတယ်လို့ ဆိုပါတယ်။

“လောင်ချာက အစစ်နီးပါး အဆင်ပြေသလို ဗုံးသီးကလည်း ၉၅ ရာခိုင်နှုန်း စမ်းသပ်အောင်မြင် ပြီးစီးနေပါပြီ။ ကျနော်တို့ လောင်ချာဆိုရင် ခပ်ဝေးဝေးကနေ ပစ်ကူပေးနိုင်လို့ စကစ (စစ်ကောင်စီ) အထိုင်တပ်တွေကို ပစ်ခတ်နိုင်ပါတယ်။ လက်ရှိမှာ လောင်ချာ ၆ လက်၊ တိုက်ပွဲ တစ်ခုမှာ တစ်လက်က ပျက်သွားတော့ ၅ လက်ပဲ ကျန်တော့တယ်။ ဗုံးသီးကတော့ ၁၀၀ ကျော် ထုတ်ပြီးပါပြီ” လို့ (၁၀၀၈) တပ်ရင်း တာဝန်ရှိသူ တစ်ဦးက မဲခေါင်သတင်းဌာနကို ပြောပါတယ်။

ဒီ ၄၀ မမ လောင်ချာနဲ့ ဗုံးသီး ထုတ်လုပ်ဖို့ ၂၀၂၂ ခုနှစ်၊ ဇန်နဝါရီလ ကတည်းက ကြိုးစားခဲ့တာဖြစ်ပြီး ကုန်ကြမ်း နေရာမျိုးစုံက ရှာဖွေ ဝယ်ယူကာ နည်းပညာကို မဟာမိတ်တပ်တွေထံက ရယူပြီး တပ်ဖွဲ့က တွင်ခုံဆရာတွေ တစ်နှစ်ကျော် စမ်းသပ် ထုတ်လုပ်ခဲ့ရတယ်လို့ ဆိုပါတယ်။

ထုတ်လုပ်မှု ကုန်ကျစရိတ်ကို တပ်ရင်းငွေနဲ့ အသုံးပြုရတာကြောင့် အကန့်အသတ်ရှိနေကာ ဆက်လက် ထုတ်လုပ်ဖို့ ဘဏ္ဍာငွေ အခက်အခဲ ရှိနေတယ်လို့ သိရပါတယ်။ ဒါ့အပြင် အခြား အမျိုးအစား လက်နက်တွေ ထုတ်လုပ်နိုင်ဖို့ အစီအစဉ် ရှိသလို၊ ပညာရှင်တွေ ရှိတယ်လို့ ဆိုပါတယ်။

“လက်ရှိ အခက်အခဲကတော့ ထုတ်လုပ်ရေးကို ဆက်လက် လုပ်ဆောင်ဖို့ကတော့ ပြည်ပက ထောက်ပို့ အဖွဲ့တွေနဲ့ အလှူရှင်တွေက အားစိုက်ထုတ်ပြီး ကူညီလှူဒါန်းပေးမယ်ဆို ပိုထုတ်လုပ်နိုင်မှာပါ။ ပြည်တွင်းက ရှမ်းတောင်ပိုင်း ပေါ့နော်။ ပါဝင်မှု အားနည်းနေလို့ ပိုမိုပြီး ပါဝင်လှူဒါန်း ကူညီပေးကြဖို့ ပြောချင်ပါတယ်” လို့ လက်နက် ထုတ်လုပ်ရေးမှာ ပါဝင်တဲ့ ရဲဘော် တစ်ဦးက ပြောပါတယ်။

(၁၀၀၈) တပ်ရင်း အနေနဲ့ စစ်ကောင်စီ ထိန်းချုပ်ထားတဲ့ ရှမ်းတောင်ကို ဝင်ရောက်နိုင်ဖို့ ဦးတည် ကြိုးစား နေတာကြောင့် ပြည်တွင်း၊ ပြည်ပ၊ ရှမ်းတောင်က ပြည်သူတွေ သာမက NUG အစိုးရ၊ ကာကွယ်ရေးဌာန(MOD) အနေနဲ့ လောင်ချာ တစ်လက်ဖိုးဖြစ်စေ၊ ဗုံးသီး တစ်လုံးစာဖြစ်စေ ထောက်ပံ့ပေးကြဖို့ တောင်းဆိုထားပါတယ်။

CJ-001

#MeKongNews

#1008Infantary

#၁၀၀၈တပ်ရင်း

#ရှမ်းတောင်

#လက်နက်ထုတ်လုပ်

#၄၀မမ

#လောင်ချာ

#ဗုံးသီး

#MOD

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)