ဗီယက်နမ်ရဲ့ အကြီးမားဆုံး လိမ်လည်မှုတရားခံ သေဒဏ် အယူခံ ပယ်ချခံရ
မဲခေါင်၊ ဒီဇင်ဘာ ၄
ဗီယက်နမ်နိုင်ငံသမိုင်းမှာ အကြီးမားဆုံး လိမ်လည်အလွဲသုံးစားလုပ်မှုအဖြစ် အမေရိကန်ဒေါ်လာ ၁၂ ဘီလီယံ လိမ်လည်ခဲ့တဲ့ အိမ်ခြံမြေသူဌေးမကြီးသောင်မေလန်ကို ၂၀၂၂ ခုနှစ်မှာ ဖမ်းဆီးခဲ့ပြီး သေဒဏ်ချမှတ်ထားမှု အတွက် အယူခံဝင်ခဲ့ရာမှာ ဟိုချီမင်းမြို့က ပြည်သူ့တရားရုံးက ဘာမှ ဖြေလျှော့ပေးစရာအကြောင်းမရှိဘူးလို့ ငြင်းပယ်ပြီး အယူခံကို ဒီဇင်ဘာ ၃ရက်နေ့မှာ ပယ်ချခဲ့ပါတယ်။
သောင်မေလန်ဟာ သူမအဓိက ပိုင်ဆိုင်ရာ စင်ကာပူအကြီးဆုံး ပုဂ္ဂလိကဘဏ် Saigon Joint Stock Commercial Bank (SCB) ကို ဗဟိုချက်လုပ်ပြီး ရင်းနှီးမြှုပ်နှံသူပေါင်းများစွာဆီက ဒေါ်လာ ၁၂ ဘီလီယံကို လိမ်လည်ခဲ့သလို အိမ်ခြံမြေလုပ်ငန်းမှာ လိမ်လည်မှု၊ ငွေကြေးခဝါချမှု၊ နယ်စပ်ဖြတ်ကျော် ငွေလွှဲမှုတွေ ကျူးလွန်ခဲ့ကြောင်း ဝန်ခံထားသလို ရိုက်တာသတင်းဌာန ရရှိခဲ့တဲ့ စာရွက်စာတမ်းအထောက်အထားတွေအရ ဗီယက်နမ်ဗဟိုဘဏ်ကတောင် SCB ဘဏ်မပြိုလဲအောင် ဧပြီလက အထူးချေးငွေ ဒေါ်လာ ၂၄ ဘီလီယံ ထုတ် ချေးခဲ့ရတဲ့ ဖြစ်စဉ်ကို ဖြစ်ပွားစေခဲ့ပါတယ်။
တခြားစွဲချက်တစ်ခုမှာကတည်းက တစ်သက်တစ်ကျွန်းကျခံထားရပြီးဖြစ်တဲ့ သောင်မေလန်ဟာ နောက်ထပ် ပြစ်ဒဏ်ဖြစ်တဲ့ သေဒဏ်ကို အယူခံဝင်ရာမှာ လိမ်လည်ထားတဲ့ ငွေကြေးပမာဏရဲ့ ၄ ပုံ ၃ ပုံကို ပြန်ပေးနိုင်ခဲ့ရင် သေဒဏ်ကနေ တစ်သက်တစ်ကျွန်း ပြစ်ဒဏ် လျှော့ပေါ့ပေးခံရနိုင်မယ်မျှော်လင့်ပြီး ဥပဒေကြောင်းအရ အယူခံ ဝင်ခဲ့တာဖြစ်ပါတယ်။
ဒါပေမဲ့ ကွန်မြူနစ်စနစ်ကျင့်သုံးတဲ့ ဗီယက်နမ်မှာ သောင်မေလန်ဟာ စီးပွားရေးလောကရဲ့ အကျော်ကြားဆုံး အမှုဆောင်တစ်ယောက်ဖြစ်သလို နိုင်ငံတော် အစိုးရအကြီးအကဲ စာရင်းထဲလည်းပါဝင်နေလို့ စံပြ ပြစ်ဒဏ်အဖြစ် သေဒဏ်အယူခံကို ပယ်ချလိုက်တာဖြစ်ပြီး သူမ လိမ်လည်အလွဲသုံးစား လုပ်ခဲ့တဲ့ ငွေပမာဏဟာ ပြန်လည်ကုစားမရနိုင်တဲ့ နိုင်ငံတော်အဆင့် ဆုံးရှုံးနစ်နာမှုတွေဖြစ်ခဲ့ပြီးဖြစ်လို့ ပြစ်ဒဏ်လျှော့ပေး စရာ အကြောင်းမရှိကြောင်း တရားရုံးက အယူခံပယ်ချရခြင်းအကြောင်း ထုတ်ပြန်သွားပါတယ်။
Ref: VnExpress
MKF-001
#MeKongNews
#သေဒဏ်
#အယူခံ
#ပယ်ချ
#ဗီယက်နမ်
#လိမ်လည်
