မဲခေါင်၊ အောက်တိုဘာ ၂၇
အာဆီယံအထူးကိုယ်စားလှယ်သည် ပဋိပက္ခဒဏ်ခံနေရသော မြန်မာနိုင်ငံတစ်ဝန်း လူသားချင်းစာနာထောက်ထားမှုဆိုင်ရာ အကူအညီများ ပိုမိုရောက်ရှိနိုင်ရေး ကြိုးပမ်းမှုများကို ဆွေးနွေးရန် လူသားချင်းစာနာထောက်ထားမှုဆိုင်ရာ ကိုယ်စားလှယ်အဖွဲ့တစ်ဖွဲ့ကို ဦးဆောင်ကာ မြန်မာနိုင်ငံသို့ မနက်ဖြန်တွင်လာရောက်မည်ဖြစ်ကြောင်း သံတမန်သတင်းရင်းမြစ်များက ပြောကြားသည်။
အမည်မဖော်လိုသော သတင်းရင်းမြစ်များ၏ ပြောကြားချက်အရ ဖိလစ်ပိုင်နိုင်ငံခြားရေးဝန်ကြီး မာရီယာထရီဇာ လာဇာရိုသည် အောက်တိုဘာ ၂၈ ရက်မှ ၂၉ ရက်အထိ နေပြည်တော်သို့ သွားရောက်ကာ အကြီးတန်းတာဝန်ရှိသူများနှင့် တွေ့ဆုံမည်ဖြစ်သည်။
လာဇာရိုသည် မြန်မာနိုင်ငံ၏ လူသားချင်းစာနာထောက်ထားမှုဆိုင်ရာ လိုအပ်ချက်များနှင့်ပတ်သက်၍ အာဆီယံ၏ ကြိုးပမ်းဆောင်ရွက်မှုများကို ဆွေးနွေးရန် နိုင်ငံခြားရေးဝန်ကြီး ဦးတင်မောင်ဆွေ နှင့် တွေ့ဆုံရန် စီစဉ်ထားသည်။
သို့ရာတွင် ၎င်း၏နှစ်ရက်ကြာ ခရီးစဉ်အတွင်း ဒေါ်အောင်ဆန်းစုကြည်နှင့် တွေ့ဆုံရန် အာဆီယံဘက်က တောင်းဆိုထားခြင်းရှိ၊ မရှိ မေးမြန်းရာတွင် ထိုသို့တွေ့ဆုံရန် အစီအစဉ်မရှိသေးကြောင်း သတင်းရင်းမြစ်များက ပြောကြားခဲ့သည်။
လူထုခေါင်းဆောင် ဒေါ်အောင်ဆန်းစုကြည်သည် နေအိမ်အကျယ်ချုပ်ဖြင့် ဆက်လက်ထိန်းသိမ်းခံထားရဆဲဖြစ်သည်။
မကြာသေးမီက အပြုသဘောဆောင်သည့် ဖြစ်ပေါ်တိုးတက်မှုများ ရှိလာပြီးနောက် လာဇာရိုသည် ဒေါ်အောင်ဆန်းစုကြည်နှင့် တွေ့ဆုံမည်ဟု မီဒီယာများတွင် ခန့်မှန်းပြောဆိုမှုများစွာ ထွက်ပေါ်ခဲ့သည်။
ပြီးခဲ့သည့် သီတင်းပတ်က ဒေါ်အောင်ဆန်းစုကြည်သည် ဗြိတိန်ဘုရင် ချားလ်စ် ပေးပို့သည့် ပိတ်စာတစ်စောင်နှင့် စာအုပ်နှစ်အုပ် ပါဝင်သော ပါဆယ်ထုပ်တစ်ထုပ်ကို လက်ခံရရှိခဲ့သည်။
ထို့ပြင် လန်ဒန်မြို့တွင် နေထိုင်သော ၎င်း၏ အငယ်ဆုံးသား ကင်မ်အဲရစ်နှင့်လည်း ဖုန်းပြောဆိုခွင့် ရရှိခဲ့သည်။
ကိုယ်စားလှယ်အဖွဲ့တွင် အင်ဒိုနီးရှားနိုင်ငံ၊ ဂျကာတာမြို့အခြေစိုက် အာဆီယံ သဘာဝဘေးအန္တရာယ် စီမံခန့်ခွဲမှုနှင့် လူသားချင်းစာနာထောက်ထားမှုဆိုင်ရာ အကူအညီပေးရေး ညှိနှိုင်းရေးဗဟိုဌာန (AHA Centre) မှ အကြီးတန်းတာဝန်ရှိသူများနှင့် ကျွမ်းကျင်သူများလည်း ပါဝင်မည်ဖြစ်သည်။
.
လာဇာရိုနှင့် AHA Centre အဖွဲ့သည် ရှမ်းပြည်၊ တောင်ကြီးမြို့သို့လည်း သွားရောက်မည်ဖြစ်ပြီး ဒေသတွင်း ကယ်ဆယ်ရေးအဖွဲ့အစည်းအသီးသီးမှ တာဝန်ရှိသူများနှင့် တွေ့ဆုံကာ လူသားချင်းစာနာထောက်ထားမှုဆိုင်ရာ လိုအပ်ချက်များကို ဆွေးနွေးမည်ဖြစ်သည်။
Ref:Thai PBS
#MeKongNews
#အာဆီယံအထူးကိုယ်စားလှယ်
#ဒေါ်အောင်ဆန်းစုကြည်
#တွေ့ဆုံရန်
#အစီအစဉ်မရှိသေး
