မဲခေါင်၊ ဇန်နဝါရီ ၁၃
ရှမ်းပြည်တောင်ပိုင်းမှ ထွက်သော လက်ပံပွင့် အူတိုင်အခြောက်ကို တရုတ်ပွဲစားများက တစ်ပိဿာ ၆ ထောင် ကျပ်ဖြင့် ဈေးကောင်းပေး ဝယ်ယူလျက်ရှိကြောင်း ဒေသခံများထံမှ သိရသည်။
ယမန်နှစ်တွင် လက်ပံအူတိုင်ကို တစ်ပိဿာ ၄ ထောင်ကျပ်ဖြင့် ဝယ်ယူကြပြီး ယခုနှစ်တွင် တစ်ပိဿာ ၆ ထောင်ကျပ်ဖြင့် ဝယ်ယူသဖြင့် စားဝတ်နေရေး အခိုက်အတန့် ပြေလည်စေကြောင်း ဒေသခံများက ဆိုသည်။
“အခု တစ်နှစ်က အလယ်အူတိုင်ပဲ ဝယ်တယ်။ အရင်နှစ်ဆို အပွင့်လိုက်ရော၊ အလယ်အူတိုင်ရော ၂ မျိုးဝယ်တယ်။ ဝယ်တဲ့သူရှိတော့ ရှာကောက်တဲ့သူလည်း များတယ်။ “ဟု အင်းလေး ဒေသခံတစ်ဦးက မဲခေါင်သို့ ပြောသည်။
လက်ပံပွင့်အူတိုင်ကို ကျေးရွာအထိ တရုတ်ပွဲစားများက လာရောက် ဝယ်ယူသည ့်အပြင် အောင်ပန်းမြို့ ပွဲရုံများတွင် လည်း ဝယ်ယူလျက်ရှိကြောင်း ၎င်းက ဆက်ပြောသည်။
“ရှမ်းတောင်ဘက်ထွက်တဲ့ လက်ပံကိုပဲ ဝယ်ယူပါတယ်။ တရုတ် ဝယ်လက် အရမ်းများတယ်။ ကုန်ချိန် အကန့်အသတ်မရှိ ဝယ်ယူတယ်။ အညာဘက်နဲ့ တခြားဒေသထွက်တဲ့ လက်ပံတော့ မယူသေးဘူး။ ရှမ်း တောင်ဘက် ထွက်တဲ့ လက်ပံက ဆေးဖက်ဝင်တယ် တရုတ်တွေက ဆေးဖော်တဲ့ နေရာမှာသုံးတယ်”ဟု အောင်ပန်းမြို့ ကုန်စိမ်း ဒိုင်တစ်ဦးက မဲခေါင်သို့ ပြောသည်။
လက်ပံပွင့်သည် ဆီးချို၊ သွေးတိုး၊ ပန်းသေနှင့် မီးယပ်သမားများအတွက် ဆေးကောင်း တစ်ခွက်ဖြစ်စေပြီး ရင်သားကင်ဆာ၊ လေးဖက်နာ ရောဂါများအတွက် အကိုင်းနှင့် အမြစ်ကို သွေးလိမ်းပါက ရောဂါပိုး သေစေနိုင်ဟု ဆိုကြသည်။
လက်ပံပွင့်များမှာ ရှမ်းပြည်တောင်ပိုင်းရှိ အင်းလေးဒေသ၊ ညောင်ရွှေမြို့နယ်၊ ဆီဆိုင်မြို့နယ်၊ ဖယ်ခုံမြို့နယ်၊ ပင်လောင်းမြို့နယ်နှင့် ရာသီဥတုပူနွေးသော ဒေသများတွင် အများဆုံး ပွင့်ဖူးကြသည်။
#MeKongNews
#ရှမ်းတောင်
#လက်ပံပွင့်
#တရုတ်
#ဈေးကောင်း
