မဲခေါင်၊ မတ် ၂၅
အီရန်သည် ကမ္ဘာ့ရေနံတင်ပို့မှု ၂၀ ရာခိုင်နှုန်း၊ သဘာ၀ဓာတ်ငွေ့ရည် ၂၀ ရာခိုင်နှုန်း ဖြတ်သန်းရာ မိုင် ၁၄၀ ရှည်သော ဟော်မုဇ်ရေလက်ကြားတွင် ရေမြုပ်မိုင်းများ ခင်းထားသော်လည်း ပဏ္ဏာသင့်သည့် နိုင်ငံများမှ ရေနံတင်သင်္ဘောများ ယခုတစ်ပတ်အတွင်း ၎င်းခွင့်ပြုချက်ဖြင့် ဖြတ်သန်း ကျော်ဖြတ်သွားနိုင်သောကြောင့် မိုင်းလွတ်ကင်းသည် လမ်းတစ်လမ်း ချန်ထားသည်မှာ သေချာသည်ဟု အမေရိကန်နှင့် ယူကေတို့က ယုံကြည်နေသည်။
အမေရိကန်နှင့် အစ္စရေးတို့က တိုက်ခိုက်နေသဖြင့် အီရန်ဘက်ကလည်း အိမ်နီးချင်းနိုင်ငံများရှိ ရေနံလှောင်ရုံများ တည်ရှိရာ ပစ်မှတ်များကို ဆက်လက်တိုက်ခိုက်နေကာ ကမ္ဘာ့ရေနံစျေးကွက် ပြိုလဲစေရန် ကြိုးစားနေပြီး ဟောမုဇ်ရေလက်ကြားတွင်လည်း ရေမြှုပ်မိုင်းများစွာ ခင်းထားသဖြင့် ရေနံနှင့် ကုန်တင်သင်္ဘောများစွာ ယင်းရေလက်ကြားထိပ်၌ ရက်ပေါင်းများစွာ သောင်တင်နေသည်။
အိန္ဒိယ၊ တူရကီနှင့် ပါကစ္စတန်တို့မှ ရေနံတင် သင်္ဘောများမှာမူ အလွန်အန္တရာယ်များသော ယင်းရေလက်ကြားမှ ပြီးခဲ့သည့် ရက်များအတွင်း ဘေးကင်းစွာ ဖြတ်ကျော်သွားနိုင်မှုကို ကြည့်လျှင် အီရန်သည် ဆက်ဆံရေး အဆင်ပြေသည့် နိုင်ငံများမှ ရေနံတင်သင်္ဘောများ ပေးသွားရန် ရေမြှုပ်မိုင်း လွတ်ရာ လမ်းကြောင်းငယ်တစ်ခုကို ထားရှိပေးထားမည်ဟု အမေရိကန်နှင့် ယူကေအစိုးရအကြီးအကဲများက ယုံကြည်ထားကြသည်။
အီရန် အတွင်းလူတစ်ဦးကလည်း ရေမြှုပ်မိုင်း ခင်းထားခြင်းမှာ ရေလက်ကြားတစ်ခုလုံးအပြည့်မဟုတ်ဘဲ ထွက်ပေါက်လမ်းချန်ထားပေးသည်ဟု The Times သို့ပြောသွားခဲ့သည်။
အီရန်အနေဖြင့် ၄၈ နာရီအတွင်း ရေလက်ကြားအား အပြည့်အစုံ ပြန်မဖွင့်ပေးပါက အီရန်၏ စွမ်းအင်အဆောက်အအုံများ အားလုံးကို ဖျောက်ဖျက်ရမည်ဟု ပြီးခဲ့သည့် မတ် ၂၁ ရက်တွင် ဒေါ်နယ်ထရမ့်က ရာဇသံပေးခဲ့သည်။
သို့သော် အချိန်စေ့ရန် နာရီပိုင်းအလိုတွင် အီရန်နိုင်ငံ၌ အယာတိုလာနေရာ ဆက်ခံသူ မဟုတ်သော်လည်း အမြင့်ဆုံးခေါင်းဆောင်တစ်ဦးသဖွယ် ဩဇာရှိသူနှင့် ဆွေးနွေးနေရာ အကျိုးဖြစ်ထွန်းစေသော နားလည်မှု ရရှိသောကြောင့် အီရန်စွမ်းအင် အဆောက်အအုံများကို နောက် ၅ ရက်အတွင်း မတိုက်ခိုက်သေးဟု မတ် ၂၂ ရက်တွင် ပြောခဲ့သည်။
သို့သော် အီရန်ဘက်က အမေရိကန်နှင့် ဆွေးနွေးမှုမရှိဘဲ သတင်းလိမ်သာ ဖြစ်သည်ဟုဆိုကာ နောက်ဆုံးရည်မှန်းချက် မအောင်မြင်မချင်း အနိုင်တိုက်ကာ ဆန့်ကျင်သွားမည်ဟု အစိုးရပြောခွင့်ရှိသူက ထပ်မံ သတိပေးခဲ့သည်။
နောက်ထပ် ပေးထားသည့် အချိန် ၅ ရက်သည် လာမည့်မတ် ၂၇ တွင် ပြည့်မြောက်မည်ဖြစ်ရာ ထိုရက်မှာပင် အရှေ့အလယ်ပိုင်းဒေသသို့ ဆိုက်ရောက်လာမည့် အမေရိကန်အထူးတပ်များ အီရန်ကျွန်းများကို စတင်သိမ်းပိုက်ကာ မြေပြင်ထိုးစစ်စတင်ဖွယ်ရှိကြောင်း သုံးသပ်နေကြသည်။
လက်ရှိတွင် ထရမ့်သည် စစ်သည် ၂၂၀၀၀ ပါ USS Tripoli နှင့် USS New Orleans ကမ်းတက်စစ်သင်္ဘောကြီး၂ စီးအား အီရန်အနီး ပင်လယ်သို့ ခုတ်မောင်းခိုင်ထားပြီး ထိုသင်္ဘောများသည် ထရမ့်၏ ရာဇသံ ၅ ရက်မြောက်သည့်နေ့တွင် ရောက်ရှိလာတော့မည်ဖြစ်ရာ သံတမန်နည်းဖြင့် မဖြေရှင်းနိုင်တော့ပါက ကမ်းတက်ကာ မြေပြင်ထိုးစစ်ဆင် တိုက်ခိုက်သွားဖွယ်ရှိကြောင်း သုံးသပ်နေကြသည်။
ကိုကလင်း
Ref:Thesun
#MeKongNews
#ဟောမုဇ်ရေလက်ကြား
#ရေမြှုပ်မိုင်း
#ထွက်လမ်း
#အီရန်
