မဲခေါင်၊ ဒီဇင်ဘာ ၃၀
ကရင်နီပြည်နဲ့ ထိုင်းနယ်စပ်၊ ရှားတောမြို့နယ်ထဲက မယ်လယုမဆုတ်တမ်းခံစစ်မှာ စခန်းထိုင်ထားတဲ့ စစ်ကောင်စီရဲ့အင်အား ၈၀ ခန့်ဟာ ဒီဇင်ဘာ ၂၈ ရက်မှာ စခန်းသိမ်းတိုက်ပွဲမဖြစ်ပဲ တိတ်တဆိတ်စခန်းစွန့်ခွါသွားပေမယ့် ကရင်နီပြည်တပ်မတော်(KA)ကပစ်ခတ်တဲ့လက်နက်ကြီးကြောင့် တစ်ဦးသေတယ်လို့ KA ရဲ့ စစ်ရေးချူပ် ဗိုလ်မှူးကြီး ဘုန်းနိုင်ကပြောပါတယ်။
ဒီဇင်ဘာလ ၂၈ ရက် မနက်အစောပိုင်းက မယ်ယုစခန်းကို KA က သွားရောက်တိုက်ခိုက်စဉ် နာရီပိုင်းအတွင်းမှာ မယ်လယုမဆုတ်တမ်းခံစစ်စခန်းကနေ တပ်ဆုတ်သွားတာဖြစ်တယ်လို့ မဲခေါင်ကိုပြောပါတယ်။ သတင်းတချို့မှာတော့ တိတ်တဆိတ်ဆုတ်ခွါသွားတာလို့ ဗိုလ်မှူးကြီး ဘုန်းနိုင်ကပြောကြောင်းဖေါ်ပြထားပါတယ်။
“လက်နက်နဲ့ပစ်တုန်းပဲ သူတို့က ဆုတ်သွားတယ်လေ၊ လက်နက်ကြီးကျတော့ သူတို့ဘက်က တယောက်သေတယ်”လို့ KA စစ်ရေးချုပ် ဗိုလ်မှူးကြီးဘုန်းနိုင်က မဲခေါင်ကို ပြောပါတယ်။
စားနပ်ရိက္ခာအခက်အခဲကြောင့် ခဏတာထိတွေ့တိုက်ပွဲအတွင်းမှာ စခန်းစွန့်ခွာသွားပြီး ကရင်နီပြည်နယ်ကို ဝင်ရောက်ဖို့အတွက် လမ်းကြောင်းမသင့်တာကြောင့် ရှမ်းပြည်နယ်ဘက်ကို ဦးတည်ပြီး ဆုတ်ခွာသွားတာဖြစ်နိုင်တယ်လို့ ဗိုလ်မှူးကြီးဘုန်းနိုင်ကပြောပါတယ်။
KA အနေနဲ့ စစ်ကောင်စီအဖွဲ့ကျန်ခဲ့တဲ့ ခဲယမ်းနဲ့ ကား၊ဆိုင်ကယ်တွေသိမ်းဆည်းယူဆောင်ပြီး လောလောဆယ်မှာ စခန်းကို ဝင်ရောက်နေရာယူခြင်းမျိုးမရှိပဲ ဒီအတိုင်းထားခဲ့တယ်လို့ပြောပါတယ်။
အဲ့ဒိ စခန်းကို နယ်မြေရှင်းလင်းရာမှာ ၆၀ မမ (၂၁၂)လုံး၊ MA 1 ကျည်အိမ် (၁၂) တောင့်၊ A 1 ကျည် (၅၄၇၀)တောင့်၊ နောင်တိုကျည်(၁၀၂၂၈)တောင့်၊ တိုဘီတို(၁၄)ချောင်း၊ RPG (၆၀ ) လုံး၊ လက်ပစ်ဗုံး (၁၁၉) လုံး နဲ့ ၈၁ မမ သီး(၃၃)လုံး မိုင်းတွေထဲက ၁၄ မိုင်း၊ ၁၆မိုင်းနဲ့ ၁၈ မိုင်းနဲ့ ဖိုးဝီး ကား (၇)စီး ၊ ၆ ဘီးကား (၃)စီး ၊ ဒိုဇာကား (၁)စီးနဲ့ ဆိုင်ကယ် (၂)စီး သိမ်းဆည်းရမိခဲ့တယ်လို့ သိရပါတယ်။
စစ်ကောင်စီဟာ ၂၀၂၁ခုနှစ်၊ နိုဝင်ဘာလ ၁၇ ရက်မှာ မယ်လယုတောင်ကုန်းကို မဆုတ်တမ်းခံစစ်အဖြစ်အထုင်ချတပ်စွဲခဲ့တာဖြစ်ပါတယ်။အမှတ်(၁၃၄)ခြေလျင်တပ်ရင်းဟာ ကရင်နီပြည်၊ ဖားဆောင်းမြို့အခြေစိုက်ဖြစ်ပြီးဒေသကွပ်ကဲမှုစစ်ဌာနချုပ်(လွိုင်ကော်)ရဲ့လက်အောက်ခံတပ်ရင်းဖြစ်ပါတယ်။
CJ-004
#MekongNews
#မယ်လယု
#မဆုတ်တမ်းခံစစ်
#စစ်ကောင်စီ
#စခန်းစွန့်ခွါ
