*[အောက်တိုဘာ ၅ ရက်၊ နေ့လည် ၁၂ နာရီ ၄၃ မိနစ်တွင် နောက်ဆုံးရအချက်အလက်များကို ဖြည့်စွက်ပြင်ဆင်ထားသည်]
မဲခေါင်၊ အောက်တိုဘာ ၅
ဆိုင်ကယ်ကို တိုက်ပြီးနောက် မောင်းပြေးသည့်ကားမှ အခြားဆိုင်ကယ်များ၊ ကားများနှင့် လမ်းဘေးဆိုင်များကိုပါ ဆက်တိုက်ဆင့်ကာ တိုက်မိသည့်အတွက် ကလေးငယ်တစ်ဦးနှင့် ၎င်း၏ မိခင်ဖြစ်သူတို့ သေဆုံးကာ ၈ဦး ဒဏ်ရာရပြီး ၂ဦးမှာ ဦးခေါင်းထိခိုက်ကာ စိုးရိမ်ရကြောင်း ဒေသခံများနှင့် ရဲတပ်ဖွဲ့နှင့် နီးစပ်သူထံမှ သိရသည်။
ယာဉ်မောင်းသူ ရှမ်းလူမျိုး အိုက်ကျိုင်းဆိုသူ မောင်းနှင်ပြီး ဘေးတွင် ထိုင်းနိုင်ငံသားတစ်ဦး လိုက်ပါလာသည့် Ford RAPTOR ယာဉ်မှာ ဗိုလ်ချုပ်လမ်း၊ ဆေးရုံဟောင်းရှေ့တွင် ဆိုင်ကယ်တစ်စီးကို တိုက်မိပြီး မောင်းပြေးရာ အထက တာချီလိတ် လမ်းဆုံးအနီးတွင် နောက်ထပ် ဆိုင်ကယ်တစ်စီးနှင့် ဟွန်ဒါဖစ်ကားတစ်စီးကို တိုက်မိခြင်းဖြစ်ကြောင်း ယာဉ်ထိန်းရဲနှင့် နီးစပ်သူတစ်ဦးက ပြောသည်။
ယာဉ်တိုက်မှုကြောင့် ကလေးငယ်တစ်ဦးနှင့် မိခင်ဖြစ်သူတို့ ပွဲချင်းပြီး သေဆုံးကာ အမျိုးသား ၃ဦး၊ အမျိုးသမီး ၅ဦး ဒဏ်ရာရကြောင်း၊ ဒဏ်ရာရသူများအနက် အမျိုးသားတစ်ဦးနှင့် အမျိုးသမီးတစ်ဦးမှာ ဦးခေါင်းထိခိုက်ကာ စိုးရိမ်ရသည့်အခြေအနေဖြစ်ကြောင်း၊ တစ်ဦးမှာ ခြေထောက်ကျိုးသွားကြောင်း လူမှုကူညီရေးပြုလုပ်နေသည့် ကိုလှမိုးတာချီလိတ်လူမှုကူညီရေးအသင်း တာဝန်ရှိသူတစ်ဦးက ပြောသည်။
တာချီလိတ်တွင် ယာဉ်တိုက်ပြီး မောင်းပြေးသည့်ကား ဆက်တိုက်ဆင့်တိုက်မှုကြောင့် လူ ၅ဦးခန့် သေဆုံး [မူရင်းသတင်း – အောက်တိုဘာ ၅ရက်၊ နေ့လည် ၁၂နာရီ]
မဲခေါင်၊ အောက်တိုဘာ ၅
ဆိုင်ကယ်ကို တိုက်ပြီးနောက် မောင်းပြေးသည့်ကားမှ အခြားဆိုင်ကယ်များ၊ ကားများနှင့် လမ်းဘေးဆိုင်များကိုပါ ဆက်တိုက်ဆင့်ကာ တိုက်မိသည့်အတွက် လူ ၅ဦးခန့် သေဆုံးသွားကြောင်း တာချီလိတ်ဒေသခံများထံမှ ကနဦးသိရသည်။
ယနေ့နံနက် ၁၁နာရီခွဲခန့်တွင် တာချီလိတ်၊ ဗိုလ်ချုပ်လမ်းမကြီးပေါ်တွင် ဆက်တိုက်ယာဉ်တိုက်မှုဖြစ်ပွားခဲ့ခြင်းဖြစ်ပြီး ယာဉ်မောင်းသူနှင့် အတူပါလာသူတစ်ဦးမှာ တရုတ်နိုင်ငံသားများ ဖြစ်ကြောင်း ကနဦး မေးမြန်းချက်များအရ သိရသည်။ [Update] ဝိုင်းဖမ်းရာတွင် ထိုင်းစကားပြောသံကြားရပြီး ထိုင်းနိုင်ငံသားများဖြစ်ကြောင်းလည်း ပြောဆိုကြသည်။ ဖြစ်စဉ်အတိအကျကို မဲခေါင်မှ စုံစမ်းဆဲဖြစ်သည်။
ဒေသခံများ ပြောဆိုချက်အရ တရုတ်နိုင်ငံသားများမှာ တာချီလိတ်မြို့၊ ရွှေတိဂုံဘုရားဝန်းကျင်တွင် ယာဉ်တိုက်မှုစတင်ဖြစ်ပွားခြင်းဖြစ်ပြီး မောင်းပြေးလာရာ လမ်းတလျှောက်တွင်လည်း နောက်ထပ် ယာဉ်တိုက်မှုများ ဆက်ဖြစ်ခဲ့သလို နောက်ဆုံး၌ တာချီလိတ် အထက ကျောင်းရှေ့တွင် တိုက်မိခြင်းဖြစ်ကြောင်း သိရသည်။ ဖြစ်စဉ် အသေးစိတ်နှင့် အတိအကျကိုမူ မဲခေါင်သတင်းဌာနမှ စုံစမ်းနေဆဲဖြစ်သည်။
#MeKongNews
#တာချီလိတ်
#ယာဉ်တိုက်မှု
#တရုတ်နိုင်ငံသား
