မဲခေါင်၊ မေ ၁၉
ရှမ်းပြည်နယ် တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ပင်လောင်းမြို့နယ်၊ ဆောင်းပြောင်းကျေးရွာမှာ ပအိုဝ်းပြည်သူ့စစ် (PNA) က နေကြာနဲ့ ပြောင်းတွေ စိုက်ပျိုးခွင့် မပေးတော့ဘူးလို့ ကျေးရွာနေ တောင်သူတွေက ပြောပါတယ်။
ဆောင်းပြောင်းကျေးရွာက ပြည်သူတွေဟာ နေကြာနဲ့ ပြောင်းကို အဓိက စိုက်ပျိုးတာဖြစ်ပြီး တော်လှန်ရေး အင်အားစုတွေ ခြုံခို တိုက်ခိုက်မှာကို စိုးရိမ်ပြီး PNA အနေနဲ့ မေလ ၁၅ ရက်နေ့ ရွာလုံးကျွတ် အစည်းအဝေးမှာ အခုလို ကန့်သတ်လိုက်တာလို့ ကျေးရွာနေ တောင်သူ တစ်ဦးက ပြောပါတယ်။
“ရွာလူကြီးအိမ်မှာ အစည်းအဝေးလုပ်တော့ PNA လူကြီးတွေက စိုက်ခွင့် မပေးတော့ဘူးလို့ ပြောတယ်။ ပြောင်းနဲ့ နေကြာက အပင်တွေ အရမ်းရှည်ပြီး ခြုံတွေလည်းများတော့ PDF တွေ ပုန်းခိုနိုင်တယ်ပေါ့။ ပင်လောင်းမှာက ပြောင်းနဲ့ နေကြာ စိုက်ပျိုးမှုက အများဆုံးလို့ ပြောလို့ရတယ်။ ဒါတွေကို ကန့်သတ်လိုက်တယ် ဆိုတာ့ ကျနော်တို့ အတွက် အခက်အခဲ ဖြစ်တာပေါ့” သူက ရှင်းပြပါတယ်။
လက်ရှိ ပြောင်းနဲ့ နေကြာ မစိုက်ရ ကန့်သတ်နယ်မြေထဲမှာ ဧက ၁၀၀ ကျော်ပါဝင်တာကြောင့် တောင်သူတွေ အနေနဲ့ စီးပွားရေး အခက်အခဲ ဖြစ်လာနိုင်တယ်လို့ သူက ဆက်ပြောပါတယ်။
ဒါ့အပြင် ဆောင်းပြောင်းကျေးရွာမှာ လက်ရှိ တိုက်ပွဲဖြစ်ပွားနေတဲ့ တောင်မဲသင်းကျေးရွာက စစ်ဘေးရှောင် အများစု ခိုလှုံနေတာကြာင့် စစ်ဘောင်းရှောင်တွေ အတွက် အလုပ်အကိုင် ရှားပါးလာနိုင်တယ်လို့ ကျေးရွာနေ ပြည်သူတွေက ပြောပါတယ်။
ပင်လောင်းမြို့နယ်မှာ လက်ဖက်၊ အာလူး၊ ဂေါ်ဖီထုတ်၊ ဂေါ်ဖီပန်း၊ ဂျင်း၊ ကြက်သွန်နီ၊ ကြက်သွန်ဖြူ စတာတွေ စိုက်ပျိုးကြပေမယ့် နေကြာနဲ့ ပြောင်း စိုက်ပျိုးမှု အများဆုံးဖြစ်ပြီး ဧက တစ်ထောင်ကျော် အထိ ရှိတယ်လို့ သိရပါတယ်။
ဆောင်းပြောင်း ဒေသမှ ကရင်နီ မဟာမိတ် တော်လှန်ရေး အင်အားစုတွေနဲ့ PNA၊ စစ်ကောင်စီ ပူးပေါင်းတပ် ဖေဖော်ဝါရီလ ကတည်းက အခုချိန်ထိ နေ့စဉ် တိုက်ပွဲတွေ ပြင်းထန်နေတယ်လို့ ဒေသခံတွေက ပြောပါတယ်။
CJ-007
#MeKongNews
#ဆောင်းပြောင်း
#PNA
#ပင်လောင်းမြို့နယ်
