မဲခေါင် ဇူလိုင် ၁၉
ရှမ်းပြည်နယ် မြောက်ပိုင်းက တရုတ် – မြန်မာ နယ်စပ်ဂိတ်တွေကို ဇူလိုင်လ ၁၇ ရက်နေ့ကစပြီး တရုတ်ဘက်က ပြန်ပိတ်လိုက်ပြီ ဖြစ်ကြောင်း နယ်စပ်ဒေသခံတွေဆီက သိရပါတယ်။
“အခုက ကျင်စန်းကျော့လည်း ပိတ်လိုက်ပြီ။ တရုတ်ဘက်ကို မြောက်ပိုင်း မဟာမိတ်တွေ ထိန်းချုပ်ထားတဲ့ နယ်စပ်ဂိတ်တွေကို ပိတ်ပေးဖို့ စစ်ကောင်စီ မြန်မာဘက်က သွားပြောထားတယ်လို့ ကြားတယ်” လို့ နယ်စပ် ဒေသခံ လုပ်ငန်းရှင် တစ်ဦးက ပြောပါတယ်။
ရှမ်းပြည်နယ် မြောက်ပိုင်းက နယ်စပ်ဂိတ်တွေကနေ ကုန်သွယ်မှု လုပ်လို့မရတော့တာကြောင့် နယ်စပ်ကုန်သွယ်ရေးကို အမှီအခိုပြုနေရတဲ့ လုပ်ငန်းရှင်ပြည်သူတွေ၊ လုပ်သားတွေအနေနဲ့ ပိုမို ခက်ခဲလာတယ်လို့ သူက ပြောပါတယ်။
“ဒီရက်ပိုင်းထဲ မုံးကိုးဘက်က နယ်စပ်ဂိတ်လည်း တရုတ်ဘက်က ပိတ်လိုက်တယ်လို့ ပြောနေကြတယ်။ ပစ္စည်းတွေ ဝယ်လို့ မရတော့ဘူး” လို့ ဝေးသည် အမျိုးသမီး တစ်ဦးကလည်း ပြောပါတယ်။
ဒါ့အပြင် TNLA က ထိန်းချုပ်ထားတဲ့ တရားမဝင်ဂိတ် ဖြစ်တဲ့ နောင်တောင်းဂိတ်နဲ့ ကိုးကန့် MNDAA က ထိန်းချုပ်ထားတဲ့ ချင်းရွှေဟော် နဲ့ ရန်လုံကျိုင်းဂိတ်တွေကိုလည်း တရုတ်ဘက်က ပိတ်လိုက်ကြောင်း ဒေသခံတွေဆီက သိရပါတယ်။
၁၀၂၇ စစ်ဆင်ရေး ပထမပိုင်းက ကိုးကန့် MNDAA နဲ့ ပူးပေါင်းတပ်ဖွဲ့တွေ သိမ်းပိုက်ထားတဲ့ မူဆယ် ကျင်စန်းကျော့နဲ့ မုံးကိုး နယ်စပ်ဂိတ်တွေကို ကိုးကန့် MNDAA နဲ့ ပူးပေါင်းတပ်ဖွဲ့တွေ ထိန်းချုပ်ခဲ့ပြီးနောက် အနည်းငယ်အကြာမှာ တရုတ်နဲ့ မြန်မာနယ်စပ် ဒေသထွက်ကုန်တွေကို တင်ပို့ခွင့်ပြုထားပြီး တရုတ်ဘက်ကကုန်ပစ္စည်းတွေကိုလည်း တင်သွင်းခွင့်ပြုပေးထားတာ ဖြစ်ပါတယ်။
စစ်ကောင်စီဘက်ကတော့ နယ်စပ်ကုန်သွယ်ရေး လမ်းမအသစ်ကို ရှမ်းပြည်နယ် အရှေ့ပိုင်းမိုင်းလား ဒေသကနေတဆင့် အမြန်ဆုံး ဖောက်လုပ်ကာ ကုန်သွယ်နိုင်ဖို့ ပြင်ဆင်နေကြောင်း ကုန်တင်ယာဉ်မောင်းတွေက ပြောပါတယ်။
၁၀၂၇ စစ်ဆင်ရေး ပထမပိုင်း မတိုင်ခင်က ကျင်စန်းကျော့ နယ်စပ် ကုန်သွယ်မှု ပမာဏဟာ တစ်နှစ်ကို အမေရိကန် ဒေါ်လာ ၃ သန်း ဝန်းကျင် ကုန်သွယ်မှုရှိတာဖြစ်ပြီး ချင်းရွှေဟော် နယ်စပ်ဂိတ်ကနေလည်း တစ်ရက်ကို အမေရိကန် ဒေါ်လာ ၃ သန်းကျော်ခန့် ကုန်သွယ်မှု ရှိခဲ့တာ ဖြစ်ပါတယ်။
CJ-008
