မဲခေါင်၊ ဩဂုတ် ၁၇
ကရင်နီပြည်နယ်၊ ဒီးမော့ဆို အနောက်ခြမ်းက စစ်ဘေးရှောင် ကလေးငယ် ၁,၂၀၀၀ ကျော် ပညာသင်ကြားဖို့ အခက်အခဲတွေနဲ့ ရင်ဆိုင်နေရတယ်လို့ ဒီးမော့ဆိုမြို့နယ် ပညာရေးဘုတ်အဖွဲ့ တာ၀န်ရှိသူ တစ်ဦးက မဲခေါင်သတင်းဌာနကို ပြောပါတယ်။
၂၀၂၁ ခုနှစ် နှောင်းပိုင်းကစပြီး ဒီးမော့ဆို အရှေ့ခြမ်းမှာ ပြင်းထန်လာတဲ့ တိုက်ပွဲတွေကြောင့် သောင်းနဲချီတဲ့ ဒေသခံ ပြည်သူတွေ လက်ရှိအချိန်ထိ နေရပ် မပြန်နိုင်သေးဘဲ ဒီးမော့ဆို အနောက်ခြမ်းမှာ စစ်ဘေး တိမ်းရှောင်နေရတာ ဖြစ်ပါတယ်။
ဒီလို နေရပ်စွန့်ခွာ ထွက်ပြေးနေရပေမဲ့ ကလေးငယ်တွေ ပညာတတ်မြောက်စေဖို့ တိုက်ပွဲတွေ ကြားမှာ ပညာသင်ကြားနိုင်ဖို့ ခက်ခက်ခဲခဲ လုပ်ဆောင်နေတာ ဖြစ်တယ်လို့ ဆိုပါတယ်။
“ကလေးငယ်တွေ ပညာတတ်မြောက်ဖို့ တိုက်ပွဲတွေ ဖြစ်နေတဲ့ ကြားကနေ ကျွန်တော်တို့ ကြိုးစားလုပ်ဆောင် နေပါတယ်။ လောလောဆယ်တော့ စစ်ရှောင် ကလေးငယ် ၁,၂၀၀၀ ၀န်းကျင်လောက်ကို ပညာသင်ကြား ပေးနေပါတယ်။ ခက်ခဲမှုတွေတော့ ရှိနေဆဲပါပဲ”လို့ ပညာရေးဘုတ်အဖွဲ့ တာ၀န်ရှိသူက ရှင်းပြပါတယ်။
လက်ရှိ စစ်ရှောင် ကလေးတွေအတွက် ယာယီ စာသင်ကျောင်းလေးတွေ ပြုလုပ်ပြီး တတ်နိုင်သလောက် ပညာရေးနဲ့ အဆက်မပြတ်စေဖို့ ကြိုးစားနေတယ်လို့ ဆိုပါတယ်။
ဒါပေမဲ့ စစ်ကောင်စီက ဒီးမော့ဆို အနောက်ခြမ်း စစ်ရှောင်တွေ နေထိုင်တဲ့ ကျေးရွာတွေ၊ ယာယီ စာသင်ကျောင်းနဲ့ ယာယီ ဆေးရုံတွေကို လက်နက်ကြီးနဲ့ ပစ်ခတ်တာ၊ လေကြောင်းကနေ ဗုံးကြဲ တိုက်ခိုက်တာတွေကြောင့် ထင်သလောက် ခရီးမပေါက်ဘူးလို့ စစ်ရှောင် ကလေးတွေကို သင်ကြားပေးနေတဲ့ ဆရာ တစ်ဦးက ပြောပါတယ်။
“စစ်ရှောင် ကလေးငယ်တွေကို စာသင်ကြားပေးနေတယ် ဆိုပေမဲ့ စစ်ကောင်စီရဲ့ အကြမ်းဖက်မှုတွေကြောင့် နေရာ မကြာခဏ ရွှေ့ပြောင်းရ၊ သင်ခန်းစာတွေနဲ့ အဆက်ပြတ်သွားတာ၊ ဒီလို အခြေအနေတွေက ဖြေရှင်းဖို့ ခက်ပါတယ်။ ထင်သလောက် ခရီးမပေါက်ဘူးပေါ့ဗျာ။ ဒါပေမဲ့လည်း ပညာသင်ကြားရေးက အရေးကြီးတာဖြစ်လို့ ရသလောက် သင်ယူနိုင်အောင် လုပ်နေကြတာပါ” လို့ သူကရှင်းပြပါတယ်။
နိုင်ငံတကာ အဆင့်မှီ သင်ရိုးတွေ အသုံးပြု သင်ကြားပေးနေပေမဲ့ ရန်ပုံငွေ အားနည်းတာ၊ စာရေးကိရိယာ မလုံလောက်တာတွေကြောင့် ကျောင်းသား ၅ ဦးကို ဖတ်စာအုပ် တစ်အုပ် ရနိုင်ဖို့ မလွယ်ကူတဲ့ အနေအထား ဖြစ်တယ်လို့ ဆိုပါတယ်။
လက်ရှိ ဆရာ၊ ဆရာမ ဦးရေ ၁,၀၀၀ နီးပါးသာ ရှိတဲ့အတွက် ကျောင်းသား ဦးရေနဲ့ အတန်း အများအပြားကို တာ၀န်ယူထားရကာ မအားမလပ် ကြိုးစား သင်ကြားနေကြရတယ်လို့ သိရပါတယ်။
ပြည်သူတွေ အနေနဲ့လည်း လက်ရှိ နိုင်ငံရေး၊ စစ်ရေး အခြေအနေတွေအရ ကာကွယ်ရေးဘက်ကို ဦးစားပေး ထောက်ပံ့နေတာကြောင့် ပညာရေးဆိုင်ရာ လိုအပ်တဲ့ ရန်ပုံငွေ မရရှိလို့ ကလေးငယ်တွေ လိုအပ်တဲ့ သင်ထောက်ကူ ပစ္စည်းတွေ မလုံမလောက် ဖြစ်နေတယ်လို့ ဒီးမော့ဆို ပညာရေး ဘုတ်အဖွဲ့ တာ၀န်ရှိသူက ဆိုပါတယ်။
“အဓိက လိုအပ်တာတော့ စာရေးကိရိယာ လိုတယ်။ ပထမ ဦးစားပေး အချက်ပေါ့။ ဒုတိယကတော့ ကလေး တွေကို စေတနာ အရင်းခံပြီး စာသင်ကြားပေးနေတဲ့ ဆရာ၊ ဆရာမလေးတွေကိုလည်း ထောက်ပံ့ဖို့ လိုအပ်တယ်။ အခုက ရန်ပုံငွေ အခက်အခဲကြောင့် ပထမ အချက်ကိုတောင် မဖြည့်နိုင်သေးဘူး ဖြစ်နေတယ်” လို့ သူကပြောပါတယ်။
လက်ရှိ တော်လှန်ရေး အင်အားစုတွေ စစ်ရေးအရ ထိန်းချုပ်ထားတဲ့ ဒီးမော့ဆိုမြို့နယ် အပါအ၀င် ကရင်နီ ပြည်နယ် တစ်ခုလုံး ပြန်လည် ထိန်းချုပ်နိုင်ဖို့ စစ်ကောင်စီက စစ်အင်အား အမြောက်အများ အသုံးပြု ထိုးစစ်ဆင်နေတာ၊ အတွဲလိုက်ဒုံးတွေ၊ လက်နက်ကြီး ၁၂၀ မမ တွေနဲ့ ပစ်ခတ်တာ၊ လေကြောင်းက ဗုံးကြဲ တိုက်ခိုက်မှုတွေ ပြုလုပ်နေတာကြောင့် တိုက်ပွဲတွေ ပြင်းထန်နေပါတယ်။
ဒီတိုက်ပွဲတွေကြောင့် စစ်ရှောင် ပြည်သူတွေဟာ နေရာအတည်တကျ မနေနိုင်ဘဲ တိုက်ပွဲနဲ့ ဝေးရာကို မကြာခဏ ရွှေ့ပြောင်းနေရတာပါ။
ဒီလို အခြေအနေတွေကြောင့် စစ်ရှောင် ကလေးငယ်တွေ အေးအေးချမ်းချမ်း ပညာသင်ကြားနိုင်ဖို့ အခွင့်အလမ်း မရှိသလောက် ဖြစ်နေတဲ့ အနေအထားနဲ့ ရင်ဆိုင်နေရတယ်လို့ ဒီးမော့ဆို ပညာရေးဘုတ်အဖွဲ့က ပြောပါတယ်။
MK-007
#MeKongNews
#ဒီးမော့ဆို
#စစ်ဘေးရှောင်
#ပညာရေးဘုတ်အဖွဲ့
