မဲခေါင်၊ ဧပြီ ၂၃
တရုတ်အားကိုးဖြင့် ပြန်လည်ထိန်းချုပ်ခွင့်ရသည့် လားရှိုးမြို့တွင် ဌာနဆိုင်ရာရုံးများကို လာမည့် မေလ ၁ ရက်မှ စတင်ကာ ပြန်လည်ဖွင့်လှစ်ရန် စစ်ကောင်စီက အမိန့်ထုတ်ထားကြောင်း စစ်ကောင်စီဝန်ထမ်း Non – CDM များနှင့် နီးစပ်သူများထံမှ သိရသည်။
လားရှိုးကို MNDAA မှ သိမ်းပိုက်စဉ်က လားရှိုးမှ တောင်ကြီးသို့ ထွက်ပြေးလာပြီး တောင်ကြီးတွင် ရုံးတွဲဘက်ထိုင်နေရသည့် Non–CDM ဝန်ထမ်းများကို မေလ ၁ ရက်မှ စတင်ကာ လားရှိုးမြို့တွင် ပြန်လည်ရုံးထိုင်ရန် ပြင်ဆင်ခိုင်းထားခြင်းဖြစ်ပြီး လားရှိုးဒေသခံများအနေဖြင့် ရုံးပိုင်းဆိုင်ရာ ကိစ္စရပ်များကို တောင်ကြီးတွင် လုပ်မရတော့ဘဲ လားရှိုးသို့သာ သွားရောက်လုပ်ကိုင်ရတော့မည်ဖြစ်ကြောင်း Non-CDM ဝန်ထမ်းများနှင့် နီးစပ်သူတစ်ဦးက ပြောသည်။
“ရုံးတွေ မေလ ၁ ရက်ကစ လားရှိုးမှာ စဖွင့်ရတော့မယ်။ ဒီနေ့ပဲ လားရှိုးပြန်ဖို့လုပ်နေရပြီ။ ဟိုမှာ အိမ်ယာတွေက လုံးဝပျက်စီးနေတာ၊ နယ်မြေကလည်း ဘာဖြစ်မယ် မသိရသေးဘူး။ စားဝတ်နေရေးအရ အလုပ်ကလည်း မထွက်နိုင်သေးတော့ သွားရမှာပဲ” ဟု ၎င်းက ဆိုသည်။
တောင်ကြီး၊ မြို့မရပ်ကွက်သို့ လားရှိုးမှစစ်ရှောင်လာပြီး နိုင်ငံသားစမတ်ကတ် ပြုလုပ်ထားသူ လားရှိုးရပ်ကွက်၂နေသူတစ်ဦးကလည်း ယမန်နေ့ ဧပြီလ၂၂ရက်နေ့က ရက်ချိန်းအတိုင်းသွားရောက်ရာ လားရှိုးတွင်သာ သွားရောက်လုပ်ကိုင်ရန် တောင်ကြီးရုံးက ပြောကြောင်း သိရသည်။
“ပြန်ဖို့ မပြန်ဖို့ မစဥ်းစားရသေးဘူး။ ရုံးတွေက လားရှိုးမှာဘဲ လုပ်မှာဆိုတော့ မဖြစ်မနေ ပြန်နေခိုင်းတဲ့ သဘောပဲ” ဟု ၎င်းက ပြောသည်။
လက်ရှိ လားရှိုးတွင် စစ်ကောင်စီတပ်များ ဝင်ရောက်အခြေပြုနေပြီး တရုတ်ကိုယ်စားလှယ်အဖွဲ့များပါ ရှိနေသလို MNDAA တပ်များကလည်း လားရှိုးမြို့ပြင်ပတွင် တပ်စွဲထားကြောင်း၊ ဧပြီလ ၂၁ ရက်တွင် တရုတ်ကိုယ်စားလှယ် အပါအဝင် ကိုးကန့်နှင့် စစ်ကောင်စီတို့ ၃ ပွင့်ဆိုင် ဆွေးနွေးမှုများ ပြုလုပ်ပြီးနောက် ဧပြီလ ၂၂ ရက်တွင် လားရှိုးမြို့တွင်းသို့ စစ်ကောင်စီစစ်ကားများ ရာနှင့်ချီ ပြန်လည်ဝင်ရောက်လာကြောင်း ဒေသခံများထံက သိရသည်။
မဟာ
#MeKongNews
#လားရှိုး
#စစ်ကောင်စီ
#ဌာနဆိုင်ရာရုံး
#တောင်ကြီး
