မဲခေါင်၊ မေ ၂၄
ဘန်ကောက်ရှိ စစ်တပ်တစ်ခုအတွင်း လောင်စာဆီ လီတာ ၁၀၀၀၀ ပျောက်ဆုံးနေကြောင်း သတင်း များကျယ်ကျယ်ပြန့်ပြန့်ထွက်လာပြီးနောက် ယခင်ပုံစံများအတိုင်း အငွေ့ပျံသွားသည်ဟု မတော်မလျော် ဆင်ခြေပေးခြင်းအား စုံစမ်းစစ်ဆေး ဖော်ထုတ်သွားရမည်ဟု ထိုင်းဒုဝန်ကြီးချုပ်လည်းဖြစ် ကာကွယ်ရေးဝန်ကြီးလည်းဖြစ်သော ဖမ်သမ် ဝီချာရာချိုင်က မီဒီယာများနှင့် မေ ၂၃ ရက်တွင် တွေ့ဆုံစဉ် ဒေါသတကြီး ပြောကြားသွားခဲ့သည်။
မည်သည့် တပ်နယ်ဟု မသိရသော ယင်းဖြစ်စဉ်နှင့်ပတ်သက်ပြီး ဖမ်သမ်က ယခုစွပ်စွဲချက် မှန်သည်၊ မှားသည်ကို မဆုံးဖြတ်ရသေးကြောင်း၊ သို့သော် အောက်ခြေအထိ စုံစမ်းဖော်ထုတ်သွားရ မည်ဖြစ်ကြောင်း၊ မကြာခဏဆိုသလို တပ်တွင်း လောင်စာဆီများ ပျောက်ဆုံးမှုကို အငွေ့ပျံခြင်းကြောင့် ဟု ဆင်ခြေများပေးကြခြင်းမှာ ယုတ္တိမတန်လွန်းသော ဆင်ခြေများဖြစ်သောကြောင့် တာဝန်ယူမှု၊ တာဝန်ခံမှု ရှိရမည်ဟု ပြောဆိုသွားခြင်းဖြစ်သည်။
“ အငွေ့ပျံသွားသတဲ့လား။ လီတာ သောင်းချီပြီး အငွေ့ပျံသွားသတဲ့လား။ ရှင်းလင်းချက်မှန်သမျှက ကျိုးကြောင်းဆီလျော်ရှိရမယ်။ တင်ပြမှုကို နားထောင်ပါတယ်။ ဒါပေမဲ့ စုံစမ်းစစ်ဆေးသွားရမှာပဲ ” ဟု ဖမ်သမ်က ဒေါသတကြီး ပြောသွားခြင်းဖြစ်သည်။
ယခုလို လှောင်ကန်ဖြင့် စနစ်တကျထားသော လောင်စာဆီများ လျော့နည်းခြင်းမျိုးကို အငွေ့ပျံခြင်းဟု ဆင်ခြေပေးခဲ့သည့် ဖြစ်ရပ်မျိုး ၂၀၂၃ ခုနှစ် နိုဝင်ဘာလက တစ်ကြိမ် ဟိုးလေးတကျော်ဖြစ်ပွားခဲ့သေးသည်။
ထိုစဉ်က ထိုင်းစစ်တပ် လောင်စာဆီဌာနမှ ဗိုလ်မှူးသည် ပုဂ္ဂလိက ကုမ္ပဏီတစ်ခုထံမှ ဆီ လီတာ ၉၀၀၀ မှာယူခဲ့ကာ အခြားတပ်များအတွက် ပြန်လည်ဖြန့်ဝေပေးရာတွင် 95 ဓာတ်ဆီ လီတာ ၃၀၀၊ 91 ဓာတ်ဆီ လီတာ ၆၀၀၀ မှာ များစွာ လျော့နည်းနေခဲ့သလို စုစုပေါင်း လီတာ ၂၀၀၀၀ ပြန်လည် ဖြန့်ဖြူးရာတွင်လည်း လီတာ သောင်းချီမှာ ပျောက်ဆုံးမှုဖြစ်ပွားခဲ့ပြီး အပူရှိန်ကြောင့် အငွေ့ပျံလျှော့နည်းသွားသည်ဟု ဆင်ခြေပေးခဲ့ဖူးသည်။
လောင်စာဆီ ကျွမ်းကျင်သူများကိုယ်တိုင်က ဓာတ်ဆီသည် ပြန်လည် ဖြည့်တင်းချိန်၊ အပူရှိန်ကြောင့် ဖြစ်စေ အငွေ့ပျံမှုအနည်းငယ် ရှိသော်လည်း စစ်တပ်မှ အလုံပိတ်ဆီသိုလှောင် Tank များနှင့် သိမ်းဆည်း ထားသော ဆီများသည် အငွေ့ပျံလျှင်လည်း အနည်းငယ်သာ လျော့နည်းသဖြင့် လီတာ သောင်းချီ အငွေ့ ပျံစရာမရှိဟု သုံးသပ်ကာ ထိုဆင်ခြေမှာ ပြည်သူများအကြား လှောင်ပြောင်စရာဖြစ်ခဲ့သည်။
ကိုကလင်း
Ref:The Nation
#ထိုင်းစစ်တပ်
#လောင်စာဆီ
#အငွေ့ပျံ
#ဘန်ကောက်
