မဲခေါင်၊ဖေဖော်ဝါရီ ၂၂
ကရင်အချင်းချင်း တိုက်ခိုက်မယ့်အစား သေနတ်ပြောင်း၀ကို စစ်အုပ်စုဘက်သို့ လှည့်ကြဖို့ နိုင်ငံတကာ ကရင်အဖွဲ့အစည်း-IKOက ဒီကနေ့ ကြေညာချက် ထုတ်ပြန်ပါတယ်။
ကရင်အမျိုးသားအစည်းအရုံး(KNU) လက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၄ နယ်မြေအတွင်း KNLA နဲ့ KTLA တို့အကြား တိုက်ပွဲဖြစ်ပွားနေတာနဲ့ ပတ်သက်ပြီး IKOက အခုလို ထုတ်ပြန်လိုက်တာလို့ သိရပါတယ်။
အခုကာလဟာ စစ်အစိုးရကို ပြည်သူတစ်ရပ်လုံးမှ တော်လှန်တိုက်ပွဲဝင်နေကြတာဖြစ်ရာ ကရင်တပ်ဖွဲ့တွေအကြား အချင်းချင်း တိုက်ခိုက်နေတာက မဖြစ်သင့်ဘဲ အခုလိုဖြစ်နေတဲ့အပေါ် အထူးစိတ်မချမ်းမြေ့ ဖြစ်ရတယ်လို့ IKOက ဆိုပါတယ်။
စစ်အစိုးရဟာ ကရင်လူမျိုး အပါအဝင် ပြည်သူတစ်ရပ်လုံးအပေါ် မတရားဖိနှိပ်အုပ်ချုပ် ကျွန်ပြုခဲ့တာဟာ ဆယ်စုနှစ်ပေါင်းများစွာ ရှိနေခဲ့ပြီး တစ်ခါမှမရှိခဲ့ဖူးတဲ့ ပြည်သူတစ်ရပ်လုံးက စစ်အုပ်စု အမြစ်ပြတ် ဖြုတ်ချရေး တော်လှန်တိုက်ပွဲဝင်နေတာက အဖိနှိပ်ခံ ပြည်သူ တစ်ရပ်လုံးအတွက် အခွင့်အခါကောင်းဖြစ်တာကြောင့် လက်မလွှတ်သင့်ဘူးလို့ IKO ကထုတ်ပြန်ပါတယ်။
စစ်အုပ်စုရဲ့ အယုတ်မာဆုံး လုပ်ရပ်ဖြစ်တဲ့ ပြည်သူအပေါ် ညှင်းပမ်းနှိပ်စက် သတ်ဖြတ်တာ၊ အိုးအိမ်နဲ့ ကျေးရွာတွေကို မီးရှို့ဖျက်ဆီးတာစတဲ့ ယုတ်မာတဲ့ နည်းတွေကို ကျင့်သုံးနေတယ်လို့ ဖော်ပြထားပြီး စစ်အုပ်စုဘက်သို့ သေနတ်ပြောင်း၀ လှည့်ကြဖို့ IKOက တိုက်တွန်းထားပါတယ်။
ဒါ့အပြင် KTLA နဲ့ KNLA တာဝန်ရှိသူတွေဟာ ကရင်တမျိုးသားလုံးရဲ့ မျက်နှာကို ထောက်ပြီး လက်ရှိ ဖြစ်ပေါ်နေတဲ့ အချင်းချင်း ရန်မူ တိုက်ခိုက်နေမှုတွေ အမြန်ဆုံး အဆုံးသတ်ဖို့လည်း မေတ္တာရပ်ခံထားပါတယ်။
KTLA ဟာ ဗိုလ်မှူးချုပ် နယ်ဒါးမြ ဦးဆောင်တဲ့ တပ်ဖြစ်ပြီး KNU တပ်မဟာ(၆)နယ်မြေ နဲ့တပ်မဟာ(၄)နယ်မြေတို့မှာ သူ့ရဲ့ တပ်တွေလှုပ်ရှားမှုရှိတယ်လို့ သိရပါတယ်။
ဗိုလ်မှူးချုပ် နယ်ဒါးမြဟာ အရင်က KNU လက်အောက်ခံတပ်ဖြစ်တဲ့ ကရင်အမျိုးသားကာကွယ်ရေးတပ်ဖွဲ့(KNDO) စစ်ဦးစီးချုပ် ဖြစ်သော်လည်း အာဏာသိမ်းပြီးနောက်ပိုင်း ဝေါ်လေဒေသတိုက်ပွဲမှာ တံတားလုပ်ငန်းခွင်မှ အရပ်သားတွေ အစုလိုက် သတ်ဖြတ်ခံရမှု ဖြစ်စဉ် အပေါ် KNUက စုံစမ်းစစ်ဆေးရာ စစ်ဆေးမှုကို လက်မခံတာကြောင့် တာဝန်မှ ရပ်စဲခံခဲ့ရပြီး နောက်ပိုင်းမှာ KTLA ကို ဖွဲ့စည်းလိုက်တာကြောင့် အဖွဲ့အစည်းမှ ထုတ်ပယ်ခံရတယ်လို့ သိရပါတယ်။
KTLA အမည်နဲ့ ဖွဲ့ထားတဲ့ ဗိုလ်မှူးချုပ်နယ်ဒါးမြတပ်တွေဟာ KNU တပ်မဟာ ၆ နဲ့ တပ်မဟာ ၄ မှာရှိသော်လည်း တပ်မဟာ ၄ နယ်မြေမှာသာ တိုက်ပွဲဖြစ်ပွားမှု ရှိခဲ့တယ်လို့ သိရပါတယ်။
MK-003