မဲခေါင်၊ ဇူလိုင် ၁၀
ဇူလိုင် ၈ ရက်နေ့က ယူကရိန်းနိုင်ငံ ကိဗ်မြို့က အကြီးဆုံး ကလေးဆေးရုံ Okhmatdyt ပေါ်ကို ရုရှားဘက်က ဒုံးကျည်နဲ့ ပစ်ခတ် တိုက်ခိုက်ခဲ့ပြီး နာရီပိုင်းအကြာမှာ ရုရှားသမ္မတပူတင်ဟာ မော်စကိုမှာကျင်းပတဲ့ ရုရှားမိသားစုများတန်ဖိုး ဆိုတဲ့ ပြပွဲကို တက်ရောက်ခဲ့သလို အဲဒီနေ့မှာ မော်စကိုကို ၂ ရက်ကြာရောက်ရှိလာတဲ့ အိန္ဒိယဝန်ကြီးချုပ် မိုဒီဟာလည်း သွေးဆာနေတဲ့ ပူတင်နဲ့ ပွေ့ဖွက်နှုတ်ဆက်နေလို့ ယူကရိန်းသမ္မတ ဇီလန်းစကီးက ပြင်းပြင်းထန်ထန် ဝေဖန် ရှုတ်ချလိုက်ပါတယ်။
ကိဗ်မြို့ အကြီးဆုံးကလေးဆေးရုံ ဒုံးကျည်ကျရောက်တဲ့အတွက် ကလေး ၃ ယောက်အပါအဝင် ၃၇ ဦးသေဆုံးပြီး ၁၇၀ ဒဏ်ရာရတဲ့ဖြစ်စဉ်ကြောင့် ပူတင်ဟာ အပြစ်မဲ့ကလေးတွေ ကုသရာဆေးရုံကိုတောင် ပစ်မှတ်ထားတိုက်ခိုက် တဲ့ သွေးဆာနေသူ ရာဇဝတ်သားလို့ ဇီလန်းစကီးက သုံးနှုန်းဝေဖန်လိုက်သလို ကမ္ဘာ့အကြီးမားဆုံး ဒီမိုကရေစီ နိုင်ငံဖြစ်တဲ့ အိန္ဒိယဝန်ကြီးချုပ် မိုဒီကပါ မော်စကိုမှာပူတင်နဲ့ ပွေ့ဖက် ချစ်လှစွာသော မိတ်ဆွေကြီးလို့ နှုတ်ဆက်ခဲ့ မှုကြောင့် စိတ်နှလုံးမချမ်းမြေ့ဖွယ် ဖြစ်ခဲ့ရကြောင်း ဇီလန်းစကီးက ဝေဖန်သွားခဲ့တာဖြစ်ပါတယ်။
ဇီလန်းစကီးက သူ့ X(ယခင်တွစ်တာ) မှာ “ဒီကနေ့ ယူကရိန်းမှာ ၃၇ ယောက် သေဆုံးတယ်။ ကလေး ၃ ယောက် ပါတယ်။ အယောက် ၁၇၀ ဒဏ်ရာရတယ်။ ကင်ဆာရောဂါသည် ကလေးငယ်တွေ အများဆုံးရှိရာ ကိဗ်မြို့ အကြီး ဆုံးကလေးဆေးရုံကိုမှ ပစ်မှတ်ထားပြီး ဒုံးကျည်နဲ့ ပစ်ခဲ့တယ်။ အပျက်အဆီးပုံတွေကြားမှာ ပိတ်မိပြီး နာကျင်နေ တဲ့ကလေးတွေလည်း ရှိတယ်။ အရမ်း ဝမ်းနည်းဖို့ကောင်းတဲ့ဖြစ်စဉ်ပါ။ ဒီအချိန် ကမ္ဘာ့အကြီးဆုံး ဒီမိုကရေစီနိုင်ငံ ကြီးက မော်စကိုမှာ သွေးဆာနေတဲ့ ရာဇဝတ်သား(ပူတင်)နဲ့ ပွေ့ဖက်နှုတ်ဆက်နေမှုပုံရိပ်ဟာ ငြိမ်းချမ်းရေး အတွက် ထိုးနှက်ချက်ကြီးပါပဲ” လို့ ရေးတင်သွားခဲ့တာဖြစ်ပါတယ်။
အသက် ၇၁ နှစ်ရှိပြီဖြစ်တဲ့ ပူတင်ဟာ ကိဗ်ကလေးဆေးရုံကို ဒုံးကျည်နဲ့ ရက်စက်စွာ ပစ်ခဲ့တဲ့နေ့မှာပဲ မော်စကိုက All-Russian Exhibition Centerမှာ တစ်နိုင်ငံလုံးက လာရောက်ပြိုင်ပွဲဝင်တဲ့ ရုရှား နိုင်ငံတကာပြပွဲ ဖိုရမ်လည်းဖြစ်၊ ဒေသအလိုက် ရုရှား စီးပွားရေး၊ စက်မှုလက်မှုစွန့်ဦးတီထွင်သူတွေကို ဂုဏ်ပြုတဲ့ ရုရှားမိသားစုတန်ဖိုးနေ့ အခမ်းအနားကို တက်ရောက်ခဲ့လို့လည်း ဆေးရုံပေါ်က ကလေးတွေကို သတ်တဲ့နေ့မှာ မိသားစုတန်ဖိုး အထိမ်းအမှတ်နေ့ တက်ပြနေတယ်လို့ နိုင်ငံတကာက ပြင်းပြင်းထန်ထန် ဝေဖန်နေခဲ့ကြပါတယ်။
ယူကရိန်းဘက်ကလည်း ကလေးဆေးရုံ တိုက်ခိုက်ခံရမှုအတွက် လက်စားချေမှုအဖြစ် ရုရှားဒေသ ၆ ခုဆီ ဒရုန်း တိုက်ခိုက်မှုပေါင်းများစွာ လုပ်ဆောင်ခဲ့ရာမှာ ထိခိုက်မှုတွေရှိခဲ့ပြီး ရုရှားဘက်က ဒရုန်း ၃၈ စီး ပစ်ချနိုင်ခဲ့တယ်လို့ ဇူလိုင် ၉ ရက်နေ့မှာ ထုတ်ပြန်သွားပါတယ်။
Ref: aninews
MKF-001
#MeKongNews
