ယူကရိန်းကို ဗြိတိန်စစ်သည်များ စေလွှတ်ပေးဖို့ ပြင်ဆင်နေကြောင်း ဗြိတိန်ဝန်ကြီးချုပ် ဖွင့်ဟ
မဲခေါင်၊ ဖေဖော်ဝါရီ ၁၈
ဆော်ဒီနိုင်ငံ ရီယက်ဒ်မြို့တွင် ရုရှား-ယူကရိန်းစစ်ပွဲ ငြိမ်းချမ်းရေးအတွက် အမေရိကန်နှင့် ရုရှားကိုယ်စားလှယ်များ အကြိုအဆင့် တွေ့ဆုံဆွေးနွေးနေချိန် ဗြိတိန်ဝန်ကြီးချုပ်က လုံခြုံရေးအတွက် ဗြိတိန်စစ်သည်များကို ယူကရိန်းဆီ စေလွှတ်ရေးပြင်ဆင်နေကြောင်း ဗြိတိန် မီဒီယာမှာ ဖွင့်ဟသွားပါတယ်။
အမေရိကန်သမ္မတ ဒေါ်နယ်ထရမ့်က သူနှင့် ပူတင်တို့ အလွန်နီးကပ်သော အချိန်ပိုင်းအတွင်း ယူကရိန်း-ရုရှားစစ်ပွဲ ငြိမ်းချမ်းရေးဆွေးနွေးမှု စတင်တော့မည်ဖြစ်ကြောင်း ဖွင့်ပြောလာသလို အမေရိကန်နိုင်ငံခြားရေးဝန်ကြီးသည်လည်း ယခုသတင်းပတ်ကုန်ကာနီးတွင် ရုရှားနိုင်ငံခြားရေးဝန်ကြီးနှင့် တွေ့ဆုံ ဆွေးနွေးတော့မည်ဖြစ်သည်။
အဆိုပါ အမေရိကန်နှင့် ရုရှားကိုယ်စားလှယ်များ ငြိမ်းချမ်းရေး ဆွေးနွေးမှုများတွင် ယူကရိန်းမှ တစ်ယောက်မှ မပါသလို နေတိုးနှင့် ဥရောပမှ ကိုယ်စားလှယ်များလည်း လုံး၀မပါဝင်ဘဲ အမေရိကန်ဘက်က ဒေါ်နယ်ထရမ့်၏ စိတ်ကြိုက်မူဝါဒဖြင့် ရုရှား-အမေရိကန် နှစ်နိုင်ငံသာ ဆွေးနွေးနေသကဲ့သို့ ဖြစ်နေခြင်းကြောင့် ဥရောပနိုင်ငံများဘက်က စိုးရိမ်ပူပန်စရာများ ဖြစ်ပေါ်နေရသည်။
ထို့ကြောင့် ယခုရက်ပိုင်းအတွင်း ပဲရစ်တွင် ဥရောပခေါင်းဆောင်များပါဝင်သည့် အရေးပေါ် အထူးအစည်းအဝေးပွဲတစ်ရပ်ကျင်းပရန် စီစဉ်ထားကြကာ ဥရောပကိုကျော်ပြီး အမေရိကန်၏ ရုရှား- ယူကရိန်းစစ်ပွဲ ငြိမ်းချမ်းရေး ဆွေးနွေးမှုလုပ်ခြင်း မှသည် ဥရောပကို ဗဟိုပြုသည့် ငြိမ်းချမ်းရေးဆွေးနွေးပွဲ ဖြစ်လာစေရန် တိုင်ပင်ကြခြင်းဖြစ်သည်။
ထိုအခြေအနေတွင် စတာမာက ဗြိတိန်သည် ယူကရိန်း၏ လုံခြုံရေးကို စဉ်ဆက်မပြတ် အားပေးကူညီနေဆဲဖြစ်ရာ ငြိမ်းချမ်းရေးဖြစ်စဉ်ဖော်ဆောင်ရာတွင် လိုအပ်ပါက အကာအကွယ်ပေးနိုင်ရေး ဗြိတိန်စစ်သည်တော်များ ယူကရိန်းထံ စေလွှတ်ရေး ပြင်ဆင်ထားရှိကြောင်း တယ်လီဂရပ်ဖ်သတင်းဌာနသို့ ဖွင့်ပြောသွားခဲ့သည်။
ထို အခြေအနေတွင် ဗြိတိန်သည် အမေရိကန်နှင့် ရုရှား နှစ်နိုင်ငံတည်း ယူကရိန်းငြိမ်းချမ်းရေး ဆွေးနွေးမှုတွင် ဥရောပတိုက် ကိုယ်စား ပေါင်းကူးပါဝင်လိုခြင်းကြောင့် ယူကရိန်းထံ စစ်သည်များစေလွှတ်ရန် ပြင်ဆင်ခြင်း ဖြစ်မည်ဟု သုံးသပ်မှုများ ရှိလာခဲ့သည်။
Ref: Daily Telegraph
ကိုကလင်း
#MeKongNews
