မဲခေါင်၊ ဒီဇင်ဘာ ၁၈
ကရင်နီပြည် ရှေ့တန်းနယ်မြေတစ်ခုမှ စစ်ကောင်စီတပ်သားလေးဦး ဒီဇင်ဘာ ၁၁ ရက်က လက်နက်နဲ့အတူထွက်ပြေးလာပြီး ကရင်နီအမျိုးသားများကာကွယ်ရေးတပ် KNDF ထံဘက်ပြောင်းခိုလှုံ ခဲ့ပါတယ်။
စစ်ကောင်စီတပ်က ထွက်ပြေးလာတဲ့ စစ်သား လေးဦးမှာ MA-1 သေနတ် သုံးလက်ယူဆောင်လာတယ်လို့ KNDF ဗဟိုသတင်းနှင့် ပြန်ကြားရေးဌာနက ဒီကနေ့ (ဒီဇင်ဘာ ၁၈) ထုတ်ပြန်ပါတယ်။
အဲ့ဒီ စစ်ကောင်စီတပ်သား လေးဦးဟာအဓမ္မ တပ်သားသစ် စုဆောင်းခံခဲ့ရသူတွေဖြစ်ပြီး ကရင်နီပြည်နယ်က ရှေ့တန်းစစ်မြေပြင်ကို ပို့ဆောင်ခဲ့ရပြီးနောက် အခုလို KNDF ထံ ထွက်ပြေးလာတာဖြစ်ပြီး သင်တန်းအပတ်စဉ်(၁)ကနေ အခုထိဘက်ပြောင်းခိုလှုံသူ ၃၀ ခန့်ရှိပြီလို့ KNDF ဒုဥက္ကဌ ခွန်းဘီထူးက ပြောပါတယ်။
ကရင်နီပြည်အတွင်း စစ်ကောင်စီလက်အောက်ခံတပ်သားတွေ အခုလိုတော်လှန်ရေးတပ်ဖွဲ့တွေထံမှာ ဘက်ပြောင်းခိုလှုံတာဟာ ရာနှင့်ချီရှိနေပြီဖြစ်သလို KNDF တပ်ရင်းတွေမှာလည်း CDM ၀င်ရောက်လာတဲ့ ရဲဘော်တွေနဲ့ စုဖွဲ့ကာ စစ်ကောင်စီကို ပြန်လည်တိုက်ခိုက်နေတဲ့ CDM တပ်ရင်းတစ်ခုလည်း ရှိနေပါတယ်။
စစ်ကောင်စီတပ်ဖွဲ့၀င်တွေအနေနဲ့ အာဏာရှင်စနစ် သက်ဆိုးရည်စေရေးနဲ့ လူတစ်စုကောင်းစားရေးအတွက် ပေးဆပ်လုပ်ကိုင်နေကြတဲ့ ဘ၀ကို စွန့်လွှတ်ပြီး လွတ်လပ်မျှတတဲ့ စနစ်တစ်ခု အမြန်ဆုံးဖြစ်ထွန်းလာနိုင်ဖို့ ပြည်သူသို့မျက်နှာမူပြီး ယုံကြည်မှုရှိရှိ မိမိတို့ KNDF ထံ ဘက်ပြောင်းခိုလှုံလာကြဖို့ ကြိုဆိုနေတယ်လို့ တိုက်တွန်းပြောကြားထားပါတယ်။
CJ-017/004
#MekongNews
#KNDF
#စစ်ကောင်စီ
#တပ်သားလေးဦး
#ဘက်ပြောင်းခိုလှုံ
