မဲခေါင်၊ ဇန်နဝါရီ ၂၈
ကရင်နီပြည် တစ်ဝှမ်းမှာ ရွေးကောက်ပွဲနဲ့ သက်ဆိုင်တဲ့ လုပ်ငန်းစဉ်မှန်သမျှ မဆောင်ရွက်ဖို့ ပိတ်ပင်တဲ့ ကြေညာချက်ကို ကရင်နီ အမျိုးသားများ ကာကွယ်ရေးတပ်-KNDF က ဒီကနေ့ ထုတ်ပြန်ထားပါတယ်။
ရွေးကောက်ပွဲ ပြင်ဆင်မှု အဖြစ် တစ်အိမ်တက်ဆင်း လူဦးရေစာရင်းတွေ ကောက်ခံတာ၊ ကြိုတင်မဲတွေ ကောက်ယူတာ၊ စည်းရုံးဟောပြောတာ၊ တာဝန်ပေးအပ်တာ အစရှိတဲ့ စစ်ကောင်စီရဲ့ လုပ်ဆောင်မှုတွေမှာ မပူးပေါင်းကြဖို့ KNDF က သတိပေးပါတယ်။
ဒါ့အပြင် တစ်သီးပုဂ္ဂလ သော်လည်းကောင်း အစုအဖွဲ့နဲ့ သော်လည်းကောင်း နိုင်ငံရေးပါတီ ဖွဲ့စည်းပြီး ဝင်ရောက်ယှဉ်ပြိုင်တာ လုံးဝ-လုံးဝ မပြုလုပ်ဖို့လည်း ဖော်ပြထားပါတယ်။
ကရင်နီပြည် တစ်ဝှမ်းလုံးမှာ ရွေးကောက်ပွဲနဲ့ သက်ဆိုင်တဲ့ လုပ်ငန်းစဉ်မှန်သမျှကို ပိတ်ပင်ပြီး ပူးပေါင်း ဆောင်ရွက်တာ မပြုလုပ်ဖို့ KNDF က ဆိုပါတယ်။
ရွေးကောက်ပွဲ ဖြစ်မြောက်ရေး ဆောင်ရွက်မှုတွေ တွေ့ရှိပါက မိမိတို့ တော်လှန်ရေး အင်အားစုတွေမှ ကျင့်ဝတ်နည်းနာတွေနဲ့အညီ ထိရောက်စွာ အရေးယူမယ်လို့လည်း ထုတ်ပြန်ချက်မှာ ဖော်ပြပါတယ်။
စစ်ကောင်စီက ပြုလုပ်မယ့် ရွေးကောက်ပွဲဟာ စစ်အာဏာရှင် သက်ဆိုးရှည်စေဖို့ ကြိုးပမ်းတဲ့ အတုအယောင် ဆောင်ရွက်မှုသာ ဖြစ်တယ်လို့လည်း KNDF က ဆိုပါတယ်။
လူထုဆန္ဒ မပါဝင်တဲ့ တရားမဝင် အတုအယောင် ရွေးကောက်ပွဲကို ကရင်နီပြည်နယ်အတွင်း ပြုလုပ်ခွင့်ပြုမှာ မဟုတ်ဘဲ ရွေးကောက်ပွဲဆိုင်ရာ လုပ်ငန်းစဉ် တွေကို တစ်ညီတစ်ညွတ်တည်း ဆန့်ကျင်တိုက်ဖျက်မယ်လို့လည်း သတိပေးထားပါတယ်။
အဲဒီ ထုတ်ပြန်ချက်ကို ကရင်နီတော်လှန်ရေး အင်အားစုတွေဖြစ်တဲ့ ဒီးမော့ဆိုမြို့နယ် ပြည်သူ့ကာကွယ်ရေး DMO PDF နဲ့ KNDF တို့ ပူးတွဲ ကြေညာထားတာပါ။
၂၀၂၀ အထွေထွေ ရွေးကောက်ပွဲအတွင်း မဲမသမာမှု ရှိတယ်လို့ စွပ်စွဲကာ ၂၀၂၁ ဖေဖော်ဝါရီ ၁ ရက်မှာ ပြည်သူလူထုရဲ့ ဆန္ဒကို လေးစားလိုက်နာမှုမရှိဘဲ စစ်တပ်က နိုင်ငံတော်အာဏာကို အတင်းအဓမ္မ သိမ်းယူခဲ့တယ်လို့ KNDF က သတ်မှတ်ထားပါတယ်။
MK-003
