မဲခေါင်၊ ဇူလိုင် ၁၃
တာချီလိတ်မြို့တွင် နေစဉ်ပင် ဆိုင်ကယ်များခိုးယူခံနေရပြီး သူခိုးများကို ရဲတပ်ဖွဲ့မှ ဖမ်းဆီးနိုင်ခြင်း မရှိသည့်အတွက် လွန်စွာသောင်းကျန်းနေကြောင်း ဒေသခံများထံမှ သိရသည်။
၂၀၂၅ ခုနှစ် ဇွန်လနှင့် ဇူလိုင်လများအတွင်း တာချီလိတ်မြို့တွင် ဆိုင်ကယ်နေ့စဉ် အနည်းဆုံးတစ်စီး ခိုးယူခံနေရပြီး ရဲတပ်ဖွဲ့မှ ဖမ်းဆီးနိုင်ခြင်း လုံးဝမရှိကြောင်း ဒေသခံများက ဝေဖန်နေကြသည်။
ယခု ဇူလိုင်လဆန်းပိုင်းတွင်ပါ ဆိုင်ကယ်ခိုးယူခံရသူများထံ ဆက်သွယ်မေးမြန်းချက် အရ နေ့ခင်းဘက်သာမက ညအချိန် ခြံတံခါးများကို ချိုးဖက်၍ ဝင်ရောက်ခိုးယူခဲ့ခြင်းများ ရှိခဲ့ကြောင်း ဆိုင်ကယ်ခိုးခံရသူနှင့် နီးစပ်သူတစ်ဦးက ပြောသည်။
“ခြံတံခါးမကြီးရော အိမ်တံခါးရော သော့တွေကို ချိုးဖျက်ပြီး ဝင်ခိုးတာ၊ ဆိုင်ကယ် ၂ စီးလုံးလည်း သော့တွေရော၊ ဇက်သော့တွေရော ခတ်ထားတာ” ဟု ၎င်းကပြောသည်။
ဇူလိုင်လ ၁၀ ရက် နံနက်အစောပိုင်းက တာချီလိတ်မြို့နယ်၊ ဟွေလေလန်၊ အာခါရွာတွင် ၂၀၂၃ ခုနှစ် ထုတ် ဆိုင်ကယ် အဖြူနှင့် အနက်ရောင် ၂ စီးလုံး ခိုးခံခဲ့ရသည်။
အလားတူ ဇူလိုင်လ ၁၀ ရက်၊ နံနက်ပိုင်း ၁၀ နာရီခန့်က ကလေးကျောင်းပို့ပြီးပြန်လာသည့် ပါဆတ်ဘုန်းကြီးကျောင်းဘေး တိုင်ခန်းနေပြည်သူတစ်ဦး၏ ဆိုင်ကယ်ကို လူ ၂ ဦးက ဇက်သော့ချိုးဖျက်ကာ ခိုးယူသွားသည်။
ဇူလိုင်လ ၂ ရက်ကလည်း ပုံလို့ (၁) လမ်းတွင် SHN 39158 နံပတ်ပါ ဆိုင်ကယ်တစ်စီး ပျောက်ဆုံးခဲ့ကြောင်း သိရသည်။
ပြီးခဲ့သည့် ဇွန်လအတွင်း ဆိုင်ကယ်ခိုးယူခံရမှုများကို မဲခေါင်မှ စာရင်းမှတ်သားထားရာ အနည်းဆုံး ၂၅ စီးရှိပြီး တစ်စီးမျှ ပြန်လည်ဖမ်းမိရရှိခြင်း မရှိသေးကြောင်း စုံစမ်းသိရသည်။
ရဲများအနေဖြင့် ဆိုင်ကယ်သူခိုးများကိုသာမက ခိုးဘီးများကို ဝယ်ယူသည့်သူများ၊ အပေါင်လက်ခံသည့် နေရာများကိုလည်း သိလျက်နှင့် အရေးမယူကြောင်း ဆိုင်ကယ်ပျောက်ဆုံး နစ်နာနေသူတစ်ဦးက ပြောသည်။
“ရဲစခန်းတိုင်လည်း တိုင်တိုင်ပဲ။ ဆိုင်ကယ်ခိုးပြီး သွားပေါင်တဲ့နေရာကအစ သိပြီးတာတောင် ပြန်မရဘူး။ ရဲတွေက အဲ့ဒီသူခိုးတွေကို မသိတာမဟုတ်ပါဘူး၊ သူတို့အကုန်သိတယ်။ ကိုယ့်ကို အဲဒီသူခိုးကို ပြန်ဖမ်းခိုင်းနေတာ၊ အပေါင်လက်ခံတဲ့သူကလည်း သူတို့အချင်းချင်း အလိမ်ကကျစ်တွေဘဲ။ ခိုးလာသမျှ အကုန်လက်ခံတာ။ အဲ့ကြောင့် ပျောက်တာဘယ်တွေ့မလဲ။ ပြန်မရနိုင်မှန်း သိတဲ့အကြောင်းကို ဒဲ့ဘဲပြောပြလိုက်တယ်။ ဘာကြောင့်မရလဲဆို လုပ်စားနေလို့ ပြန်မရတာ” ဟု ၎င်းက ပြောသည်။
တာချီလိတ်မြို့တွင် ဆိုင်ကယ်သူခိုးလက်ခံ ၂ ဦး၊ ၃ ဦးရှိပြီး ယင်းထဲမှ နာမည်ကြီးသူမှာ ယခင်က ကျောက်တောင်အရပ်မှ သားကြီး ဆိုသူဖြစ်ကြောင်း၊ လတ်တလောတွင် ၎င်းနေရာ၌ ရဲဝင်း ဆိုသူ ဝင်ရောက်လုပ်ကိုင်နေကြောင်း၊ ရဲဝင်းမှာ သူခိုးလက်ခံအဖြစ် ဆောင်ရွက်ရုံသာမက ငါးပစ်ဂိမ်းခုံများကိုလည်း လိုင်းကြေးယူကာ စောင့်ရှောက်ပေးသူဖြစ်ကြောင်း ဒေသခံများထံမှ သိရသည်။
ဆိုင်ကယ်ခိုးခံရသူ ပြည်သူများမှာ ဆိုင်ကယ်များကို ခိုးယူနေသည့် CCTV မှတ်တမ်းဓာတ်ပုံများ အတိအကျပေးပြီး စခန်းသို့ သွားရောက်တိုင်ကြားသော်လည်း ထိရောက်သည့် အရေးယူလုပ်ဆောင်မှု မရှိခြင်းကြောင့် တာချီလိတ်နေ ပြည်သူများအနေဖြင့် ဆိုင်ကယ်များ ပျောက်ဆုံးသွားသည့်အခါ မည်သို့မျှမတတ်နိုင်ဘဲ အွန်လိုင်းပေါ်တွင်သာ အကူအညီတောင်းခံ ရှာဖွေနေကြရသည်ဟု ဆိုကြသည်။
မဟာ
#MeKongNews
#တာချီလိတ်
#ဆိုင်ကယ်သူခိုး
#သူခိုးလက်ခံ
#ရှမ်းအရှေ့
