မဲခေါင်၊ ဇွန် ၄

ကျိုင်းတုံမြိုနယ်၊ လယ်ယာမြေစီမံခန့်ခွဲရေးနှင့် မြေစာရင်းဦးစီးဌာနမှ မြေတိုင်းစာရေး (၄) ခိုင်မင်းဦးမှ လာဘ်စားကာ မြေဂရန်အတုများပြုလုပ်ပေးခြင်း၊ စာချုပ်အတုများပြုလုပ်ခြင်းနှင့် တစ်ဖက်သတ်အမည်ပေါက်ပြုလုပ်ပေးခြင်းများကြောင့် ဒေသခံအများအပြား ဒုက္ခရောက်ခဲ့ကြောင်း ဒေသခံများက မဲခေါင်ထံ သတင်းပေးပို့လာသည်။

ကျိုင်းတုံမြို့နယ်အတွင်းရှိ လယ်မြေများကို ခိုင်မင်းဦးက ငွေပေးသူနှင့်ပေါင်းကာ အခြားသူအမည်ပေါက် ပြုလုပ်ပေးသည့်အတွက် နစ်နာခဲ့ရသည့် တိုင်းရင်းသားလယ်ပိုင်ရှင်များစွာရှိကြောင်း၊ မူလပိုင်ရှင်ရှိသည့် လယ်မြေများကို မြေစာရင်းနှင့် သူကြီးတို့ပူးပေါင်းကာ လာဘ်ငွေရယူပြီး အမည်ပေါက်ပြောင်းလဲပေးခဲ့ခြင်း ဖြစ်ကြောင်း လွယ်မွေကျေးရွာအုပ်စုနေ ကိုယ်တိုင်နစ်နာခဲ့ရသူနှင့် နီးစပ်သူ တစ်ဦးက ပြောသည်။

ကျိုင်းတုံမြို့ပေါ်ရှိ ပိုင်ဆိုင်မှု အငြင်းပွားနေသည့် အိမ်ခြံမြေများကိုလည်း အိမ်ဂရံအမည်ပေါက်ပြောင်းလဲပေးခြင်း၊ အိမ်ဂရံအသစ်ထုတ်ပေးခြင်း၊ အိမ်ဂရံအတုပြုလုပ်ပေးခြင်း၊ စာချုပ်အတုပြုလုပ်ပေးခြင်းတို့ကို ငွေရှိသူများထံမှ လာဘ်ငွေရယူကာ မြေတိုင်းစာရေး ခိုင်မင်းဦးက ပြုလုပ်ပေးကြောင်း၊ ကိစ္စရပ်တစ်ခုအတွက် လာဘ်ငွေ ကျပ် သိန်း ၄၀၀၊ ၅၀၀ တောင်းခံကြောင်း ဖြစ်စဉ်ကို သေချာစွာသိရှိသည့် ကျိုင်းတုံမြို့ပေါ်နေထိုင်သူတစ်ဦးက ပြောသည်။

“ကျနော့်မိတ်ဆွေတွေမှာ တဖက်က ခိုင်မင်းဦးနဲ့ပေါင်းပြီး အိမ်ဂရံအသစ်ထုတ်လိုက်ပြီး ဖိအားတွေပေးတော့ အိမ်ပေါ်ကနေ ဆင်းပေးလိုက်ရတယ်။ ဘာမှလုပ်မရဘူး။ ခိုင်မင်းဦးက လုပ်နေတာများပြီ။ သူ့ကို ဘယ်သူမှ အရေးမယူနိုင်ဘူး” ဟု ၎င်းက ပြောသည်။

မြေတိုင်း (၄) ခိုင်မင်းဦးမှာ လာဘ်စားထားသည့်ငွေများဖြင့် သားသမီးများကို နိုင်ငံခြားပို့ကျောင်းထားရန်နှင့် မိသားစုကို နိုင်ငံခြားပို့ရန်ပင် စီစဉ်နေကြောင်း သတင်းရင်းမြစ်များက ပြောသည်။

ကျိုင်းတုံမြို့နယ်အတွင်း ရှမ်း၊ ဗမာတို့အပြင် လူမျိုးစုများဖြစ်သည့် အာခါ၊ လားဟူ၊ လီရှော၊ “ဝ”နှင့် အခြားတိုင်းရင်းသားမျာစွာ နေထိုင်ပြီး ၎င်းတို့၏ ဗမာစာ၊ စကားအားနည်းမှု၊ ရုံးပိုင်းဆိုင်ရာလုပ်ငန်းများ နားမလည်မှုတို့ကို အခွင့်ကောင်းယူကာ မြေစာရင်းဝန်ထမ်းများက လုပ်စားနေခြင်းဖြစ်ကြောင်း ဒေသခံများက ဝေဖန်သည်။

ကျိုင်းတုံမြို့နယ်အတွင်း ဖြစ်ပွားနေသည့် မြေယာဆိုင်ရာ တရားမမှုအများစုမှာ မြေစာရင်းစာရေး ခိုင်မင်းဦးနှင့် ထွေအုပ်ဝန်ထမ်း နန်းဆီဖောင်းတို့ လာဘ်စားကာ စာရွက်စာတမ်းများ မမှန်မကန်ထုတ်ပေးမှု၊ အတုအပပြုလုပ်ပေးမှုတို့ကြောင့် ဖြစ်ကြောင်း၊ ၎င်းတို့မှာ လာဘ်စားထားသည့် ငွေများဖြင့် အထက်လူကြီးများကို ပြန်လည်လာဘ်ထိုးထားသည့်အတွက် တိုင်ကြားသော်လည်း အရာမထင်ကြောင်း ဒေသခံများထံမှ သိရသည်။

#MeKongNews
#ကျိုင်းတုံ
#မြေစာရင်း
#ခိုင်မင်းဦး
#မြေဂရံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)