တော်လှန်ရေး ရဲဘော် ၃ ဦးနဲ့ ပြည်သူ တစ်ဦးကို စစ်ကောင်စီ လက်အောက်ခံ အင်းစိန်ထောင်တွင်းတရားရုံးမှ ဒီဇင်ဘာလ ၂၉ ရက်နေ့က နှစ်ရှည် ထောင်ဒဏ်တွေ ချမှတ်ခဲ့တယ်လို့ Yangon Revolution Force – YRF က ဒီကနေ့ ထုတ်ပြန်ပါတယ်။
ဖမ်းဆီး ထောင်ချခံရသူတွေဟာ အသက် ၂၀ အရွယ် ကိုစစ်ဇော်ကံ၊ အသက် ၂၆ နှစ်အရွယ် ကိုဗညားစိုးထက်၊ အသက် ၃၅ နှစ်အရွယ် ကိုစိုင်းစည်သူ နဲ့ အသက် ၂၅ နှစ်အရွယ် မဖြိုးအိကျော်တို့ ဖြစ်ပါတယ်။
စစ်ကောင်စီက ဖမ်းဆီးထောင်ချတဲ့ လူငယ် ၄ ဦးအနက် ကိုစိုင်းစည်သူဟာ ပြည်သူတစ်ဦးဖြစ်ပြီး ကျန်တဲ့ ၃ ဦးဟာ ရန်ကုန် တော်လှန်ရေး အင်အားစု အဖွဲ့ဝင်တွေ ဖြစ်တယ်လို့ YRF က အသိပေးထားပါတယ်။
စစ်ကောင်စီချမှတ်တဲ့ ပြစ်ဒဏ်တွေမှာ ကိုစစ်ဇော်ကံ ထောင်ဒဏ် ၇၄ နှစ်၊ ကိုဗညားစိုးထက် ထောင်ဒဏ် ၇၄ နှစ်နဲ့ မဖြိုးအိကျော် ထောင်ဒဏ် ၇ နှစ် ချမှတ်ခဲ့တာပါ။
ဒါ့အပြင် YRFမှ ရဲဘော်တွေနဲ့ သက်ဆိုင်မှု မရှိတဲ့ ပြည်သူဖြစ်သူ ကိုစိုင်းစည်သူကို ထောင်ဒဏ် ၄၀ နှစ် အသီးသီး အမိန့်ချမှတ်ခဲ့တယ်လို့ သိရပါတယ်။
ပြီးခဲ့တဲ့နှစ် နိုဝင်ဘာလ ၄ ရက် မနက်ပိုင်းမှာ မိုင်တဲလ်ကုမ္ပဏီရဲ့အထွေထွေမန်နေဂျာ ဗိုလ်မှူးဟောင်း ဦးသိန်းအောင်နဲ့ ဇနီးဟာ မရမ်းကုန်မြို့နယ်၊ တေးနုယဉ်လမ်း နေအိမ်အနီးမှာ ပစ်ခတ်ခံရတာပါ။
ပစ်ခတ်မှုကြောင့် ဗိုလ်မှူးဟောင်း ဦးသိန်းအောင်ဟာ နေရာမှာတင်ပွဲချင်းပြီး သေဆုံးခဲ့ပါတယ်။
အခင်းဖြစ်ပြီး တစ်ပတ်ကျော်ကြာချိန်မှာ ပစ်ခတ်မှုကို လုပ်ဆောင်ခဲ့သူ ၄ ဦးကို ဖမ်းမိပြီဆိုပြီး စစ်ကောင်စီက သတင်းဖြန့်ခဲ့တာလည်း ဖြစ်ပါတယ်။
သံတိုင်တွေ နောက်မှာ ဆက်လက်တိုက်ပွဲဝင်နေတဲ့ မတရား အကျဉ်းကျခံ ရဲဘော်တွေကို အထူးလေးစား အသိမှတ်ပြုကာ မိမိတို့ အနေနဲ့ စစ်အာဏာနာရှင်စနစ် အမြစ်ပြတ် ချေမှုန်ရေး ဆက်လက် တိုက်ပွဲဝင်သွားမယ်လို့ Yangon Revolution Force – YRF က ကတိပြုထားပါတယ်။
