မဲခေါင်၊ နိုဝင်ဘာ ၃၀
ဈေးတွင် ကားဖြင့် အသားသွားရောင်းသည့် မြင်းကျဒိုး ပြည်သူ့စစ်ခေါင်းဆောင်နှင့် တပည့် ၂ဦးကို ရှမ်းပြည်တောင်ပိုင်း၊ ဓနုဒေသ ပင်းတယ-ရွာငံသွားကားလမ်းမပေါ်ရှိ မြင်းမူကျေးရွာ ကုန်းအတက်တွင် လက်နက်ကိုင်တစ်ဖွဲ့မှ ပစ်ခတ်သွားသည့်အတွက် သေဆုံးသွားကြောင်း ဒေသခံများထံမှ သိရသည်။
နိုဝင်ဘာ ၂၈ ရက် နံနက်၁၀နာရီ ခွဲခန့်က ပင်းတယ-ရွာငံသွားကားလမ်းပေါ် ကျုံးရွာနှင့် ပဲယင်းတောင်ရွားအကြား မြင်းမူရွာ ကုန်းအတက်၌ လက်နက်ကိုင်တစ်ဖွဲ့က Hijet ကားတစ်စီးကို ပစ်ခတ်သဖြင့် သေဆုံးသွားခြင်းဖြစ်ပြီး ကားလည်း ပျက်စီးကြောင်း မျက်မြင်တွေ့သည့် ဒေသခံများက ပြောသည်။
“သေတာ ရွာငံ မြင်းကျဒိုးပျူခေါင်းပေါင်း ဦးဝင်းမြင့်နဲ့သူ့တပည့် နှစ်ယောက်လို့ပြောတယ်။ အဲလမ်းပေါ်သွားနေတဲ့ တခြားကားတွေလည်း ရှပ်မှန်တာတွေရှိတယ်၊ ရဲတွေ တပ်တွေရောက်လာတယ်”ဟု ခရီးကြုံ မျက်မြင်တွေ့သူ တစ်ဦးက မဲခေါင်သို့ ပြောသည်။
မင်းကျဒိုးကျေးရွာတွင် နေထိုင်သည့် ဦးဝင်းမြင့်နှင့် ၎င်း၏တပည့်နှစ်ဦးသည် ကျုံးဈေးသို့ Hijet ကားဖြင့် အသားသွားရောင်းရာ မြင်းမူသဲကျင်းအကျော် ပဲရင်းတောင်ကျေးရွာအနီးတွင် အသတ်ခံရခြင်းဖြစ်ကြောင်း သိရသည်။
အသတ်ခံရသည့် ဦးဝင်းမြင့်သည် ပျူစောထီးခေါင်းဆောင်တစ်ဦးဖြစ်ပြီး ပြည်သူများအပေါ် ဆက်ကြေးကောက် ခြိမ်းခြောက်ပြီး အာဏာသိမ်းစစ်တပ်ကို ရွာများသို့လမ်းပြခေါ်ဆောင်ကာ ရွာသားများကို ဖမ်းဆီးသည်များကြောင့် နာမည်ဆိုးဖြင့် ကျော်ကြားသူတစ်ဦးဖြစ်ကြောင်း ဒေသခံများက ပြောသည်။
၎င်း၏လမ်းပြမှုဖြင့် စစ်ကောင်စီတပ်သည် ရွာငံမြို့နယ်အတွင်း စစ်ကြောင်းထိုးနေသလို တော်လှန်ရေးအင်အားစုများနှင့် ဆက်စပ်သည်ဟု စွပ်စွဲပြီး ကျောက်ကထိကျေးရွာမှအမျိုးသား ၃ဦး၊ သိမ်ကုန်းကျေးရွာမှ အမျိုးသားတစ်ဦး၊ ပဲရင်းတောင်ကျေးရွာမှ အမျိုးသား ၂ဦးနှင့် အမျိုးသမီး တစ်ဦး၊ နွားဘန်းကြီးကျေးရွာနှင့် အမျိုးသား ၂ဦး၊ ငါးဆူကျေးရွာမှ အမျိုးသား ၃တို့ကို ဖမ်းဆီးသွားခဲ့ပြီး ယခုထိ အဖမ်းခံရသူများ ပြန်လည်လွတ်မြောက်ခြင်းမရှိသေးကြောင်း သိရသည်။
ယင်းကိစ္စနှင့် ပတ်သက်ပြီး နယ်မြေအတွင်း လှုပ်ရှားနေသည့် တော်လှန်ရေးတပ်ဖွဲ့များကမူ တစုံတရာ ထုတ်ပြန်ခြင်းမရှိသေးပေ။
“ဘယ်အဖွဲ့က ပစ်ခတ်သွားတယ်ဆိုတာ မသိရသေးဘူး။ ဦးဝင်းမြင့်က စစ်တပ်အတွက် လူစုပေးတာတွေ သတင်းပေးတာတွေလည်း လုပ်တယ်။ ပြီးရင် ပျူစောထီးတွေကို သင်တန်းပေးနေတဲ့သူဖြစ်တယ်။ တော်လှန်ရေးအဖွဲ့တွေလည်း သူ့ကို ခနခနလုပ်ကြံတယ်၊ မသေဘဲလွှတ်နေတာ” ဟု ဒေသခံ သတင်းရင်းမြစ်က မဲခေါင်သို့ပြောသည်။
ဦးဝင်းမြင့်နှင့် အဖွဲ့ဝင် ၂ဦး ပစ်ခတ်သတ်ဖြတ်ခံရပြီးနောက် စစ်ကောင်စီတပ် အင်အားအများအပြားဖြင့် ရောက်လာပြီး ပဲရင်းတောင်ရွာထဲနှင့် အနီးတစ်ဝိုက်ကျေးရွာများတွင် လုံခြုံရေး လာယူနေကြောင်းသိရသည်။
ပြီးခဲ့သည့် နိုဝင်ဘာလ ၂၆ ရက် ညပိုင်းကလည်း အောင်ပန်း- ရွာငံကားလမ်းပေါ်ရှိ မြိုင်ကျေးရွာတွင် အမျိုးသားတစ်ဦးကို အမည်မသိလက်နက် ကိုင်တစ်ဖွဲ့က သတ်ဖြတ်သွားသည့် ဖြစ်စဥ်ရှိခဲ့သေးသည်။
ပြီးခဲ့သည့် အောက်တိုဘာလ ၃၀ရက်ကလည်း DSNDAက ရိက္ခာသယ်ပြီးပြန်လာသည့် စစ်ကော်မရှင်တပ်ကို ရွာငံမြို့နယ်၊ ရနဲကျေးရွာအနီးမှာ ပျောက်ကြားတိုက်ခိုက်မှုကြောင့် စစ်ကော်မရှင်တပ်ဖက်က ၂ဦးသေဆုံး၊ တစ်ဦးပြင်းထန်ဒဏ်ရာရရှိခဲ့ပြီး သေနတ်တစ်လက် သိမ်းဆည်းရမိခဲ့သည့်ဖြစ်စဥ်ရှိခဲ့သေးသည်။
#MeKongNews
#ရွာငံ
#မြင်းကျဒိုး
#ပျူစောထီး
#ပြည်သူ့စစ်
