(ကျောက်မဲ ဇွန် ၂၆ ရက် မနက်ပိုင်း တိုက်ပွဲအခြေအနေ)
မဲခေါင်၊ ဇွန် ၂၆
ရှမ်းမြောက်မှာ တစ်ကျော့ပြန်ဖြစ်ပွားလာတဲ့ ၁၀၂၇ စစ်ဆင်ရေးအဆက်(ဒေသအခေါ် ၀၆၂၅) တိုက်ပွဲတွေအတွင်း ကျောက်မဲမြို့ထဲမှာ ဒီမနက် တိုက်ပွဲသံတိတ်နေပေမယ့် ညပိုင်းမှာ လက်နက်ကြီးသံနဲ့ တိုက်ပွဲ ပစ်ခတ်သံတွေကြားနေရတယ်လို့ ဒေသခံတွေဆီက သိရပါတယ်။
စစ်ကောင်စီတပ်က မနေ့က တစ်နေ့လုံး လက်နက်ကြီး အချက်ရေ ၅၀ နီးပါး ပစ်ခတ်ခဲ့ပြီး လေယာဉ်နဲ့ ဗုံး တစ်လုံး လာကြဲကာ မြို့တွင်းမြို့ပြင်ထိတွေ့တိုက်ပွဲတွေမှာ အရပ်သား ၃ ဦး သေဆုံးပြီး ၃ ဦးဒဏ်ရာရရှိခဲ့တယ်လို့ သိရပါတယ်။
“ ဒီမနက် ၇:၃၀ အထိ တော့ အသံမကြားသေးပေမယ့် ညကတော့ လက်နက်ကြီးသံက မြို့ထဲမှာပစ်နေသလိုပဲ အသံအကျယ်ကြီးကြားလာရတယ်၊ တပ်က လက်နက်ကြီး ၂ လက်လောက်ပဲပစ်နေတာဖြစ်ပေမယ့် လုံးရေ များတယ်၊ ဒရုန်းသံတော့မကြားသေးဘူး၊ လက်နက်ကြီးက မှန်းပစ်ရမ်းပစ် လုပ်ပေမယ့် ဒရုန်းကျတော့ အောက်က မဲမဲမြင်ရာ ပစ်ချမှာမို့ အပြင်ကို မထွက်ရဲကြဘူး၊ ရိက္ခာနဲ့ရေ အသင့်အတင့်ရှိပေမယ့် ရက်ကြာရင်မလွယ်ဘူး၊ မန္တလေးဘက် ဆင်းဖို့ကလဲ လမ်းဖွင့်ပေးမှရမှာ” လို့ ကျောက်မဲရပ်ကွက်-၂ နေ သူ ၁ ဦးက မဲခေါင်ကို ပြောပါတယ်။
ကျောက်မဲမြို့နယ် ၊ နားအိုက်ခန့်က မွေးမြူရေးခြံလုပ်သား တစ်ဦးလည်း ကျောမှာ ဒဏ်ရာရလို့ နောင်ပိန်ပရဟိတက သွားရောက်ခေါ်ယူပြီးနောင်ပိန်ဆေးခန်းမှာ ပဲ ကုသနေရသလို နောင်ပိန်က ကားကြီးတွေ မန္တလေးဘက် ဆင်းတာ မှာ လမ်းအခြေအနေမကောင်းလို့ ပြန်လှည့်လာခဲ့ကြပေမယ့် အတက်တွဲကား တစ်စီးမှာ တော့ ၂ ဖက် တိုက်ပွဲကြားမှာ ပိတ်မိပြီး ကားသမား သေနတ်မှန်သေဆုံးခဲ့တယ်လို့ သိရပါတယ်။
ယမန်နေ့ ဇွန်လ ၂၅ ရက် ညနေ ၅ နာရီကျော်မှာ ပစ်ခတ်လိုက်တဲ့ လက်နက်ကြီးဒဏ်ကြောင့် ကျောက်မဲမြို့နယ်၊ ငြိမ်းချမ်းရေးကုန်းက သီလရှင်ကျောင်းကြီး ပျက်စီးသွားခဲ့သော်လည်း လူအထိအခိုက်မရှိဘူးလို့ သိရပါတယ်။
အဆိုပါ သီလရှင်ကျောင်းမှာ သီလရှင်ကြီး ၃ ပါးနဲ့ သီလရှင် ၁၀၀ ကျော် သီတင်းသုံးနေတယ်လို့သိရပြီး လက်ရှိမှာ ဒုက္ခရောက်နေကြပြီး မြို့လူထုမှာလည်း ည ၉ နာရီ နီးပါးအထိ တိုက်ပွဲဖြစ်ပွားနေလို့ အပြင်မထွက်ကြဘူးလို့ သိရပါတယ်။
လက်ရှိမှာ ကျောက်မဲမြို့က လက်နက်ကြီးကျခဲ့တဲ့ ရပ်ကွက်-၇ နဲ့အချို့ ရပ်ကွက်တွေမှာ လျှပ်စစ်မီးပြတ်တောက်နေတယ်လို့ သိရပြီးစစ်ဘေးကြိုတင်မရှောင်နိုင်ဘဲ ပိတ်မိနေတဲ့အနေအထားဖြစ်နေတယ်လို့ သိရပါတယ်။ မန္တလေးဘက်ကို မဆင်းနိုင်ဘဲ ကျောက်မဲလေးနဲ့ နားပြိန်းကျေးရွာဘက်တွေကို ပြည်သူအချို့ တိမ်းရှောင်နေကြတယ်လို့ သိရပါတယ်။
“ သီပေါက ကျောက်မဲဘက်လည်းသွားလို့မရ၊ ကျင်သီဘက်လဲ သွားလို့မရ၊ လားရှိးဖက်လဲ ဆွတ်လန်းတံတား မနက်ကပဲပျက်စီးသွားတော့ ဘယ်မှ ထွက်လို့မရပဲ ပိတ်မိနေကြတယ်။
သီပေါမြို့ဘက်မှာတော့ ညနေ ၅နာရီခွဲကျော်မှာ သီပေါက လားရှိုးအထွက် တောင်ပေါ်မှာ TNLA က နေရာယူပြီး သီပေါတံတားကို လက်နက်ကြီးနဲ့ အချက်ရေ ၈ချက် ပစ်ခတ်ပြီး သီပေါတံတားအစောင့် စစ်တပ်နဲ့ အပြန်အလှန်ပစ်ခဲ့ကာ ခလရ-၂၃ အနီး တိုက်ပွဲဖြစ်ပွားခဲ့ပြီး ည ၈ နာရီကျော်မှာ တိုက်ပွဲငြိမ်သက်သွားတယ်လို့ သိရပါတယ်။
စစ်ကောင်စီတပ်က လက်နက်ကြီးနဲ့ တိမ်တောင်ဘက်ကို ပစ်ခတ်မှုမှာ အချို့ကျည်တွေက ပန်စောက်မိန်းနဲ့မြို့ဟောင်းရပ်ကွက်တွေဘက်ကို ကျရောက်ခဲ့ပြီး ဆီမရှိတော့တဲ့ ဓာတ်ဆီဆိုင်၊ ဝပ်ရှော့တွေ ပျက်စီးဆုံးရှုံးမှုတွေ ရှိနေတယ်လို့သိရပါတယ်။
နောင်ချိုမှာတော့ ယမန်နေ့မှာတော့ ဆေးရုံ၊ မီးသတ်၊ မိုးဇလ နဲ့စစ်မှုထမ်းဟောင်းရုံး၊ ရဲစခန်းတို့ကို သိမ်းပိုက်နိုင်ခဲ့တယ်လို့ သိရပါတယ်။
လက်ရှိမှာ ယနေ့မနက် ၅ နာရီကစပြီး နောင်ချိုကို မန္တလေးကအဝင်က ခမရ-၁၁၄၊ ၁၁၅ နဲ့ ဂုတ်ထိပ်တံတားအဝင် နောင်ချို၊ ရပ်စောက်လမ်း ပေါ်က အမှတ် ၆၀၆ ဒုံးတပ်ဘက်က မြို့ထဲကို လက်နက်ကြီးနဲ့စစ်ကောင်စီက ပစ်ခတ်နေပြီး တော်လှန်ရေးတပ်တွေက ဆက်လက်တိုက်ခိုက်နေတယ်လို့ သိရပါတယ်။
မနေ့ကစတဲ့ လက်ရှိ ၁၀၂၇ စစ်ဆင်ရေး(အဆက်)၀၆၂၅ စစ်ဆင်ရေးမှာ စစ်ကောင်စီတပ် အခြေစိုက်ထားတဲ့ ရှမ်းမြောက်က နောင်ချို၊ ကျောက်မဲ၊ သီပေါတို့ကို TNLA နဲ့ PDF တပ်ဖွဲ့တွေ အပြန်အလှန်တိုက်ခိုက်နေပြီး မန္တလေးတိုင်းက မိုးကုတ်နဲ့ပြင်ဦးလွင်ဘက်မှာလည်း တိုက်ခိုက်မှုတွေ ရှိနေတာဖြစ်ပါတယ်။
MK-012