ရန်ကုန်တိုင်း၊ မြောက်ဥက္ကလာပမြို့နယ်၊ ၆ ကွေ့မှတ်တိုင်းအနီး၊ ဧရာလမ်းမှာရှိတဲ့ (ည) ရပ်ကွက်ရုံးမှာ ဗုံးပေါက်ကွဲမှု ဖြစ်ပွားခဲ့ပေမယ့် စစ်တပ်က လာရောက် စစ်ဆေးတာ မရှိဘူးလို့ သိရပါတယ်။
ယနေ့ နိုဝင်ဘာ ၁၂ ရက်၊ နေ့လည် ၁၂ နာရီကျော်က ဗုံးပေါက်ကွဲခဲ့တာဖြစ်ပြီး လူထိခိုက်မှု မရှိဘူးလို့ မျက်မြင်တွေ့သူ တစ်ဦးက ပြောပါတယ်။
“ လူတော့ တစ်ယောက်မှ မထိပါဘူး။ ရုံးအဆောက်အဦ အချို့နေရာလေးတွေတော့ ဗုံးကြောင့် အနည်းငယ် ပျက်စီးတာတော့ ရှိတယ်။ လာရောက် စစ်ဆေးတာတွေလည်း မရှိပါဘူး” လို့ သူကပြောပါတယ်။
ရန်ကုန်တိုင်း အတွင်း ဗုံးပေါက် ကွဲမှု ဖြစ်ပွားတဲ့ နေရာများကို စစ်ကောင်စီတပ်များ သွားရောက် စစ်ဆေးလေ့ရှိ ပေမယ့် ယခု ပေါက်ကွဲမှုကို လာရောက် စစ်ဆေးမှု မရှိဘဲ စစ်ကားတစ်စီး၊ ရဲကားနှစ်စီးနဲ့ ရပ်ကွက်အတွင်းမှာ ပတ်မောင်းပြီး ပြန်သွားတယ်လို့ ရပ်ကွက်နေ ပြည်သူတစ်ဦးက ပြောပါတယ်။
အောက်တိုဘာ ၁၁ ရက်၊ ည ၈ နာရီ ဝန်းကျင်က မြောက်ဥက္ကလာ (စ) ရပ်ကွက် သန္တာ (၅) လမ်း အရှေ့ခြမ်း၊ အမှတ် (၄၂၉) တွင် နေထိုင်ခဲ့တဲ့ လေတပ်အရာရှိ ဒုဗိုလ်မှူးကြီး ကျော်ကျော်ထွန်း နေအိမ် ဗုံးပေါက်ကွဲမှု ဖြစ်ပွားစဉ်ကလည်း စစ်တပ်နဲ့ရဲ လာရောက် စစ်ဆေးမှု မရှိခဲ့ပါဘူး။