မဲခေါင်၊ မတ် ၁၆
ဆိုဗိယက်ခေါင်းဆောင် စတာလင်နေထိုင်ရန် စီစဉ်ခဲ့သော နန်းတော်ဟောင်းကို ပူတင်သည် နောက်ဆုံးသော လျှို့ဝှက်ဘန်ကာ နန်းတော်အဖြစ် ပြန်လည်တည်ဆောက်နေမှု စီမံကိန်းလျှို့ဝှက်ချက် ပေါက်ကြားလာခဲ့သည်။
အသက် ၇၃ နှစ်ရှိပြီဖြစ်သော ပူတင်သည် ယူကရိန်းဒရုန်းတစ်စီး ယခင်နေအိမ်နား ကျရောက်ပြီးနောက် အကြောက်လွန်ကာ ပင်လယ်နက်ကမ်းခြေ ဆိုချီမြို့ရှိ စတာလင်နန်းတော်ဟောင်း နေရာကို ဘူဒိုဇာများဖြင့် ရှင်းလင်းခဲ့ပြီး တားမြစ်နေရာများ ကျယ်ဝန်းစွာ သတ်မှတ်ခြင်း၊ မြေအောက်ဘန်ကာများစွာ ထည့်သွင်းပြီးညအသစ်ဆောက်လုပ်ခြင်း၊ ပင်လယ်ကမ်းခြေ တစ်လျှောက်မှ ရန်သူများဝင်ရောက်လာခြင်း မရှိစေရန် အကာအရံများ ဆောက်လုပ်ခြင်း၊ အဆင့်အမြင့်ဆုံး လေကြောင်းရန်ကာကွယ်ရေးစနစ်များ တပ်ဆင်ရန် တည်ဆောက်နေကြောင်း လွတ်လပ်သော မီဒီယာ Proekt က ရေးသားဖော်ပြခဲ့သည်။
၂၀၂၄ ခုနှစ်ကတည်းက ပူတင်သည် ၁ ဒသမ ၂ စတုရန်းမိုင် ကျယ်ဝန်းသည့် စတာလင်နန်းတော်ဟောင်းကို ဘူဒိုဇာဖြင့်ထိုးဖျက်ခြင်း၊ အနီးပတ်ဝန်းကျင်တစ်လျှောက် နေထိုင်သူများအားလုံးကို ဖယ်ရှားကာ တားမြစ်ဇုန်များအဖြစ်ထားရှိမှုတွင် ဒရုန်းများ၊ လေသေနတ်ပစ်ကလပ်များ၊ ဆေးသေနတ်ပစ်ကွင်းများ၊ ရဟတ်ယာဉ်ဆင်းသက်ကွင်းများ၊ ကားနှင့်ဆိုင်ကယ်ပြင်ဆိုင်များ၊ မွေးမြူရေးခြံများ၊ ဘန်နာများတစ်ခုမှ ထားရှိတပ်ဆင်ခြင်းမပြုရဟု အမိန့်ထုတ်ပြီး ယင်းမြေအောက်နန်းတော်သစ်ကို တည်ဆောက်နေခြင်းဖြစ်သည်ဟု Proekt မီဒီယာအပြင် Agentsvo မီဒီယာတို့ကပါ ဂြိုဟ်တုဓာတ်ပုံများနှင့်အတူ လျှို့ဝှက်ချက်ကို ဖော်ပြသွားခဲ့သည်။
ယခင်ထို နန်းတော်ကို စတာလင်နေထိုင်ရန် တည်ဆောက်ခဲ့သော်လည်း တည်ဆောက်မှုမပြီးဆုံးမီ သေဆုံးသွားခဲ့ပြီး ဆက်ခံသူ ဆိုဗိယက်ခေါင်းဆောင် နီကီတာခရူးရှက်ဗ်က အပြီးသတ် ဆက်လက်ဆောက်လုပ်ခဲ့ခြင်းဖြစ်ကာ ယခု ထိုနန်းတော်ကို ဘူဒိုဇာဖြင့် ပြန်ထိုးပြီး ပူတင်က သူ့အတွက် နောက်ဆုံးပုန်းခိုရာ ဘန်ကာနန်းတော်အဖြစ် တည်ဆောက်နေခြင်း ဖြစ်သည်။
ပူတင်သည် အသက်အန္တရာယ်အတွက် အလွန်စိုးရိမ်တတ်သူ ဖြစ်ကာ လျှို့ဝှက်ချစ်သူ ကျွမ်းဘားမယ် ကာဘေးဗားနှင့် ရခဲ့သည့် အီဗန် (၁၁ နှစ်)၊ ဗလာဒီမာ (၆နှစ်) တို့ အတူနေထိုင်ရာ လုံခြုံရေးစနစ်များ အပြည့်အ၀ တပ်ထားသည့် နန်းတော်၊ နိုင်ငံအနောက်မြောက်ပိုင်း ဂယ်လန်ဇစ်ခ်ရှိ ပေါင်တစ်ဘီလီယံတန် နန်းတော်အပါ အခြား လျှို့ဝှက်နေထိုင်ရာ နန်းတော်များစွာ တည်ဆောက်ထားသူဖြစ်သည်။
ကိုကလင်း
Ref:Thesun
#MeKongNews
#စတာလင်
#နန်းတော်ရာဟောင်း
#ပူတင်
#လျှို့ဝှက်နန်းတော်
