မဲခေါင်၊ စက်တင်ဘာ ၆
၂၀၁၉ ခုနှစ်က ခန္ဓာကိုယ်မှာ ချပ်ဝတ်တန်ဆာ အသွင်ဆင်ယင်ပြီး ကင်မရာတပ်ဆင်ပေးထားလျှက် မြင်တွေ့ရလို့ ရုရှားသမ္မတပူတင်ရဲ့ သမုဒ္ဒရာကင်းထောက်စပိုင် ဝေလငါးအဖြစ် လူသိများခဲ့တဲ့ ဝေလငါးဖြူ ဝေးလ်ဒီမာကို ဩဂုတ် ၃၁ ရက်နေ့က နော်ဝေကမ်းလွန်ပင်လယ်ပြင်မှာ တံငါသည်တစ်ဦးက သေဆုံးလျှက်တွေ့ရှိခဲ့ပြီး ဒီသေဆုံးမှုမှာ သေနတ်နဲ့ ပစ်သတ်ခံရတာဖြစ်ကြောင်း စစ်ဆေးတွေ့ရှိခဲ့ရပါတယ်။
ရုရှားဟာ ဝေလငါးတွေကို လှောင်ပိတ်ပြီး စစ်ရေးကင်းထောက်စပိုင်အဖြစ် လေ့ကျင့်အသုံးပြုနေခဲ့တာကြာပြီ ဖြစ်ရာမှာ နောက်ပိုင်း ဝေလငါးလေး ဝေးလ်ဒီမာဟာ လွတ်မြောက်သွားပြီး နော်ဝေ ကမ်းလွန်ဒေသမှာပဲ မကြာ ခဏမြင်တွေ့နေခဲ့ရတာဖြစ်ပါတယ်။
၁၄ ပေရှည်ပြီး သေဆုံးနေချိန်မှာ အလေးချိန် ၁၂၀၀ ကီလိုဂရမ်ရှိတဲ့ ဝေးလ်ဒီမာ သေဆုံးကြောင်း တံငါသည်က တွေ့ရှိပြီးနောက် နော်ဝေ အမျိုးသားတိရစ္ဆာန်ကျန်းမာရေးစောင့်ရှောက်မှုအဖွဲ့(NOAH) နဲ့ ဝေလငါးများ စောင့်ရှောက်ရေးအဖွဲ့အစည်း(OneWhale) တို့ သွားရောက်ပြီး ဆယ်ယူရင်း စစ်ဆေးရာမှာတော့ သေနတ်နဲ့ ပစ်သတ်ထားတာဖြစ်ကြောင်း ခန္ဓာကိုယ်ထဲမှာ ကျည်ဆံတွေနဲ့တကွ တွေ့ရှိရတာဖြစ်ပါတယ်။
OneWhale ထူထောင်သူ ရီဂျီနာဟော့ဂ်က “ ဝေလငါးလေးအလောင်းတွေ့တော့ ဒဏ်ရာတွေအများကြီးနဲ့ပါ။ ချက်ချင်း သေနတ်နဲ့ ပစ်သတ်ခံရတာကို သိလိုက်ရတယ်။ ခန္ဓာကိုယ်ထဲ နစ်နေတဲ့ ကျည်ဆံလည်းတွေ့တယ်။ ဒီလောက်ယဉ်ကျေးလိမ်မာပြီး အန္တရာယ်မပြုတဲ့ ဝေလငါးလေးကို ရက်စက်စွာ သတ်ဖြတ်ခဲ့တာ တော်တော် ဆိုးပါတယ်။ ဩဂုတ် ၃၁ ရက်နေ့က ရာဆာဗီကာ ပင်လယ်ကွေ့မှာ အလောင်းတွေ့တာပါ။ သူ့ကို ဒီဘက်နှစ်ပိုင်း အတွင်း ကျွန်တော်တို့ စောင့်ရှောက်ကြည့်ရှုခဲ့ရတာမို့ ဝမ်းနည်းနှမြောမိပါတယ်” လို့ ပြောသွားခဲ့ပါတယ်။
ရုရှားမှာ ဘက်ပြောင်းသူလို့ စွပ်စွဲကြတဲ့ ဝေးလ်ဒီမာသေဆုံးခြင်းအပေါ် စုံစမ်းစစ်ဆေးဖို့လိုကြောင်းနဲ့ သဘာ၀ တရားအပေါ် ရာဇဝတ်မှုကျူးလွန်ခြင်းမှာ ရုရှားဘက်က လုပ်ကြံမှုလည်းဖြစ်နိုင်ကြောင်း NOAH အကြီးအကဲ ဆီရီမာတင်ဆန်က ပြောကြားသွားပါတယ်။
Ref:Thesun
MKF-001
