မဲခေါင်၊ ဇန်နဝါရီ ၁၈
အာဏာသိမ်း စစ်ကောင်စီ လက်အောက်မှာ ပညာ မသင်လိုတဲ့ ကျောင်းသား လူငယ်တွေ လေ့လာ သင်ယူနိုင်ဖို့ ရည်ရွယ်ပြီး ဘာသာစကား အစုံအလင် နွေဉီးတက္ကသိုလ်မှာ လေ့လာနိုင်တယ်လို့ Spring University Myanmar က ဖိတ်ခေါ်ထားပါတယ်။
ပညာရေး ရှေ့ဆက်ဖို့နဲ့ အလုပ်အကိုင် အခွင့်အလမ်း လိုအပ်ချက်အရ လူငယ် အများစုဟာ နိုင်ငံခြား ဘာသာစကားတွေ လေ့လာသင်ယူမှု များပြားနေတာ ဖြစ်ပါတယ်။
“ယခုလို လေ့လာရာမှာ နိုင်ငံတစ်ဝန်းမှ ငွေကြေးဆိုင်ရာ အခက်အခဲရှိသူများ ပါဝင်နိုင်တာဖြစ်လို့ လေ့လာသူအားလုံးအတွက် အလှူငွေ ထည့်ရုံမျှနှင့် အရည်အသွေးပြည့်ဝသော အတန်းများ ဖွင့်လှစ်နိုင်ရန် ဆောင်ရွက်လျက်ရှိတယ်” လို့ နွေဉီးတက္ကသိုလ် တာဝန်ရှိသူက ပြောပါတယ်။
ဖွင့်လှစ်ပေးမယ့် ဘာသာစကား သင်တန်းတွေကတော့ English (Elementary, Pre-Intermediate, Conversation Class) ၊ Korea (Basic, Level-1, Level-2, TOPIK-ll Exam Preparation) ၊ Chinese (Mandarin Chinese Basic) ၊ French (Basic, A 1.2)၊ German (Basic, A 1.1) ၊ Thai (Basic, Basic 1) တို့ ဖြစ်တယ်လို့ သိရပါတယ်။
နွေဦးတက္ကသိုလ်က လူငယ်တွေ အတွက် ပို့ချခဲ့တဲ့ သင်တန်း အရေအတွက် ၅၀၇ ခုကျော်ရှိပြီး သင်ကြားရေးတွင် ပါဝင်အားဖြည့်ပေးတဲ့ CDM ဆရာဆရာမနဲ့ ပညာရှင် စုစုပေါင်း ၂၀၀ ဦးကျော် ရှိတယ်လို့ သိရပါတယ်။
အဆိုပါ တက္ကသိုလ်မှာ နိုင်ငံတစ်ဝှမ်း ကျောင်းသား လူငယ် ၁၃,၀၀၀ တက်ရောက်ခဲ့တယ်လို့ သိရပါတယ်။
နွေဦးတက္ကသိုလ် အနေနဲ့ ၂၀၂၃ ခုနှစ် အတွင်း နိုင်ငံတကာ အဖွဲ့အစည်းတွေ၊ တက္ကသိုလ်တွေနဲ့ ပူးပေါင်းကာ ရက်တို၊ ရက်ရှည် သင်တန်းတွေ ဖွင့်လှစ်ဖို့ စီစဉ်နေတယ်လို့လည်း သိရပါတယ်။
MK-010
