မဲခေါင်၊ စက်တင်ဘာ ၅
ပြီးခဲ့တဲ့ရက်ပိုင်းက ဂါဇာကမ်းမြောင်ဒေသရဲ့ ဥမင်တွေထဲမှာ ဓားစာခံ ၆ ယောက်ကို ဟားမက်စ်တွေက ရက်ရက် စက်စက် အနီးကပ်ပစ်သတ်ခဲ့ရာမှာ အစ္စရေး-အမေရိကန် နိုင်ငံသား ဂိုးလ်ဘာ့ဂ်-ပိုလင်လည်းပါဝင်ခဲ့တာကြောင့် အမေရိကန်တရားရေးဌာနက ဟားမက်စ်အဖွဲ့ရဲ့ အလုံးစုံ ခေါင်းဆောင်ဖြစ်တဲ့ ဂါဇာဘင်လာဒင်ခေါ် ယာဟွာဆင်ဝါအပါအဝင် နောက်ထပ် ဟားမက်စ်ခေါင်းဆောင်ပိုင်း ၅ ယောက်ကို အကြမ်းဖက်သမားတွေ အဖြစ် စွဲချက်တင်အရေးယူလိုက်ကြောင်း စက်တင်ဘာ ၃ ရက်နေ့မှာ အတည်ပြု ထုတ်ပြန်သွားပါတယ်။
နယူးယောက်တောင်ပိုင်းခရိုင် တရားရုံးကနေ ဟားမက်စ်ခေါင်းဆောင် ၆ ယောက်ကို စွဲချက် ၇ ချက်နဲ့ အရေးယူကြောင်း ထုတ်ပြန်ခဲ့တာဖြစ်သလို ဒီစွဲချက်တွေထဲမှာ ဟားမက်စ်ကို ငွေကြေးထောက်ပံ့နေမှုအတွက် စွဲချက် လည်း ပါဝင်ခဲ့ပါတယ်။
အမေရိကန်ဟာ ဟားမက်စ်ကို ၁၉၉၇ ခုနှစ်ကတည်းက ပြည်ပအခြေစိုက် အကြမ်းဖက် အဖွဲ့အဖြစ် သတ်မှတ်ခဲ့ပါတယ်။
အောက်တိုဘာ ၇ ရက်နေ့က အစ္စရေးနယ်စပ်ကိုဖြတ်ကျော်ပြီး အမေရိကန် နိုင်ငံသား ၄၀ အပါအဝင် အရပ်သားပြည်သူ ၁၂၀၀ ကျော်ကို ဟားမက်စ်တပ်တွေက ဝင်ရောက်သတ်ဖြတ်ခဲ့ပြီး ၂၅၁ ယောက်ကို ဓားစာခံအဖြစ် ဖမ်းဆီးသွားခဲ့ပြီးနောက် ကျန်ရှိ ဓားစာခံ ၁၀၀ အနက် ၃ ပုံ ၁ ပုံမှာလည်း သေဆုံးခဲ့ပြီးဖြစ်ပါတယ်။
အမေရိကန်ဟာ ဟားမက်စ်ခေါင်းဆောင်တွေကို ရာဇဝတ်သား အကြမ်းဖက်သမားတွေအဖြစ် သတ်မှတ်ကြောင်း မထုတ်ပြန်ပေမယ့် ခုမှ ဟားမက်စ်ဟာ အစုလိုက်အပြုံလိုက်သတ်ဖြတ်မှု၊ အမေရိကန်နိုင်ငံသားတွေကိုလည်း သတ်ဖြတ်မှုအပေါ် အဆိုးရွားဆုံး အကြမ်းဖက်ခြင်းဖြစ်ကြောင်းနဲ့ အမေရိကန်နိုင်ငံသားတစ်ဦးကို နာကျင်စေရင်တောင် ကျူးလွန်သူကို ထိပ်ဆုံး ကနေ အောက်ဆုံးအထိ တာဝန်ခံခိုင်းရမှာဖြစ်လို့ အရေးယူတယ်လို့ ခရိုင် ရှေ့နေချုပ် ဒါမီယမ်းဝီလျံက ထုတ်ပြန် သွားပါတယ်။
ဒါကြောင့် အီရန်နိုင်ငံကိုသွားစဉ် ဟားမက်စ် နိုင်ငံရေးခေါင်းဆောင် ဟာနီယက်ချ် လုပ်ကြံခံရလို့ သေဆုံးပြီး နောက် ဟားမက်စ်ရဲ့ အလုံးစုံခေါင်းဆောင်အဖြစ် တင်မြှောက်လိုက်တဲ့ ဟာဟွာဆင်ဝါ၊ ဟာနီယက်ချ် (သေဆုံး)၊ မာဝမ်အစ်ဆာ (ဂါဇာက ဟားမက်စ်လက်နက်ကိုင်တပ်ဖွဲ့ ဒုခေါင်းဆောင်ဟောင်း -သေဆုံး)၊ ခါလက်မက်ရှယ် (ဒါဟာအခြေစိုက် ဟားမက်စ်ခေါင်းဆောင်)၊ ဟားမက်စ် သက်တမ်းရှည်လက်နက်ကိုင်တပ်ဖွဲ့ ခေါင်းဆောင် မိုဟာမက်ဒီအစ်ဖ် (သေဆုံး)နဲ့ ဘေရွတ်အခြေစိုက် ဟားမက်စ်ပြည်ပဆက်ဆံရေးအဖွဲ့ခေါင်းဆောင် အလီဘာရာကာတို့ကို အကြမ်းဖက်ခေါင်းဆောင်တွေအဖြစ်အရေးယူကြောင်း အမေရိကန်က ထုတ်ပြန်သွားတာ ဖြစ်ပါတယ်။
လက်ရှိမှာ ယာဟွာဆင်ဝါဟာ ဂါဇာက မြေအောက်ဥမင်တွေထဲမှာပဲ လှည့်ပတ်ပုန်းအောင်းနေတယ်လို့ သတင်း ရရှိပေမယ့် ကာတာဟာ ဟားမက်စ်ကို အဓိက ထောက်ပံ့ကာကွယ်ပေးနေလို့ ဒီ သက်ရှိထင်ရှားကျန်ရှိနေတဲ့ ခေါင်းဆောင်တွေကို ကာတာအစိုးရက ဖမ်းဆီးလွှဲအပ်ပေးဖို့ အမေရိကန်ဘက်က ဖိအားပေးတောင်းဆိုထား ကြောင်းလည်း သိရှိရပါတယ်။
အမေရိကန် အစိုးရအဖွဲ့ အကြီးတန်းအရာရှိတစ်ဦးကတော့ ခုလို အရေးယူမှု ကြောင့် အစ္စရေးနဲ့ ဟားမက်စ် အပစ်အခတ်ရပ်စဲနိုင်ရေး ကြားဝင်စေ့စပ်မှုဟာလည်း အခြေအနေ မကောင်း နိုင်ကြောင်း ထုတ်ဖော်ပြောဆိုသွားပါတယ်။
Ref: timesofisrael
MKF-001
