မဲခေါင်၊ ဒီဇင်ဘာ ၁
မြန်မာနိုင်ငံတွင် ပြည်သူများခံစားနေရသည့် အခြေအနေများကို ထင်ဟပ်စေမည့် DVB Peacock Film Festival ပွဲတော်ကို ဒီမိုကရက်တစ်မြန်မာ့အသံ – DVB မှ ဦးစီးကာ ထိုင်းနိုင်ငံ၊ ချင်းမိုင်မြို့၊ ချင်းမိုင်တက္ကသိုလ်ရှိ Communication Innovation Center – IC တွင် သုံးရက်ကြာ ကျင်းပသွားမည် ဖြစ်ကြောင်း ပွဲတာဝန်ရှိသူများထံမှ သိရသည်။
ဒီဇင်ဘာ ၈ ရက်တွင် စတင်မည့် ယင်းပွဲတော်ကို ချင်းမိုင်မြို့ DVB ရုံးချုပ်မှ နိုဝင်ဘာ ၃၀ ရက်တွင် စတင်မိတ်ဆက်ခဲ့ကြောင်း သိရသည်။
“Giving Voice to the Voiceless” ဟု အမည်ရှိ ရုပ်ရှင်ခေါင်းစဉ်နှင့် မြန်မာနိုင်ငံတဝှမ်းရှိ ပြည်သူများ၏ လက်တွေ့ ဘဝ အခြေအနေများကို ထင်ဟပ်စေသော မှတ်တမ်းရုပ်ရှင် ဇာတ်လမ်းများကို ပြသသွားမည် ဖြစ်သည်။
ထို့ပြင် ပွဲတော်တွင် ပြည်သူပြည်သား သတင်းသမားများ ရိုက်ကူး ထုတ်လုပ်သော Ci Shots 2025 ရုပ်သံဆောင်းပါး အပါအဝင် ရုပ်ရှင်ကားပေါင်း ၃၀ ကျော်ကို ပြသသွားမည် ဖြစ်ကြောင်းသိရသည်။
ယင်းတို့မှာ လူ့အခွင့်အရေး ချိုးဖောက်မှု အသွင်ကူးပြောင်းရေးကာလ တရားမျှတမှု၊ စစ်ဘေးရှောင်များ၏ ဘဝဒုက္ခများနှင့် ပဋိပက္ခဒဏ် ခံနေရသည့် လူမှုအသိုက်အဝန်း၏ ကြံ့ခိုင်မှု စသည့် အကြောင်းအရာများကို ရိုက်ကူးထားသည့် မှတ်တမ်းရုပ်ရှင်များ ဖြစ်ကြောင်း DVB PFF ၏ ပွဲစီစဉ်သူ မချမ်းသီရိစိုးက ပြောသည်။
“ဒီပွဲတော်ဟာ အရုပ်တွေ အသံတွေကို ပေါင်းစပ်ထားတဲ့ ရုပ်ရှင်မဟုတ်ပါဘူး၊ ကျမတို့ ပြည်သူတွေရဲ့ မှတ်တမ်းတွေ၊ ဂုဏ်သိက္ခာတွေ၊ မျှော်လင့်ချက်တွေ ဖြစ်ပါတယ်။ ဒါကြောင့် ကျမတို့မှာ ရှိတဲ့ဘတ်ဂျက်နဲ့ ဒီပွဲ ဖြစ်မြောက်ရေးအတွက် အကန့်အသတ်တွေ ရှိနေပေမယ့် မြန်မာပြည်က အသံတွေကို ကမ္ဘာတစ်ဝှမ်းက ကြားနိုင်တဲ့အထိ ကျယ်ကျယ်ပြန့်ပြန့် ဖြစ်အောင် လုပ်ဆောင်ဖို့ ဆုံးဖြတ်ထားပါတယ်” ဟု ၎င်းက ပြောသည်။
ရုပ်ရှင်ပွဲတော်ကို ဝင်ကြေး သတ်မှတ်ထားခြင်းမရှိဘဲ အခမဲ့ တက်ရောက်နိုင်မည်ဖြစ်ပြီး ချင်းမိုင်မြို့ ရှိ မြန်မာနိုင်ငံသားများနှင့် တိုင်းရင်းသား လူမျိုးစုအားလုံး လာရောက် ကြည့်ရှုနိုင်ကြောင်းလည်း အသိပေးထားသည်။
ယင်းပွဲတော်ကို လာမည့်နှစ်တွင်လည်း ဆက်လက် ပြုလုပ်သွားရန်ရှိပြီး ရုပ်ရှင်ထုတ်လုပ်မှု ကုန်ကျစရိတ်များကို DVB က ပံ့ပိုးကူညီသွားမည် ဖြစ်ကြောင်းလည်း မချမ်းသီရိစိုးက မီဒီယာမိတ်ဆက်ပွဲတွင် ပြောသည်။
#MeKongNews
#DVB_Peacecock
#ရုပ်ရှင်ပွဲတော်
#ချင်းမိုင်မြို့
#Giving_Voice_to_the_Voiceless
