ကရင်အမျိုးသား အစည်းအရုံး-KNU၊ ဖာပွန်ခရိုင် အတွင်းရှိ စစ်ကောင်စီရဲ့ လက်ပါးစေ မြို့နယ်၊ ရပ်ကွက်၊ ကျေးရွာတွေမှ အုပ်ချုပ်ရေးမှူးတွေနဲ့ ဌာနဆိုင်ရာဝန်ထမ်းတွေ အားလုံး သက်ဆိုင်ရာ ရာထူးတာဝန်တွေကို စွန့်ခွာပြီး အခုလ ဇန်နဝါရီ ၁ ရက်မှ ၁၀ ရက်အတွင်း ထွက်ခွာဖို့ KNLA တပ်မဟာ (၅)က အမိန့်ထုတ်ပြန်လိုက်တာပါ။
ဒါ့အပြင် စစ်ကောင်စီက ပြုလုပ်မယ့် စစ်အာဏာရှင်စနစ် တည်တံ့ခိုင်မြဲရေး ကြိုးပမ်းတဲ့ ရွေးကောက်ပွဲနဲ့ပတ်သက်ပြီး KNLA တပ်မဟာ (၅) ထိန်းချုပ်နယ်မြေအတွင်းရှိ ဘယ်သူမဆို စစ်ကောင်စီအဖွဲ့နဲ့ လုံး၀ မပူးပေါင်းကြဖို့၊ မပတ်သက်ကြဖို့လည်း အမိန့်မှာ ဖော်ပြထားပါတယ်။
အခု အမိန့်ထုတ်ပြန်ချက်ကို လေးစားကြဖို့နဲ့ မလေးစား မလိုက်နာပါက မိမိတို့ အရေးယူနိုင်တဲ့ လူပုဂ္ဂိုလ်တွေကို ဥပဒေနဲ့အညီ အရေးယူဆောင်ရွက်မှာဖြစ်ပြီး အရေးမယူနိုင်တဲ့ ပုဂ္ဂိုလ်တွေအတွက် နောက်ဆက်တွဲဖြစ်လာမယ့် အကျိုးဆက်တွေနဲ့ပတ်သက်ပြီး သူတို့အပေါ်မှာသာ မူတည်လိမ့်မယ်လို့လည်း ဖော်ပြထားပါတယ်။
ဒါ့အပြင် အခု ထုတ်ပြန်ချက်ဟာ နောက်ဆုံး ထုတ်ပြန်ချက် ဖြစ်တယ်လို့လည်း တပ်မဟာ(၅)က သတိပေးထားပါတယ်။
တပ်မဟာ (၅) အနေနဲ့ မြန်မာနိုင်ငံမှာ စစ်အာဏာရှင်စနစ် အဆုံးသတ် ပပျောက်ရေး ကြိုးပမ်းလုပ်ဆောင်ရင်း ထိန်းချုပ်နယ်မြေအတွင်း စစ်ကောင်စီတပ်စခန်းတွေ ရုပ်သိမ်းဖို့ ဖိအားပေးလုပ်ဆောင်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။
ဒေသအတွင်း စစ်ကောင်စီရဲ့ အုပ်ချုပ်မှု ယန္တရားတွေ တည်ရှိမှုကိုလည်း လုံး၀ လက်ခံမှာ မဟုတ်သလို အားလုံး ထွက်ခွာသွားဖို့ နည်းမျိုးစုံနဲ့ ဖိအားပေးမှာ ဖြစ်တယ်လို့လည်း တပ်မဟာ (၅) က အသိပေးထားပါတယ်။
