မဲခေါင်၊ သြဂုတ် ၅
ရှမ်းပြည်အရှေ့ပိုင်း၊ တာချီလိတ်ဒေသခံများ ပြုလုပ်ခွင့်ရသည့် တစ်နှစ်သက်တမ်းရှိနယ်စပ်ဖြတ်သန်းခွင့် BP စာအုပ် (စာအုပ်အပြာ) ပြုလုပ်ခွင့်မှာ ရေကြီး၍ စက်ပျက်ပြီး ရပ်ဆိုင်းထားသဖြင့် စာအုပ်သက်တမ်းကုန်၊ အသစ်လဲလိုသူများ အခက်ကြုံနေကြရကြောင်း သိရသည်။
မယ်ဆိုင်ချောင်းရေ တက်တိုင်း ရေနစ်မြုပ်နေကျဖြစ်သည့် တာချီလိတ်-မယ်ဆိုင် အမှတ်(၁) ချစ် ကြည်ရေး တံတားအောက်ရှိ နေ့စဉ် ဖြတ်သန်းသွားလာခွင့်ပြု လက်မှတ်များ ပြုလုပ်ရာ TBP/BPအရောင်းကောင်တာများ ရေနစ်မြုပ်ပြီး ဆာဗာလိုင်းများ ပျက်စီးနေသည့်အကြောင်းပြချက်ဖြင့် ဖြတ်သန်းခွင့်တစ်နှစ် စာအုပ်များကို အသစ်ပြုလုပ်ခြင်း၊ သက်တမ်းတိုးလဲလှယ်ခြင်းများ ခေတ္တရပ်နားထားခြင်းကြောင့် ယခုလို အခက်အခဲဖြစ်နေကြောင်း သိရသည်။
“ရေက ခုမှ မဟုတ်ပါဘူး၊ ခဏခဏမြုပ်နေတာ၊ အရင်က မဖြစ်ဘဲ ခုမှ ဖြစ်တာ၊ ဘာဖြစ်ရင် ဘာလုပ်မယ်ဆိုတဲ့ အရန်ပလန်လည်းမရှိဘူး။ ခုကျ ယာယီကတ်နဲ့ဖြတ်ရတော့ လူများပြီး တန်းစီတာကြာတဲ့အပြင် ငွေပိုကုန်ရတယ်”ဟု ဒေသခံတစ်ဦးက မဲခေါင်ကို ပြောသည်။
တစ်နှစ်စာအုပ်များ သက်တမ်းတိုးမရချိန်တွင် တစ်ပတ်ကတ်ဖြင့် သွားရောက်ရန်အတွက် တန်းစီးရကြောင်း၊ တစ်ပတ်ကတ်ပြုလုပ်ရာတွင်လည်း စက်များပျက်သည့်အတွက် ကြန့်ကြာမှုများဖြစ်နေပြီး လူတန်းရှည်ဖြင့် အချိန်ကြာမြင့်စွာတန်းစီနေရကြောင်း တာချီလိတ်ဒေသခံများက ညဉ်းညူသည်။
“အဓိက ရေကြီးလို့ အောက်မှာ လုပ်မရလို့ အပေါ်မှာပဲ တန်းစီရတယ်။ ဒုတိယ ဆာဗာ မလည်ပတ်နိုင်လို့ ဆိုပြီးပြောတယ်။ တတိယ စာအုပ်သမားတွေလည်း သက်တမ်းတိုးမရတော့ တစ်ပတ်ဟာနဲ့ပဲ တန်းစီရတော့ လူများတာထက် များသွားတယ်။ မနေ့ည ကျနော်ပြန်လာတဲ့ချိန် အဝိုင်းပတ်နားထိ ရှိတယ် တန်းစီတဲ့သူတွေ” ဟု ဒေသခံတစ်ဦးက ပြောသည်။
စာရင်းပျောက်၊ စာအုပ်ပျောက်မှာ ဘတ်၂၀၀ပေးဆောင်ရသော်လည်း ယခုအခါ စာအုပ်လုပ်မှု ရပ်ဆိုင်းထားသဖြင့် ယာယီကပ်လုပ်ပြီးကူးရာတွင် မြန်မာကျပ် တစ်ထောင်နှင့် ဘတ်ငွေ ၂၀ ပေးဆောင်နေကြရကြောင်း၊ တစ်နေ့လျှင် ၂ကြိမ်သွားရသူများအတွက် ငွေကြေးပိုမိုကုန်ကျစေသလို အချိန်များစွာပိုပေးရကြောင်း၊ တစ်နှစ်စာအုပ်များ အမြန်ပြန်လည် လုပ်ဆောင်ပေးစေလိုကြောင်း မကာဟိုခမ်း ရပ်ကွက်နေသူတစ်ဦးကဆိုသည်။
“ကျမတို့က ကလေးတွေကို ဟိုဘက်ကမ်းမှာထားတော့ တစ်ရက်၂ခေါက် အသွားအပြန်ကြိုနေရတာ မလွယ်ဘူးလေ” ဟု ၎င်းကဆိုသည်။
စက်များပျက်၍ စာအုပ်လုပ်ခွင့် ရပ်ဆိုင်းထားသည် ဆိုသော်လည်း ယင်းစာအုပ်ရရန်အတွက် ယာယီကပ်ပြုလုပ်ပေးသည့်အနားမှ ပွဲစားများကမူ ဘတ်၈၀၀ဖြင့် ပြုလုပ်ပေးနိုင်ကြောင်း ဒေသခံတစ်ဦးကပြောသည်။
တာချီလိတ်တွင်နေထိုင်သူတစ်ဦးအနေဖြင့် တစ်နှစ်စာအုပ်ကို အိမ်ထောင်စုစာရင်း၊ ရပ်ကွက်နှင့် ရဲထောက်ခံချက်များဖြင့် လဝကတွင် ဘတ်ငွေ ၁၀၀ ကျပ်ပေးသွင်း လုပ်နိုင်ပြီး တံတားဖြတ်ခ တစ်ခေါက်လျင် မြန်မာဘက်၌ မြန်မာကျပ်၃၀၀ သာပေးသွင်းရကြောင်းသိရသည်။
တစ်ဖက် ထိုင်းနိုင်ငံမယ်ဆိုင်မြို့သို့ ယာယီကတ်ဖြင့် ကူးပြီး နေ့ချင်းပြန်မဟုတ်ပါက ၇ ရက်နေထိုင်ခွင့်ရရန် ထိုင်းလဝကသို့ ဘတ် ၅၀ ပေးသွင်းရကြောင်း သိရသည်။
တာချီလိတ် အမှတ် (၁) ချစ်ကြည်ရေးတံတားပေါ်တွင် နေ့စဉ်ကူးလူးဖြတ်သန်းမှုမှာ လူဦးရေ ၃ ထောင်နှင့် ၅ ထောင်ကြား ရှိနေပြီး ယခင်က TBP/BP စာရွက်များအား စက် ၅ လုံးနှင့် တပြိုင်နက် လုပ်ဆောင်ပေးနိုင်ခဲ့သော်လည်း ယခုအခါစက် ၃ လုံးနှင့်သာ လုပ်ဆောင်နေရခြင်းကြောင့် တန်းစီသူများပြားနေခြင်းဖြစ်ကြောင်း လဝကဘက်မှ ပြောဆိုထားသည်။
မဟာ
#MeKongNews
#တာချီလိတ်
#နယ်စပ်ဖြတ်ကျော်ခွင့်
#စာအုပ်အပြာ
#လဝက
#ရေကြီး
#စက်ပျက်
