မဲခေါင်၊ မတ် ၁၄
စစ်ပွဲအဆုံးသတ်ရေး သဘောတူညီချက် တစ်စိတ်တပိုင်းအဖြစ် အီရန်က သန့်စင်ထားသော ယူရေနီယံများအား ရုရှားသို့ ပြောင်းရွှေ့ထားရန် ယခုသီတင်းပတ် ဖုန်းခေါ်ဆိုမူတွင် ရုရှားသမ္မတ ဗလာဒီမာ ပူတင်က ကမ်းလှမ်းခဲ့သော်လည်း အမေရိကန်ကမ္မတ ဒေါ်နယ်ထရမ့်က ပယ်ချခဲ့သည်ဟု အမေရိကန် သတင်းရင်းမြစ်များက ပြောကြားသည်။
လက်နက်ထုတ်လုပ်နိုင်သော အဆင့်အထိ ဆက်လက်သန့်စင်ရန် သီတင်းပတ် အနည်းငယ်သာ လိုအပ်သည့် ၆၀ ရာခိုင်နှုန်းအထိ သန့်စင်ထားပြီးဖြစ်သော အီရန်၏ ယူရေနီယံ ၄၅၀ ကို ရယူရေးသည် အီရန်အပေါ် အမေရိကန်နှင့် အစ္စရေးတို့ ပူးတွဲစစ်ဆင်ရေး၏ ရည်မှန်းချက်တစ်ခု ဖြစ်သည်။
၎င်းကမ်းလှမ်းမှုသည် ပထမဆုံးအကြိမ် မဟုတ်ကြောင်းနှင့် အမေရိကန်ကလည်း ရုရှား၏ ကမ်းလှမ်းမှုကို လက်မခံခဲ့ကြောင်း၊ ထိုယူရေနီယံများကို လုံခြုံစွာ ရယူသွားရေးမှာ အမေရိကန်၏ ရပ်တည်ချက်ဖြစ်သည်ဟု ကန်အရာရှိကြီးက ဆက်ပြောသည်။
ပြီးခဲ့သည့် ဇွန်လတွင် အီရန်၏ နျူကလီးယားစခန်းများကို မတိုက်ခိုက်မီနှင့် လက်ရှိ အီရန်စစ်ပွဲ မစတင်မီ သီတင်းပတ်များကလည်း ရုရှားက အလားတူ ကမ်းလှမ်းခဲ့ကြောင်း သိရသည်။
ဒေါ်နယ်ထရမ့်ထံ ဖုန်းခေါ်ဆီုမှုအတွင်း သမ္မတပူတင်က စစ်ပွဲအဆုံးသတ်ရေး စိတ်ကူးများစွာကို တင်ပြခဲ့ကာ အီရန်၏ ယူရေနီယံများ ရုရှား ရယူထားရေးမှာလည်း တစ်ခုအပါအဝင် ဖြစ်သည်။
စစ်ပွဲမတိုင်မီ ပြုလုပ်ခဲ့သော အမေရိကန်နှင့် ဆွေးနွေးပွဲများတွင် ၎င်းတို့ပိုင် ယူရေနီယံများ လွှဲပြောင်းပေးရေး စိတ်ကူးကို အီရန်က ပယ်ချခဲ့ကာ ယင်းအစား နိုင်ငံတကာအဏုမြူစွမ်းအင်အေဂျင်စီ၏ ကြီးကြပ်မှုဖြင့် ၎င်းတို့အား အားပျော့သွားအောင် လုပ်ဆောင်ရေးကို တင်ပြခဲ့ကြောင်း သိရသည်။
ယူရေနီယံများလွှဲပြောင်းပေးရေးကို ယခုအချိန်တွင် အီရန်က လက်ခံသွားမည်လား ဆိုခြင်းမှာလည်း မရှင်းလင်းပေ။
စစ်ပွဲ၏ နောက်ပိုင်းအဆင့်များတွင် အီရန်၏ နျူကလီးယား ပိုင်ဆိုင်မှုများကို ရယူရေးအတွက် အမေရိကန်နှင့် အစ္စရေးတို့က အထူးတပ်ဖွဲ့များကို မြေပြင်သို့ စေလွှတ်ရေးကို ဆွေးနွေးခဲ့ကြသည်။
သီအိုရီအရဆိုလျှင် ပူတင်၏ကမ်းလှမ်းမှုသည် အမေရိကန်နှင့် အစ္စရေးတပ်ဖွဲ့ များကို စေလွှတ်စရာမလိုဘဲ အီရန်၏ နျူကလီးယား ပိုင်ဆိုင်မှုများကို ဖယ်ရှားရေး လုပ်ဆောင်နိုင်မည် ဖြစ်သည်။
သောကြာနေ့က ပြုလုပ်ခဲ့သော သတင်းစာရှင်းလင်းပွဲ တစ်ရပ်တွင်မူ အီရန်၏ နျူကလီးယား ပိုင်ဆိုင်မှုများကို ထိန်းချုပ်နိုင်ရန် အမေရိကန်တွင် နည်းလမ်းများစွာရှိကြောင်း အမေရိကန်ကာကွယ်ရေးဝန်ကြီး ဟက်ဆက်က ပြောကြားပြီး ၎င်းတို့အနက် နည်းလမ်းတစ်ခုမှာ ၎င်းပိုင်ဆိုင်မှုများကို အီရန်က ကိုယ်ပိုင်ဆန္ဒဖြင့် စွန့်လွှတ်ခြင်းဖြစ်သည်ဟု ဆိုသည်။
အေးကျော်
Ref: Axios
#MeKongNews
#အီရန်
#ယူရေနီယံ
#ရုရုား
#ပူတင်
#ထရမ့်
