မဲခေါင်၊ မတ် ၃၁
နိုင်ငံရေးဆိုင်ရာ ညှိနှိုင်းဆောင်ရွက်ရေးအစုအဖွဲ့ (Political Coordination Body – PCB) က မြန်မာ့နိုင်ငံရေးအကျပ် အတည်းဖြေရှင်းရေး အချက် ၉ ချက်ကို ယနေ့ မတ် ၃၁ ရက်တွင် ထုတ်ပြန် တောင်းဆိုလိုက်သည်။
ယင်း PCB အဖွဲ့တွင် ရှမ်းတိုင်းရင်းသားများဒီမိုကရေစီအဖွဲ့ချုပ် – SNLD ပါတီမှ ဥက္ကဋ္ဌ ဦးစိုင်းညွန့်လွင်၊ ၈၈ မျိုးဆက် ကျောင်းသားခေါင်းဆောင် ဦးမြအေး၊ ရခိုင်အမျိုးသားပါတီဥက္ကဋ္ဌ ဦးသာထွန်းလှတို့က ဦးဆောင် ပါဝင်ထားသည်။
ထုတ်ပြန်ချက်ပါ အချက်များတွင် ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားများကို လွှတ်ပေးရန်၊ လူငယ်များကို ပေါ်တာဆွဲခြင်းနှင့်စစ်မှုထမ်းခိုင်းခြင်း မပြုလုပ်ရန်၊ အရပ်သားများ ထိခိုက်စေမည့် စစ်ရေး ဆောင်ရွက်ချက်များနှင့် ဘာသာရေး အဆောက်အအုံ၊ ဆေးရုံ၊ ကျောင်းများကို တိုက်ခိုက်ခြင်းများ ရှောင်ရှားရန်၊ CDM များအပေါ် အရေးယူမှုများ မလုပ်ရန်နှင့် ပြည်သူများ၏ လွတ်လပ်စွာ သွားလာခွင့်၊ အသက်မွေးဝမ်း ကျောင်းခွင့်များကို မပိတ်ပင်ရန်၊ စစ်ဘေးသင့် ပြည်သူများအား ကုစားပေးရေးနှင့် လူသားချင်းစာနာမှု အကူအညီများအတွက် နိုင်ငံတကာနှင့် ပူးပေါင်းဆောင်ရွက်ရန်တို့ ပါဝင်သည်။
ထို့ပြင် ပြည်ပရောက် အင်အားစုများ ဂုဏ်သိက္ခာရှိရှိ နေရပ်ပြန်နိုင်မည့် အခင်းအကျင်း ဖော်ဆောင်ရန် သက်ဆိုင်သူအားလုံး ပါဝင်သော ဖက်ဒရယ်ဒီမိုကရေစီ ဦးတည်သည့် နိုင်ငံရေးဆွေးနွေးပွဲများ ကျင်းပနိုင်ရေး ကြိုးပမ်းရန်၊ နိုင်ငံရေးဆွေးနွေးပွဲများ အောင်မြင်ရန် အာဆီယံ၊ ကုလသမဂ္ဂနှင့် အိမ်နီးချင်းနိုင်ငံများ အပါအဝင် နိုင်ငံတကာနှင့် ပူးပေါင်း ဆောင်ရွက်ရန်တို့ကို တောင်းဆိုထားသည်။
ထို့နောက် တိုင်းပြည်၏ အရင်းခံ ပြဿနာများကို ဖြေရှင်းနိုင်ရန်မှာ နိုင်ငံသားအားလုံး၏ အခြေခံ လူ့အခွင့်အရေးများကို အာမခံပြီး၊ အားလုံးပါဝင်သည့် နိုင်ငံရေးဆွေးနွေးပွဲများမှတစ်ဆင့် ဖက်ဒရယ်ဒီမိုကရေစီ ဖွဲ့စည်းပုံအခြေခံဥပဒေကို ရေးဆွဲပြဋ္ဌာန်းမှသာ ဖြစ်နိုင်မည်ဟု PCB က အလေးအနက် ယုံကြည်ကြောင်း ထုတ်ပြန်ချက်တွင် ဖော်ပြထား သည်။
PCB တွင် ပါဝင်သည့် ရှမ်းတိုင်းရင်းသားများဒီမိုကရေစီအဖွဲ့ချုပ် – SNLD ပါတီနှင့် ရခိုင်အမျိုးသားပါတီတို့သည် ၂၀၂၀ ရွေးကောက်ပွဲတွင် အနိုင်ရ တိုင်းရင်းသားပါတီများ ဖြစ်ပြီး အာဏာသိမ်းစစ်ကောင်စီထံတွင် နိုင်ငံရေးပါတီ မှတ်ပုံတင်ခြင်း မပြုခဲ့သည့် တိုင်းရင်းသား နိုင်ငံရေးပါတီများ ဖြစ်သည်။
မြန်မာပြည်တွင်းတွင် အခြေစိုက်ထားသော PCB အစုအဖွဲ့ အနေဖြင့် တိုင်းပြည်၏ အရင်းခံပြဿနာများကို ဖြေရှင်းရန်၊ ဖက်ဒရယ်ဒီမိုကရေစီပြည် ထောင်စု တည်ဆောက်ရန်နှင့် ပြည်သူများ၏ လူမှုစီးပွားဘဝ ဖွံ့ဖြိုးတိုးတက်စေရန် ရည်ရွယ်၍ မူဝါဒတူညီသည့် အဖွဲ့အစည်းများ၊ လူပုဂ္ဂိုလ်များက ၂၀၂၃ ခုနှစ်မှ စတင်ကာ ညှိနှိုင်းခဲ့ကြပြီးနောက် ယခုနှစ် ဖေဖော်ဝါရီ ၂၀ ရက်တွင် PCB ကို ဖွဲ့စည်းခဲ့ကြသည်ဟု သိရှိရသည်။
PCB သည် ဖက်ဒရယ်ဒီမိုကရေစီ ပြည်ထောင်စု ပေါ်ပေါက်ရေး၊ ဖက်ဒရယ်ဒီမိုကရေစီကို အာမခံသည့် ဖွဲ့စည်းပုံအခြေခံဥပဒေ ပေါ်ပေါက်ရေး၊ သက်ဆိုင်သူအားလုံး ပါဝင်သည့် နိုင်ငံရေးဆွေးနွေးပွဲများမှတစ်ဆင့် ပဋိပက္ခများကို ဖြေရှင်းရေး ဖက်ဒရယ်ဒီမိုကရေစီ ဖော်ဆောင်မည့် မိတ်ဖက်များနှင့် ပူးပေါင်းဆောင်ရွက်ရေး ရည်ရွယ်ချက်များဖြင့် ဖွဲ့စည်းလိုက်ခြင်း ဖြစ်သည်ဟု ထုတ်ပြန်ချက်တွင် ဖော်ပြထားသည်။
#MeKongNews
#ဒေါ်အောင်ဆန်းစုကြည်
#လွှတ်ပေးရေး
#မြန်မာ့အရေး
#နိုင်ငံရေးအင်အားစု
#PCB
