မဲခေါင်၊ ဒီဇင်ဘာ ၁၀
ရှမ်းပြည်အရှေ့ပိုင်း၊ မိုင်းလားမြို့ရှိ အထူးဒေသ – ၄ ရဲတပ်ဖွဲ့မှ တစ်ဆင့်ခံ တာဝန်ပေးထားသော ပေါင်အမ်းဟု ခေါ်သည့် လုံခြုံရေးများက ဆိုင်ကယ် ဖမ်းဆီးမှုများတွင် ကြမ်းတမ်း၊ ရိုင်းစိုင်းစွာ လုပ်ဆောင်နေကြောင်း ဒေသခံများက မဲခေါင်သို့ ပြောသည်။
၎င်းတို့သည် ပြည်မနှင့် အခြားနေရာများမှ လာရောက်သူများ ဖြစ်ကြပြီး ဆိုင်ကယ်ဖမ်းဆီးရာ၌ ပြည်သူများအား အော်ဟစ်ဆဲဆိုခြင်း၊ ကိုယ်ထိလက်ရောက် ကျူးလွန်ခြင်းများ လုပ်နေကြောင်း ဒေသခံများက ပြောသည်။
“ဆိုင်ကယ်ဖမ်းတာနဲ့ မတူဘူး၊ ဓားပြတိုက်နေသလိုပဲ။ ပြည်သူကိုလည်း အော်လိုက် ဆဲလိုက်နဲ့။ ယာဉ်ဖမ်းရင်လည်း ဒဲ့ဖမ်းပေါ့၊ ပုန်းပြီး ခိုးကြောင်ခိုးဝှက် ဖမ်းတယ်။ ဝန်ထမ်းတွေ လုပ်နေပြီး အသိပညာကို မရှိဘူး။ သတင်းပေါ်က ဓာတ်ပုံထဲမှာတော့ ဦးထုပ်ဆောင်း၊ လိုင်စင်လုပ်ဆိုပြီး ယာဉ်ဖမ်းတဲ့ပုံတွေတင်တော့ ယဉ်ယဉ်ကျေးကျေးနဲ့ လူတွေကို လုပ်ပြနေကြတာ။ အပြင်မှာတော့ တခြားဆီ။ လူတွေကို သူတို့ကျွန်တွေကျနေတာပဲ အော်ဆဲတယ်။ ဂုတ်တွေဆွဲပြီး ဖမ်းတယ်။ မိန်းကလေး တစ်ယောက်တည်းကိုလည်း ဆိုင်ကယ် ပြန်မလိုချင်တော့ဘူးလား ဆိုပြီး ခြိမ်းခြောက်တယ်” ဟု ဒေသခံတစ်ဦးက ပြောသည်။
ယခင်က ညပိုင်းတွင်သာ ဖမ်းဆီးခဲ့သော်လည်း လက်ရှိ၌ နံနက်ပိုင်းနှင့် နေ့ခင်းတွင်လည်း ဖမ်းဆီးလာသည်ဟု ဆိုသည်။
မိုင်းလား၌ ဆိုင်ကယ် ဦးထုပ်မပါလျှင် ဒဏ်ရိုက်သဖြင့် လူတိုင်းနီးပါး ဦးထုပ်ဆောင်းလာကြပြီး ယခုတွင် လိုင်စင်ပါ လုပ်ခိုင်းလာကြောင်း သိရသည်။
“ဒီမှာ တော်သင့်ရုံ ဆိုင်ကယ်ဆို ယွမ် ၆၀၀ လောက်နဲ့ ဝယ်လို့ရတယ်၊ လိုင်စင် ကိုယ်တိုင်ဆောင်ရင် ယွမ် ၆၀၀ က ဆိုင်ကယ်တစ်စီးစာရှိတော့ မဆောင်ကြဘူး။ ဖမ်းခံရလို့ ဆောင်ရရင် ဆိုင်ကယ်က ၆၀၀၊ လူလိုင်စင်က ၁၀၀၊ ဦးထုပ် ဟိုဟာ ဒီဟာနဲ့ ဒဏ်ကြေးက ၂၃၀ ဆိုတော့ ၁၀၀၀ လောက်ကျတာ။ လူတွေက စီးပွားရေး ကျပ်နေကြတော့ ယာဉ်လိုင်စင် မလုပ်ချင်ကြဘူးလေ” ဟု မူဆယ်မှ မိုင်းလားတွင် အလုပ်လာလုပ်သူတစ်ဦးက ပြောသည်။
လက်ရှိတွင် ဆိုင်ကယ်ဖမ်းခံရသဖြင့် ဒဏ်ကြေး ဆောင်ရခြင်းကို လက်ခံနိုင်သော်လည်း ကြမ်းတမ်းရိုင်းစိုင်းစွာ ဆက်ဆံမှုကို မိုင်းလားမှ တာဝန်ရှိသူများ သိစေလိုကြောင်း ဒေသခံများက ပြောသည်။
#MeKongNews
#မိုင်းလား
#ပေါင်အမ်း
#ဆိုင်ကယ်ဖမ်း
#ကြမ်းတမ်း
