တာချီလိတ်မှာ အခြားအလုပ်တွေနဲ့ နှိုင်းယှဉ်ရင် လက်ဘက်ရည်ဆိုင်လုပ်သားတွေ လစာနည်းပါးတာကြောင့် နေ့စဉ်ရပ်တည်ရေး အခက်အခဲရှိနေ
မဲခေါင်၊ ဇန်နဝါရီ ၁၄
ရှမ်းပြည်အရှေ့ပိုင်း ၊တာချီလိတ်မှာ လက်ဘက်ရည်ဆိုင် စားပွဲထိုး အမျိုးသမီးတွေ ရရှိတဲ့လစာ နည်းပါးလွန်းတာကြောင့် နေ့စဉ်ဘဝရပ်တည်ရေးအကြပ်အတည်းတွေဖြစ်ပေါ်နေတယ်လို့ လုပ်သားတွေကပြောပါတယ်။
တာချီလိတ်မြို့ရဲ့ လက်ဘက်ရည်ဆိုင်မှာ စားပွဲထိုးလုပ်ရတဲ့ မိန်းကလေးတွေဟာ လုပ်ခလစာ ဘတ်၂၅၀၀၊ ၃၀၀၀ ရရှိကြတာဖြစ်ပြီး တစ်ရက်ကို ဘတ် ၁၀၀ လောက်နဲ့နေထိုင်ဖို့ မလွယ်ကူဘူးလို့ ပြောပါတယ်။
အဝတ်အထည်ဆိုင်တွေက နေစားငြိမ်း အနည်းဆုံးလစာ တစ်လ ဘတ်၄၀၀၀ ၊ ကလေးထိန်းက လစာ တစ်လ ဘတ် ၄၀၀၀ ရရှိကြတယ်လို့ပြောပါတယ်။
တာချီလိတ်မှာ စားဝတ်နေရေး အတွက် လူတစ်ဦး တစ်ရက်ကို အနည်းဆုံး ဘတ် ၂၀၀ ရရင်တောင် အခြေခံမျှသာ ဘဝရပ်တည်နိုင်တာမို့ လက်ဘက်ရည်ဆိုင်စားပွဲထိုးလုပ်သားတွေ တစ်လကိုလစာ ဘတ် ၂၅၀၀ နဲ့မလုံလောက်ဘူးလို့ လုပ်သားတွေကပြောပါတယ်။
“ အလုပ်က ပင်ပန်းပေမယ့် လုပ်နိုင်ပါတယ်၊ သမီးတို့ရွာထက်တော့ ဒီမှာက ရသမျှချွေတာစားပြီး ပိုတာလေး အိမ်ပြန်ပို့ဖို့ ကြိုးစားတာ၊ တစ်လ တစ်သိန်းပို့ဖို့တောင်ခက်ခဲတယ်”လို့ စားပွဲထိုးမိန်းကလေးတစ်ဦးက ပြောပါတယ်။
လက်ဘက်ရည်ဆိုင်မှာ စားပွဲထိုးလုပ်နေတဲ့ အဲ့ဒိမိန်းကလေးက ရှစ်လအကြာမှာ မိဘတွေဆီကို ကျပ်သုံးသိန်းပဲပို့နိုင်သေးတယ်လို့ ပြောပါတယ်။
လုပ်သားတွေ နေ့စဉ်ထမင်းဟင်းချက်ရာမှာ ကုန်ကျငွေကိုအချိုးကျခွဲကာ စုပေါင်းချက်စားရာမှာ တစ်နပ် အနည်းဆုံး ဘတ်၅၀ ခန့်ကုန်ကျပြီး အိမ်လခ အနည်းဆုံးဘတ် ၂၀၀၀၊ ရေခ၊ မီးခ အခြားစရိတ်တွေနဲ့ မလုံလောက်ဘူးလို့ပြောပါတယ်။
“ ဒီကြားထဲ နေဆိုး(နေမကောင်း)ရင် ဆေးဘိုးတောင်မလွယ်ဘူး၊ လုပ်ခလေး ပိုလိုချင်မိတယ်”လို့ စစ်ကိုင်း ပေါက်မြို့က စစ်ရှောင်ရင်း စားပွဲထိုးလုပ်နေတဲ့ အသက် ၁၉ နှစ်အရွယ် မိန်းကလေးတစ်ဦးက မဲခေါင်ကို ပြောပါတယ်။
တာချီလိတ်ကို နယ်စပ်မြို့ဆိုပြီး အလုပ်အကိုင် ရရှိဖို့လာရောက်သူတွေ အလုပ်အကိုင်ရဖို့ မလွယ်ကူသလို ရရင်လည်း မလောက်မငလစာပဲ ရကြလို့ တတ်နိုင်ရင် မလာကြဖို့ပြောချင်တယ်လို့ ဆိုပါတယ်။
လက်ဘက်ရည်ဆိုင်တွေအနေနဲ့ အလုပ်သမားတွေကို လစာတန်းတစ်ခုအတွင်း ဘတ်၄၀၀၀ အထိသာ ပေးနိုင် စွမ်းရှိပြီး အလုပ်သမားများရဲ့ စွမ်းဆောင်ရည်အရနဲ့ ဝန်ထမ်းအရေအတွက်ပေါ်မူတည်ပြီး လစာ ပေးရတာဖြစ်တယ်လို့ လက်ဘက်ရည်ဆိုင်လုပ်ငန်းရှင်တစ်ဦးကပြောကြပါတယ်။
MK-012
#MeKongNews
