မဲခေါင်၊ ဇန်နဝါရီ ၁၅
တောင်ကြီးမြို့နယ်၊ နောင်လေ ကျေးရွာအုပ်စုတွင် စစ်မှုထမ်း သတ်မှတ်ချက်နှင့် ကိုက်ညီသူများကို စစ်ကောင်စီက စစ်မှုထမ်းရမည်ဟု ခေါ်ယူနေသဖြင့် ရွာခံများ စိုးရိမ် ထိတ်လန့်နေကြောင်း ဒေသခံ သတင်းရင်းမြစ်မျ,ားက ပြောသည်။
အသက် ၁၈ နှစ်မှ ၄၀ အောက် ပြည်သူများ အနေဖြင့် ပြည်သူ့စစ်သင်တန်း တက်ရောက်ကာ စစ်ကောင်စီ လက်အောက်ခံ PNO အတွင်း ဝင်ရောက်ပြီး ဖြစ်သော်လည်း စစ်ကောင်စီတပ် အတွက် တပ်သားသစ် စုဆောင်းရေး ထပ်မံ ခေါ်လာခြင်း ဖြစ်သည်ဟု သတင်းရင်းမြစ်က ပြောသည်။
“အစက PNO ဝင်ရင် စစ်ကောင်စီထဲ ဝင်စရာမလိုဘူး ပြောလို့ ပြည်သူ့စစ်သင်တန်းကို အကုန်လုံး ကိုယ့်စရိတ်နဲ့ကိုယ် သွားတက်ပြီး PNO ထဲ ဝင်ထားကြတယ်၊ ရှေ့တန်းသွားရတယ်။ အခုက စစ်တပ်ထဲလည်း သွားရမယ်ဆိုတော့ မသွားချင်ကြဘူး၊ စစ်တပ်ထဲဝင်ရင် ရခိုင်ဖက်လည်း သွားရတယ် ကြားတော့ မသွားချင်ဘူး။ မိဘတွေကလည်း စစ်တပ်ထဲဆို မပေးသွားချင်ဘူး”ဟု နောင်လေအုပ်စု မူးရားရွာ ဒေသခံတစ်ဦးက ပြောသည်။
နောင်လေ ကျေးရွာအုပ်စုကို ယခင်တွင်လည်း စစ်ကောင်စီက စစ်မှုထမ်း ခေါ်ယူခဲ့ဖူးပြီး ယင်းအချိန်တွင် တစ်အိမ် ၅ သောင်း ငွေပေးပြီး ဖြေရှင်းခဲ့ဖူးသော်လည်း ယခု တစ်ကြိမ်တွင်မူ ငွေဖြင့် ဖြေရှင်းရန် ခက်ခဲနေသည်ဟုလည်း သတင်းရင်းမြစ်က ပြောသည်။
“အရင်တခေါက်က တစ်အိမ် ၅ သောင်းကောက်ပြီး ငွေပဲ ထည့်ပေးလိုက်တာ အဆင်ပြေတယ်။ အခု တစ်ခေါက်ကျ အဲလောက်ငွေနဲ့ မရတော့ဘူး ဆိုတော့ တအိမ်တစ်သိန်း ကောက်ပြီး ငွေပဲထည့်ဖို့ ပြန်ညှိနေတယ်။ စစ်တပ်ဘက်က သဘောတူမတူ မသိသေးဘူး”ဟု နောင်လေ ဒေသခံတစ်ဦးက ပြောသည်။
ထို့သို့ PNO ထဲဝင်ပြီး ဖြစ်သော်လည်း စစ်ကောင်စီက စစ်မှုထမ်း ထပ်ခေါ်မှုအတွက် PNO က ကူညီ ဖြေရှင်းပေးရန် ဒေသခံများက အကူအညီ တောင်းသော်လည်း ၎င်းတို့က ငြင်းဆန်ခဲ့သည်ဟု ဒေသခံတစ်ဦးက ပြောသည်။
“ဒီမှာရှိတဲ့ PNO ဗဟိုလုံခြုံရေး တပ်ရင်းကို စစ်တပ်ကို ညှိပေးဖို့ သွားအကူအညီ တောင်းတာ သူတို့နဲ့ မဆိုင်ဘူး အဲဒါ စစ်တပ်အလုပ် စစ်တပ်လုပ်တာ သူတို့ဘာမှ လုပ်ပေးလို့ မရဘူးတဲ့”ဟု ၎င်းက ဆိုသည်။
ပအိုဝ်းဒေသတွင် PNO နှင့် စစ်ကောင်စီက အပြိုင်အဆိုင် စစ်မှုထမ်း ခေါ်ယူနေမှုကြောင့် လူငယ် အများအပြားမှာ ထိုင်းနိုင်ငံသို့ တရားမဝင် လမ်းကြောင်းမှ ထွက်ပြေး တိမ်းရှောင် နေကြရသည်။
#MeKongNews
#တောင်ကြီး
#နောင်လေ
#စစ်ကောင်စီ
#စစ်မှုထမ်း
