မဲခေါင်၊ မတ် ၈
ထိုင်းနိုင်ငံ၊ ဘန်ကောက်မြို့အနီး၊ ပသမ်သာနီခရိုင်၊ ဖရာအွန်ခေးယို့ဆိုင်း လမ်းပေါ်မှာ ပြီးခဲ့တဲ့ ရက်ပိုင်းက ဖြစ်ပွားခဲ့တဲ့ ကလေးငယ် တစ်ဦးကို ကယ်တင်လိုက်တဲ့ ဒလီဗာရီသမားရဲ့ CCTV ကင်မရာ မှတ်တမ်းဟာ ထိုင်းအင်တာနက် သုံးသူတွေ အကြား ရေပန်းစားနေခဲ့ပြီး ဒလီဗာရီ သမားကို ထိုင်းတော်ဝင်ရဲတပ်ဖွဲ့က သူရဲကောင်းဘွဲ့ ပေးအပ်သလို ပြည်သူတွေကလည်း သူရဲကောင်း အဖြစ် ဂုဏ်ပြုမဆုံး ဖြစ်နေပါတယ်။
မတ်လ ၅ ရက်နေ့၊ ဒေသစံတော်ချိန် မွန်းလွဲ ၃ နာရီလောက်မှာ ၄ နှစ်သားအရွယ် ကောင်လေး တစ်ယောက်ဟာ လမ်းတစ်ဖက်တစ်ချက်မှာ ရှိနေတဲ့ ဖခင်ဖြစ်သူဆီ ပြေးအသွား မီးပွိုင့်လွတ်လို့ လမ်းမကြီးပေါ် ချိုးကွေ့သွားတဲ့ ၃၂ နှစ်အရွယ် အစားအသောက်ပို့ ဒလီဗာရီသမား ပါရာပေါင်ဟာ ဆိုင်ကယ် နောက်ကြည့်မှန် ကနေ မြင်မြင်ချင်း ဆိုင်ကယ်ပေါ်က ခုန်ချပြီး ကလေးငယ်ကို ပြေးပွေ့လိုက်ရာမှာ အရှိန်နဲ့ မောင်းလာတဲ့ ကားတွေ တိုက်လုတိုက်ခင် အနေအထားကနေ ကယ်တင်လိုက်နိုင်တာ ဖြစ်ပါတယ်။
ထိုင်းတော်ဝင် ရဲတပ်ဖွဲ့ ရဲချုပ် ဒမ်ရောင်းဆက်ကစ်တီပရာပက်စ်က လူသားတွေအားလုံး ပါရာပေါင်ကို စံပြပုဂ္ဂိုလ် အဖြစ်ထားရှိပြီး အသက်ကို ပဓာနမထား လူမှုအကျိုး ပြုလုပ်နိုင်ကြစေလိုတယ်လို့ ဖွင့်ပြောရင်း ဂုဏ်ထူးဆောင်ဘွဲ့ ပေးအပ်ချီးမြှင့် ခဲ့ပါတယ်။
ဆိုင်ကယ်မှောက်သွားလို့ အစားအသောက် သိုလှောင်အိတ် ပျက်စီးပြီး မှာထားတဲ့ အစားအသောက်တွေ လမ်းပေါ် ပျံ့ကျဲသွားပေမယ့် စားသောက်ဆိုင်ပိုင်ရှင်က ကုန်ကျစားရိတ် မယူတဲ့အပြင် ဂုဏ်ပြုမှုတောင် လုပ်ခဲ့ပါတယ်။
ဒီသတင်းဟာ ထိုင်းက TikTok ၊ ဖေ့စ်ဘုတ် စတဲ့ လူမှုကွန်ရက်တွနဲ့ မီဒီယာတွေပေါ်မှာ ပေါက်သွားခဲ့ပြီး ပါရာပေါင်ဟာ မိန်းကလေးငယ်တွေ အကြား ချစ်သူဖြစ်ချင်တဲ့ စံပြယောက်ျားမျိုးက ဒီလိုဆိုတဲ့ မှတ်ချက်တွေနဲ့ သူရဲကောင်း ဖြစ်သွားခဲ့ရပါတယ်။
ပြီးခဲ့တဲ့ စက်တင်ဘာလကလည်း ၁၂ နှစ်အရွယ် ကောင်လေး တစ်ယောက် ဓာတ်လိုက်နေတာကို အသက်စွန့်ပြီး ကူညီခဲ့တဲ့ ၁၉ နှစ်သား ကျောင်းသားလေး အက်တဟာချိုင်အာဂူဒိုဟာ အင်တာနက်ပေါ်မှာ သူရဲကောင်း အဖြစ် ချီးကျူးခံရပြီး ကယ်ဆယ်စဉ် ပျက်စီးသွားတဲ့ ဖုန်းအတွက် ဝိုင်းပြီး ဖုန်းအသစ်တစ်လုံး ဝယ်ယူ ဂုဏ်ပြုပေးမှု ခံခဲ့ရ ပါသေးတယ်။
Ref: thethaiger
MKF-001
