မဲခေါင်၊ ဇန်နဝါရီ ၂၇
ကုန်ပစ္စည်းရောင်းချသည်ဟု ဖေ့စ်ဘွတ်ပေ့ချ်များမှတဆင့် လိမ်လည်ထားသည့် ထိုင်းဘတ်ငွေ သန်း ၃၀၀ ကို တာချီလိတ်နေသူ ၂ ဦးနှင့် ပူးပေါင်းကာ ငွေထုတ်ယူ ကျားဖြန့်ကွန်ယက်ကို ထိုင်းဗဟိုထောက်လှမ်းရေးဗျူရို – CIB က ဖော်ထုတ်ဖမ်းဆီးလိုက်ကြောင်း ကြေညာသည်။
CIB သည် မြန်မာနှင့် ထိုင်နှစ်နိုင်ငံ နယ်စပ်တစ်ကျော အခြေစိုက်ပြီး စျေးကွက်ဟန်ပြကာ ငွေကြေးများလိမ်လည်နေသည့် ကျားဖြန့်ကွန်ရက်ကို စုံစမ်းဖော်ထုတ်ရန် ဇန်နဝါရီ ၂၆ ရက်တွင် ထိုင်းနိုင်ငံ ခရိုင် ၄ ခုအတွင်း စီးနင်းရှာဖွေမှုများလုပ်ဆောင်ကာ ထိုင်းနှင့် မြန်မာ ၁၃ ယောက်ကို ဖမ်းဆီးနိုင်ခဲ့ကြောင်း ထုတ်ပြန်ကြေညာခဲ့သည်။
ယင်းရာဇဝတ်ကွန်ရက်သည် ဖေ့စ်ဘုတ်ပေ့ချ် B&J Diamond Auction House နှင့် YCN Bawornpat Tyres တို့ကို အသုံးပြုကာ ကုန်စည်များကို ဝယ်ယူရန် လိမ်လည်ဖျားယောင်းပြီး ဝယ်ယူရန် ငွေလွှဲပေးပြီးပါက မည်သည့် ကုန်ပစ္စည်းမှ မပို့တော့ဘဲ လိမ်လည်ခြင်းဖြစ်ကြောင်း၊ ယင်းမှရသည့် ဘတ်သန်း ၃၀၀ ကို မြန်မာနိုင်ငံဘက်သို့ လွှဲပေးခဲ့သည်အား စုံစမ်းသိရှိရသဖြင့် စီမံကိန်းချကာ ဘန်ကောက်၊ ရာယောင်း၊ ဖယားအို၊ ချင်းရိုင်ခရိုင်များရှိ နေရာများစွာအား ဝင်ရောက်စီးနင်းပြီး ထိုင်း ၁၀ ယောက်၊ မြန်မာ ၂ ယောက်နှင့် နိုင်ငံအထောက်အထားမဲ့ တစ်ယောက်တို့ကို ဖမ်းဆီးခဲ့ခြင်းဖြစ်ကြောင်း ဇန်နဝါရီ ၂၆ ရက် က သတင်းထုတ်ပြန်သွားခဲ့သည်။
အမှုတွဲတွင် ပါဝင်သည့် မြန်မာနှစ်ဦးမှာ တာချီလိတ်နေ ၂၇ နှစ်အရွယ် နော်ခမ်းနှင့် ၂၄ နှစ်အရွယ် မစ္စတာ ဆေးတို့ဖြစ်ကာ ထိုင်း ၁၀ ဦးထဲ ခေါင်းဆောင်လုပ်သူမှာ ၃၆ နှစ်အရွယ် ကရိုင်ဖတ် ဖြစ်ပြီး လိမ်လည် ငွေကြေးများကို ထိုင်းဘဏ်အကောင့်အတုများမှ ထုတ်ယူရန်တာဝန်ယူသည်မှာ ၂၄ နှစ်အရွယ် ထိုင်းနိုင်ငံသား ဂျီရာဆက်ဖြစ်ကြောင်း သိရသည်။
မြန်မာဘက်မှ ရာဇဝတ်ကွန်ရက်နှင့် ပူးပေါင်းကာ ငွေကြေး ခဝါချမှုကို တာဝန်ယူသူမှာ ၃၇ နှစ်အရွယ် ထိုင်းနိုင်ငံသား ကွန်နာရက်ဖြစ်ပြီး မြန်မာနိုင်ငံသား နော်ခမ်းနှင့် ခေါင်းဆောင် ကရိုင်ဖတ်တို့က ၂၀၁၅ ခုနှစ်ကတည်းက ထိုလိမ်လည်မှုလုပ်ငန်းများ လုပ်ဆောင်ခဲ့ကြောင်း ဝန်ခံခဲ့သည်ဟု ဆိုသည်။
ဖမ်းဆီးစဉ် မိုဘိုင်းဖုန်း၊ လျှပ်စစ်ပစ္စည်းများ၊ ကွန်ပျူတာ ၂ လုံး၊ ဘဏ်စာအုပ် ၂၄ အုပ်၊ အမျိုးမျိုးသော ဘဏ်ကတ်များအပါ သက်သေခံပစ္စည်း ၂၆ မျိုးကိုပါ သိမ်းဆည်းရမိကာ နော်ခမ်းသည် တာချီလိတ်တွင် အခြေချပြီး ကျားဖြန့်လုပ်ငန်းကွန်ရက်နှင့် ဆက်သွယ်ကာ ရွှေ့ပြောင်းလုပ်သားများ၏ ဘဏ်အကောင့်များကို စုစည်းပြီး ငွေကြေးခဝါချမှုအလုပ်များကို လုပ်ဆောင်ပေးခဲ့သည်ဟု သိရသည်။
နော်ခမ်းသည် ရွှေ့ပြောင်းလုပ်သား ဘဏ်အကောင့်များစွာမှတဆင့် လိမ်လည်ရရှိသည့် ငွေများကို ချင်းရိုင်ခရိုင်အတွင်း လိုက်ထုတ်ရာတွင် ကော်မရှင်ခ ၂၀ ရာခိုင်နှုန်း ရယူပြီး ခေါင်းဆောင် ကရိုင်ဖတ်က ထိုင်းဘဏ်အကောင့် တစ်ခုအား ငွေကြေးခဝါချမှုအတွက် တစ်နေ့ တစ်ကြိမ်သုံးလျှင် ဘတ် ၁၀၀၀ ရယူခြင်းဖြင့် ထပ်မံ အမြတ်ထုတ်ယူသည်ဟု သိရှိရသည်။
ကိုကလင်း
Ref: ejan
#MeKongNews
#ကျားဖြန့်
#တာချီလိတ်
#ထိုင်းနိုင်ငံသား
#ငွေကြေးခဝါချမှု
