မဲခေါင်၊ နိုဝင်ဘာ ၂၈
ရှမ်းမြောက်မှ တရားမဝင်ကုန်စည် တင်ဆောင်သည်ဟုဆိုကာ ရှမ်းပြည်တောင်ပိုင်း၊ ရပ်စောက်မြို့၌ စစ်ကောင်စီတပ်က ကားများကို လိုက်လံဖမ်းဆီးနေရာ နိုဝင်ဘာ ၂၆ ရက်တွင်လည်း ကုန်ကား ၄ စီး ထပ်မံဖမ်းဆီးထားကြောင်း ဒေသခံများထံမှ သိရသည်။
ယင်းကားများတွင် တရုတ်ပြည်ထွက် ကြက်သွန်ဖြူများ တင်ဆောင်ထားကြောင်း သိရပြီး အခြားကား ၁၀ စီးကျော်ကို လိုက်လံ ဖမ်းဆီးသော်လည်း မမိခဲ့ကြောင်း ဒေသခံတစ်ဦးက ဆိုသည်။
“ညောင်ပင်သာ ကိုရင်လေးကျောင်းကို ၁၀ စီး ဖြတ်ပြေးကြတယ် လိုက်တာမမီကြလို့တဲ့။ အခုက ၄ စီးပဲမိတာ”ဟု ၎င်းက ဆိုသည်။
ပြီးခဲ့သည့် နိုဝင်ဘာ ၁၃ ရက်ကလည်း နောင်ဝိုး – ရပ်စောက် လမ်းကြောင်းမှ ဖမ်းမိသည့် ကုန်ကား ၆၀ ခန့်နှင့် ယာဥ်မောင်းများကို စစ်ကောင်စီ ရပခဗျူဟာမှူးကိုယ်တိုင် ကွင်းဆင်းဖမ်းဆီးကာ တပ်နယ်တွင် ထိန်းသိမ်းထားပြီးနောက် နိုဝင်ဘာ ၁၆ ရက်တွင် ရပ်စောက်ရဲစခန်းသို့ လွှဲအပ်အမှုဖွင့်ခဲ့ပြီး ယခု ထပ်မံဖမ်းဆီးခြင်းဖြစ်သည်။
ဖမ်းမိထားသည့် ကုန်တင်ယာဥ်များမှ ယာဥ်မောင်းများကို စစ်တပ်၊ စရဖ၊ ရဲများမှ လာရောက် စစ်ဆေးနေကြသည်ဟု ရပ်စောက်ဒေသခံတစ်ဦးက ပြောသည်။
“လာတော့စစ်နေကြတယ်။ ပစ္စည်းအမျိုးအစား အရေအတွက်တွေကို ခုထိတော့ ဘယ်လိုချမှတ်မယ် မသိရသေးဘူး”ဟု ၎င်းက ပြောသည်။
“ရပ်စောက်မြို့မှာ မိထ္ထီလာရဲမှူး၊ ဟိုရဲမှူး၊ ဟိုစစ်တပ်၊ စရဖ၊ လူကြီးတွေ စုံပလုံနေအောင် ဖမ်းထားတဲ့ ကားကိစ္စတွေနဲ့ ပတ်သက်ပြီး အစစ်ဆေးတွေ လာလုပ်နေကြပါတယ်ဆိုမှ ထပ်ပြီးကား ၄ စီး ထပ်ဖမ်းခံရ ပြန်တယ်”ဟု အခြား ဒေသခံတစ်ဦးကလည်း ၎င်း၏ လူမှုကွန်တွင် ရေးသားထားသည်။
ယင်းဖမ်းဆီးမှုများ မတိုင်ခင် မူဆယ် ၁၀၅ မိုင်က ထွက်လာသည့် ကုန်ကားအားလုံးကို တားမြစ်ဖမ်းဆီးရန် စစ်ကောင်စီက အမိန့်ထုတ်ထားကြောင်း ကုန်သည်များထံမှ သိရသည်။
#MeKongNews
#ရပ်စောက်
#တရားမဝင်ကုန်
#စစ်ကောင်စီ #ကားဖမ်း
