မဲခေါင်၊ မတ် ၂၀
ရှမ်းပြည်၊ တောင်ကြီးခရိုင်နှင့်ရပ်စောက်မြို့များအတွင်း လိုင်စင်မဲ့ယာဥ်များအား အဖွဲ့စုံဖြင့် ဖမ်းဆီးပြီး ဥပဒေအရထိရောက်ပြစ်ဒဏ်ပေးရေး လျှို့ဝှက်ညွှန်ကြားချက်စာတစ်စောင်ကို စစ်ကောင်စီ၏ တောင်ကြီးခရိုင် ထွေအုပ်မှူး ဝင်းကိုကိုက မတ်လ၁၀ရက်က ထုတ်ပြန်ထားကြောင်း TGI Support Revolution ထံမှ သိရသည်။
ယင်းစာတွင် ဌာနပေါင်းစုံက အဖွဲ့ ၁၀ဖွဲ့ဖြင့် ပုံမှန်မဟုတ်ဘဲ နေရာစုံစစ်ဆေးဖမ်းဆီးမည့်အပြင် လိုင်စင်မဲ့ကား အရောင်းအဝယ်လုပ်သူများ၏ နေအိမ်၊ ဝပ်ရှော့နှင့် ကားရေဆေးခုံများကိုပါ ရပ်ကျေးများဖြင့် ရှာဖွေဖမ်းဆီးရန်ပါရှိပြီး တပါတည်း အမှုဖွင့်အရေးယူရန် အဖွဲ့ကိုပါ ဖွဲ့စည်းလုပ်ဆောင်မည် ဖြစ်ကြောင်း ညွှန်ကြားထားသည်။
“ဒီစာဟာ ရှမ်းပြည်နယ်အစိုးရ လက်အောက်ခံ အဖွဲ့အစည်းတွေကို ဒီလ ၁၀ ရက်နေ့က ညွှန်ကြားချက် ထုတ်ပြန်ထားတာ ဆိုပေမယ့် ဒီလကုန်တဲ့အထိ သို့မဟုတ် နောက်လ သကြႅန်ထိ အကြုံးဝင်နေအုံးမယ်လို့ ဖရဲသီးသတင်းပေးတွေကနေတဆင့် ပြန်သိရပါတယ်။ လောလောဆယ် စာမေးပွဲကာလဖြစ်တာကြောင့် အခြေခံ ကျောင်းတိုင်းမှာ ဒီကောင်တွေ လိုက်စောင့်ပေးနေရလို့သာ နားထားရတာဖြစ်ပြီး စာမေးပွဲပြီးသွားလို့ ဒီကောင်တွေ ကျောင်းတွေမှာ တာဝန်မကျတော့တဲ့နောက်ပိုင်း မြို့ဝင်မြို့ထွက်နေရာတွေ အဓိက အချက်ချာကျတဲ့နေရာတွေမှာ မိုင်ကုန်စစ်မယ်ဆွဲမယ်လို့ သိရပါတယ်” ဟု TGI Support Revolution က ဆိုသည်။
RLG သာသနာ့နံပတ်တပ်ကားများကိုပါ စစ်ဆေးသွားမည်ဖြစ်ပြီး အဓိက အကြောင်းပြချက်မှာ PDF များ၊ သစ်မှောင်ခိုများ၊ တရားမဝင်သတ္တုတူးဖော်သူများ၊ လက်နက်ခဲယမ်းနှင့်မူးယစ်ဆေးဝါးသယ်ဆောင်သူများ၊ လိုင်စင်မဲ့လူမှုရေးကားများ၊ ဥပဒေနှင့်မလွတ်ကင်းသည့် လုပ်ရပ်ကျုးလွန်သူများ၊ လုယက်သူ ဒုစရိုက်သမားများ၊ ကားလိုင်စင်နှင့်နံပတ်အတု အသုံးပြုနေခြင်းများကြောင့် ဖြစ်ကြောင်း ယင်းညွှန်ကြားချက်တွင် ဖော်ပြထားသည်။
ယခုကာလမှာ တက္ကသိုလ်ဝင်တန်းစာမေးပွဲများ ဖြေဆိုနေချိန်ဖြစ်သဖြင့် လိုင်စင်မဲ့ကားဖမ်းဆီးမှုများမတွေ့ရသေးသော်လည်း စာမေးပွဲအလွန်ကာလတွင် အထူးသတိထားရန်လိုကြောင်း တောင်ကြီးမှ ကားဝယ်ရောင်းတစ်ဦးက မဲခေါင်ကို ပြောသည်။
“အခုတော့ စာမေးပွဲကာလဖြစ်လို့ စတာမတွေ့သေးဘူး။ လူပါဖမ်းမယ်ဆိုတော့ ခုချိန်မှာ W(လိုင်စင်မဲ့ကား) တွေ မသုံးဘဲ နားထားကြဖို့လိုမယ်။ အိမ်တွေ၊ ဘုန်းကြီးကျောင်းတွေထဲတောင် ရှာမယ်ဆိုတော့၊ PNO ကလည်း သူ့ဒေသထဲဖမ်းမယ်ပြောထားတော့ အထူးကို သတိထားဖို့လိုမယ်” ၎င်းက ပြောသည်။
ပြည်သူများထံက လိုင်စင်မဲ့ကားများ ဖမ်းမည်ဟုဆိုသော်လည်း စစ်ကောင်စီလက်အောက်ခံ စစ်တပ်၊ ရဲနှင့်ဌာနဆိုင်ရာများကိုမူ ဌာနတံဆိပ်အမည်ကို A4 စာရွက်ဖြင့် ကားရှေ့တွင်ကပ်ထားပါက ကင်းလွတ်ခွင့်ရကြောင်း ပြည်နယ်ထွေအုပ်ရုံးမှ နှင့် နီးစပ်သူတစ်ဦးက ပြောသည်။
“မိတ္တူပွားပြီး ကားဒက်ရှ်ဘုတ်ပေါ်တင်ထားပေါ့။ ကြားတာတော့ ဦးစီးအရာရှိအထိ သိမ်းလို့ရတဲ့အထဲကအမြင့်ကားတွေလိုင်စင်နဲ့ ပြန်ထုတ်ပေးမယ်ကြားတယ်” ဟု ၎င်းကပြောသည်။
လက်ရှိတွင် တောင်ကြီးခရိုင်အတွင်း လိုင်စင်မဲ့ကားစီးရေ ၅၀၀ ကျော် ဖမ်းဆီးရမိထားပြီး ယင်းအထဲမှ အမြင့်ကားများကို ဌာနဆိုင်ရာများသို့ ထုတ်ပေးရန် စီစဥ်နေခြင်းဖြစ်သည်။
မှတ်ချက် – ပုံဟောင်း
မဟာ
#MeKongNews
#တောင်ကြီး
#ရပ်စောက်
#လိုင်စင်မဲ့ကား
#ဖမ်းဆီး
